創造歷史,只差一步

黑仔講波 於 01/05/2022 發表 收藏文章
圖片來源:傑志 Facebook (https://www.facebook.com/kitchee.sc/)

香港球會傑志將於香港時間今晚 (5 月 1 日) 7 點出戰最後一場亞冠盃分組賽,對上日職嘅神戶勝利船,只要今場保持不敗就能夠歷史性打入亞冠 16 強,成為首支晉級亞冠淘汰賽嘅香港球隊。

對手神戶勝利船現時以兩勝一和得 7 分嘅成績位列榜首,傑志則以 6 分緊隨其後,意味住若然傑志今場贏波就能夠反超對手奪得小組首名晉級 16 強;如果雙方握手言和各得一分,傑志亦能夠成為其中一隊成績較好嘅小組次名晉級;若不幸落敗,就會因得失球差不及另一組嘅次名球隊墨爾本城而飲恨,重演上屆因得失球差而出局嘅情況。

圖片來源:傑志 Facebook (https://www.facebook.com/kitchee.sc/)

因此,傑志教練朱志光「朱 sir」喺賽前記者會亦表示會先做好防守,再創造並好好把握機會入球,亦要避免球隊處於全場受壓嘅局面。傑志首循環面對神戶勝利船時以 2:1 落敗,當時球隊於上下半場各失一球,到補時階段憑艾力士 (Alex Akende) 扳回一城,證明球隊有力於對手身上取得入球;上場反勝清萊聯亦見到球隊並非只有獨沽一味防守反擊,喺主動進攻、球員配合上皆有進步。雖然神戶勝利船有較多休息時間,但士氣正盛嘅傑志勢必搏盡無悔,力爭出線,對住神戶勝利船絕對有力一戰。

三日前傑志熱血反勝泰國球隊清萊聯嘅畫面仍然歷歷在目,轉眼間已經嚟到最後一場分組賽。雖然傑志遠在泰國,我哋亦難以親身到現場為佢哋打氣,但希望各位球迷都能夠睇直播、透過社交媒體為佢哋加油,支持傑志!

港台電視 31 將會提供免費直播,今晚 7 點約定大家!
港台網址:https://www.rthk.hk/tv/dtt31?lang=zh-hant

大家嘅支持就係對我嘅鼓勵,如果大家想支持下我或者一齊講下波嘅,歡迎 like 我嘅 Facebook Page 同 Instagram!
https://www.facebook.com/blacksontalkball/
https://www.instagram.com/blacksontalkball/

如果喜歡我們的文章,請即分享到︰

標籤: 亞冠  港超  傑志  

留言


請按此登錄後留言。未成為會員? 立即註冊
    快捷鍵:←
    快捷鍵:→