《一個希古恩就能解決攻力疲弱問題?沙利你未免太天真了》

藍獅 於 15/01/2019 發表 收藏文章
-請支持藍獅 Facebook專頁-
《原創文章 歡迎轉載 請列明出處 謝謝》

.圖片來源 : Talk Chelsea

法比加斯嘅離開,可以話將全隊唯一一個善於創造機會嘅中場都賣走了,雖然西班牙人今季喺沙利手中得到嘅上陣機會寥寥可數,但惜日歐洲助攻王嘅離開亦令唔少球迷感到婉惜。隨之而來就係一連串嘅收購目標新聞,當中當然不缺乏近哩兩個轉會窗嘅老常客希古恩嘅消息,但一個希古恩就能夠將車路士鋒線疲弱嘅問題解決得到?沙利會唔會過份將問題睇得太過輕易。

其實由沙利上任果刻開始,都經已傳出佢向藍軍高層提出除左要收購舊部佐真奴之外,更要將希古恩帶到倫敦,可惜因為種種原因,最終球員選擇以外借身份留喺意大利加盟AC米蘭,而希古恩自己亦都有喺當時表示史丹福橋就只有沙利一人歡迎佢,可見得球員清楚了解得到自己嘅處境。經歷左半季過後,雙方情況亦有轉變,希古恩在米蘭屈屈不得志,而莫拉達亦交唔出合乎沙利對中鋒嘅表現,令外界開始重燃對哩單轉會嘅炒作。

論個人能力,希古恩喺中鋒哩個位置上嘅能力其實算得上相當全面,雖然球迷往往著眼於佢喺國家隊時嘅失準表現,只不過縱橫左喺意甲聯賽咁多年阿根廷人都交出相當穩定嘅入球量,當然身形上亦大有可以改善嘅地方。但係希古恩其實都係一個相當依賴隊友去製造機會嘅射手,過往喺拿坡里同祖雲達斯年代身邊都有唔少同時具備攻擊質素以及創造力嘅球員,但今季一去到一隊完全缺乏創造力及進攻板斧嘅AC米蘭之下,曾經喺意甲獨當一面嘅射手亦顯得相當力不從心。

雖然車路士中場質素尚算比起AC米蘭優厚,但論創造能力上其實都只係叫做稍稍佔優,沙利過份要求簡迪向前參與進攻,而夏薩特及韋利安亦經常缺少拉邊多走入中路,引致對手禁區位置經常「大塞車」,雖然莫拉達自己又真係唔爭氣,但車路士攻力疲弱哩個問題真係並非換一個中鋒就能夠解決得到,沙利喺戰術上嘅失衡、一意孤行嘅賭博式進攻以及缺乏變化嘅節奏先可以話係問題嘅根源,而佢一直用球員未熟練戰術嘅本身為由亦都只係時間上嘅拖延,意大利人心目中嘅盤算可能係希望等待自己心儀嘅球員來臨。

而希古恩都經已三十有一,就算真係仲有貨賣亦都唔會係長時間,到時又要搵人接貨係賺定蝕相信球會亦都好清楚,與其繼續喺佢身上拉鋸,倒不如實實在在地喺中場入手,睇下有邊啲目標球員能夠解決到創造力等問題,同時沙利亦理應疏理番好個進攻模式,正所謂遠水不能救近火,收購一名喺夏季先黎到嘅普利錫都經已令球迷摸不著頭腦。

如果今個轉會窗唔作出相應對策的話,下一支跌出前四嘅球隊都幾肯定非車路士莫屬。


文章最後更新時間 : 15/1/2019 13:30

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

標籤: 車路士  沙利  希古恩  AC米蘭  祖雲達斯  

留言

會員
我要評論
請按此登錄後留言。未成為會員? 立即註冊
  • Marjill
    Marjill 於 15/01/2019 評論 NO. 1

    如果買希古恩,我情願留反摩拉達

  • Daniel Ngan
    Daniel Ngan 於 16/01/2019 評論 NO. 2

    其實摩拉達打返起係岩用的
    相反基奧特未必岩現有陣式用
    仲要想法破解對方mark死左真奴

  • tinchi3721
    tinchi3721 於 16/01/2019 評論 NO. 3

    唔係車迷 但本身能夠解決問題既人就係法比加斯

  • KenChan沙田友
    KenChan沙田友 於 16/01/2019 評論 NO. 4

    普利錫(Sarri)和莫拉達、飲水、巴克利、艾馬臣(干地)、迪積達保積、巴巴(摩二)、奧斯卡、摩西斯(迪馬堤奧)、托利斯(安察洛提)、薛維爾、舒夫真高(摩一)、洛賓、施治、基斯普、華朗、謝列美(雲尼亞里)一樣, 都非主教練决定, 係艾巴或在任CEO操作!

  • ShunFei
    ShunFei 於 17/01/2019 評論 NO. 5

    係「鬱鬱不得志」

快捷鍵:←
快捷鍵:→