英超爭四最後直路

黑仔講波 於 07/05/2022 發表 收藏文章
英超踏入第 36 輪賽事,爭冠、爭四、護級都進入白熱化階段。現時排榜首嘅曼城繼續以 1 分力壓利物浦,喺比賽場數一樣嘅情況下擁有爭標主動權;第三位嘅車路士近況反覆,近四場聯賽只取得 4 分,上場更意外不敵愛華頓,不過依然以 6 分優勢穩守第三;排第四嘅阿仙奴近三輪接連擊敗車路士、曼聯及韋斯咸呢三隊爭四競爭對手,狀態可謂大熱大勇,更直接令韋斯咸無緣前四,曼聯亦只剩低數字上嘅可能;熱刺早前先後失分俾白禮頓、賓福特,雖然上場擊敗李斯特城重回勝軌,但已跌落第五位,落後阿仙奴 2 分,今輪嘅「北倫敦打吡」對呢兩隊嚟講尤其重要。

講完球隊近況就同大家一齊睇下幾隊主要爭四份子嘅賽程,睇下邊個可以笑到最後。

圖片來源:英超官方網站 (https://www.premierleague.com/match/66676)

車路士 (排名:3積分:66得失球差:+39)
第 36 輪:主場 狼隊 + 作客 列斯聯
第 37 輪:主場 李斯特城
第 38 輪:主場 屈福特

牌面上車路士剩餘嘅對手都唔強,但列斯聯仍然需要為護級努力,戰意毋庸置疑,分分鐘會好似上輪愛華頓咁趁車仔近況反覆之際成功偷雞;狼隊亦依然有望爭奪來季歐洲賽資格,要面對佢哋穩健、成熟嘅防守反擊車路士不容鬆懈。剩低嘅李斯特城今季位處中游,無欲無求;而屈福特現時深陷降班漩渦,到聯賽最後一輪時好大機會已經篤定降班,故此車仔應該都可以輕易取勝,取得歐聯入場券。

圖片來源:英超官方網站 (https://www.premierleague.com/match/66584)

阿仙奴 (排名:4積分:63得失球差:+13)
第 36 輪:主場 列斯聯 + 作客 熱刺
第 37 輪:作客 紐卡素
第 38 輪:主場 愛華頓

面對車路士、曼聯及韋斯咸取得三連勝嘅兵工廠狀態火熱,但後防或者會係一個隱憂,因為佢哋近六場都未能保持不失,面對列斯聯、熱刺節奏快嘅踢法同快速反擊時要格外小心。紐卡素同上一段講過嘅李斯特城一樣冇嘢爭,理應唔會係一個太大嘅考驗,且看最後一輪嘅對手愛華頓到時仲洗唔洗為護級而努力,若然嗰場係佢哋嘅護級生死戰的話,勢必係一場惡戰。

圖片來源:英超官方網站 (https://www.premierleague.com/match/66639)

熱刺 (排名:5積分:61得失球差:+20)
第 36 輪:作客 利物浦 + 主場 阿仙奴
第 37 輪:主場 般尼
第 38 輪:作客 諾域治

熱刺嚟緊將會迎接地獄賽程,要喺 5 日內先後對上利物浦、阿仙奴,呢兩場嘅賽果基本上已經可以決定到佢哋能否殺入前四。利物浦現時正為聯賽冠軍而努力,更有望成為「四冠王」,即使干地喺首循環曾帶領熱刺賽和利物浦,今次要作客晏菲路應該難以全身而退;主場對阿仙奴則係一場不折不扣嘅「六分波」,作為北倫敦宿敵加上爭四嘅競爭對手,呢場比賽應該會十分精彩,熱刺或有望藉主場之利取得優勢。不過就算熱刺可以過到頭兩關,面對中下游球隊經常失分嘅熱刺可能又會再次失手,畢竟「般尼從來不易」,因此熱刺爭四形勢較為被動,要做好自己本份之外仍然要寄望車路士、阿仙奴失分。

預計:第三名車路士、第四名阿仙奴

如果喜歡我們的文章,請即分享到︰

延伸閲讀:
英超護級最後直路
標籤: 英超  歐聯  車路士  阿仙奴  熱刺  曼聯  爭四  

留言


請按此登錄後留言。未成為會員? 立即註冊
    快捷鍵:←
    快捷鍵:→