奧斯爾係阿仙奴高層無能下嘅犧牲品

Blu波pen 於 22/10/2020 發表 收藏文章
相信大家都已有共識,奧斯爾並非因足球原因而被剔除在大隊英超名單外。原因可能有好多,但我個人認為觸發點在於拒絕減薪一事上。

呢一點係有跡可尋。喺阿迪達上任初期奧斯爾重拾正選位置,表現逐漸提升,嗰時好多人都話奧斯爾復活啦。一場武肺殺到,英超停賽,球隊收入大減,阿仙奴成為首支要求球員減薪嘅球隊。當時奧斯爾帶頭反對,認為減薪一事欠缺規劃,被節省嘅資金去向不明,要求球會交代更多細節。不過大部份球員都接受減薪計劃,只有一兩位球員同奧斯爾一樣拒絕減薪。

復賽後,奧斯爾一分鐘都冇踢過。你話冇正選都合理,但係連都後備都冇,甚至被告知唔使返去練波。好多人立即對奧斯爾群起攻之、或乘機譏笑,針對佢35萬磅嘅週薪,再加上拒絕減薪一事,將佢形容為一名好食懶做、自私、懶惰嘅人。但好多人都唔記得,奧斯爾係嗰季英超曾18次正選上陣,交出全隊最多嘅場均key passes,停賽前最後一場小勝韋斯咸嘅比賽正正係由奧斯爾交出助攻製造全場唯一入球。
七月阿仙奴宣布裁員,毫不意外地,奧斯爾再次成為討論重點。唔少媒體都以奧斯爾嘅週薪同阿仙奴員工嘅人工作比較,嘗試將奧斯爾描繪成禍害嘅起源。還記得香港某果日報喺報導裁員一事時,直接喺標題上寫住「奧燒你羞恥嗎?」。但奧斯爾背後捐出嘅錢同一系列嘅慈善工作,又有幾多人留意?

受到連番抨擊後,奧斯爾終於喺八月打破沉默,接受The Athletic資深記者David Ornstein訪問。係喺專訪入面,奧斯爾表示自己效忠於阿仙奴,希望能夠完成四年合約,但亦暗示自己喺復賽後因足球以外嘅原因被棄用。同時,佢解釋自己對於減薪計劃嘅質疑,擔心減薪唔能夠幫助到有需要嘅人。最終,奧斯爾係正確嘅。當初高安基承諾唔會裁員,之後出爾反爾照炒55人,減薪計劃單純變成幫高安基慳錢嘅方式。

或者由呢個時候開始,奧斯爾已經成為阿仙奴高層嘅眼中釘。奧斯爾嘅選擇、取態正正顯示緊阿仙奴管理層嘅不濟,再到後來Gunnersaurus 一事後兩者正式勢成水火。既然阿仙奴無法擺脫佢高昂嘅人工,就唯有擺脫佢個人。巴塞主席巴杜姆親自聘請輿論機器,嘗試抹黑同佢吹反調嘅巴塞老臣子。唔敢講阿仙奴有做同樣嘅事,但至少咁耐以嚟都好少見阿仙奴官方主動維護經常受傳媒中傷嘅奧斯爾。
當然,呢個決定亦唔係完全同足球無關。如果奧斯爾踢到奧巴美揚咁,我諗佢講咩高層都唔會理。固然而家嘅體系唔適合奧斯爾發揮,但作為近代創造力最強嘅球員之一,留嚟變陣亦冇壞。加上佢嘅資歷同大賽經驗,留喺球隊內一定有正面作用。

至於好多人都偏向相信嘅因政治表態而受打壓,我個人覺得有保留。奧斯爾為中國穆斯林疆維吾爾族人發聲已經係一年前嘅事,冇記錯當時事件爆發後奧斯爾仲可以正選上陣。如果阿仙奴真係咁驚應該一早就踢走佢,冇需要一年後先秋後算賬。不過當然唔能夠完全排除呢個可能性。

呢場鬧劇係由阿仙奴高層嘅無能所引起。當阿仙奴喺球場上嘅嘅表現漸上正軌嘅同時,管理層就越做越差。奧斯爾呢一年將會非常難捱,而且敢於發聲嘅球員唔多,希望球迷們可以多一份支持。

如果你中意呢篇文,希望你可以like埋我個facebook page,多謝各位大佬!
Blu波pen:
https://www.facebook.com/blueballpenhk/

如果喜歡我們的文章,請即分享到︰

標籤: 阿仙奴  

留言


請按此登錄後留言。未成為會員? 立即註冊
  • iamagoodboy 於 23/10/2020 評論 NO. 1

    理性文章
    作者請繼續努力
    寫更多分析

快捷鍵:←
快捷鍵:→