傑志理文大戰亞洲球會

黑仔講波 於 16/04/2022 發表 收藏文章
港超球會傑志、理文完成喺泰國嘅集訓後分途出擊,前者會留喺泰國出戰亞冠盃分組賽,後者則遠赴蒙古出戰亞協盃東亞區附加賽。傑志將會喺今晚 (4 月 16 號) 7 點率先登場進行第一場分組賽,對陣泰國球會清萊聯;而理文就會喺 4 月 19 號作客蒙古球會 220 體育會。

傑志篇
圖片來源:傑志官方 Facebook 專頁 (https://www.facebook.com/kitchee.sc/)

由於中超球會上海海港退賽,傑志同組對手只剩低兩隊,除咗有上面提及過有主場之利嘅清萊聯外,另一隊就係有恩尼斯達壓陣嘅日職球會神戶勝利船。三支球隊將會踢雙循環嘅賽事,一共四場,小組首名及東亞區內三隊成績較佳嘅小組次名將會出線十六強。

圖片來源:傑志官方 Facebook 專頁 (https://www.facebook.com/kitchee.sc/)

傑志 3 月初已抵達泰國進行集訓,期間進行咗 6 場熱身賽,取得 3 勝 2 和 1 負唔錯嘅成績,相信已收提升球隊狀態之效;同時亦有助新加盟嘅土庫曼國腳明加索夫 (Ruslan Mingazov) 融入球隊,建立與隊友之間嘅默契。筆者十分期待佢喺亞冠賽場上嘅發揮,相信佢嘅加盟能夠加強傑志嘅攻力,成為丹恩奴域 (Dejan Damjanović) 以外嘅第二攻擊點。

貴為亞冠神射手,丹恩奴域嘅實力毋庸置疑,傑志喺上屆亞冠分組賽入嘅 6 球之中佢就個人獨取咗 4 球,但亦同時反映出球隊對佢嘅依賴。到今年第二度參賽,相信傑志嘅對手都會重點「照顧」呢位前鋒,其他球員如安永佳 (Matt Orr)、加維蘭 (Manuel Gavilán)、明加索夫就需要分擔更多球隊嘅進攻重任。

然而,丹尼 (Dani Cancela) 因傷無緣亞冠對傑志影響甚大。呢位堪稱係近十年港隊、傑志最佳左閘嘅球員雖然已年屆四十,但喺球場上依然有唔錯嘅表現。丹尼缺陣下,傑志好大機會會安排陳晉一甚至羅梓駿踢左閘,雖然經驗、防守路數上有差距,亦會犧牲前者部分嘅進攻能力,但亦已經係冇辦法之中嘅辦法。

理文篇
圖片來源:理文官方 Facebook 專頁 (https://www.facebook.com/Leemanfootballclub/)

至於另一支香港球會理文將會喺 4 月 19 號作客蒙古出戰亞協盃東亞區附加賽,對手係蒙古代表 220 體育會。

圖片來源:理文官方 Facebook 專頁 (https://www.facebook.com/Leemanfootballclub/)

論實力理文無疑係較好嘅一隊,兩軍曾經喺上屆亞協盃分組賽交手,當時理文大勝 5:1,然而,今次環境因素將會係對理文嘅一大挑戰。現時蒙古氣溫平均只得幾度,而且日夜溫差極大,最凍嘅時候甚至會低見零下幾度,理文當日到埗蒙古時亦正係落緊雪。喺低溫甚至落雪嘅環境作賽對港超球隊非常陌生,對球員發揮必定有所影響,希望理文能夠盡快克服、適應喺呢種環境比賽。

慶幸嘅係從理文嘅三場熱身賽中見到佢哋逐漸回復狀態,幾名進攻主力如基華尼頓 (Givanilton Martins)、洛迪古斯 (Manuel Bleda Rodríguez)、杜查祖利亞 (Júnior Dutra) 都取得入球。而佢哋抵達蒙古後亦已開始操練,適應當地嚴寒天氣,主教練陳曉明亦表示球員經過一番舟車勞頓後狀態已經回復過來,將會繼續加強訓練,積極備戰 4 月 19 號嘅賽事。
結語
今次出戰亞洲賽對於兩隊嚟講都絕非易事,因為港超自 1 月起就停賽,一眾球員未能比賽、操練,對佢哋狀態有極大影響。但傑志、理文兩支球隊喺種種不利因素下仍然搵到辦法,安排球員到外國集訓及與當地球會進行友誼賽,提升球員狀態,備戰賽事,實屬香港球員、球迷之福。

最後,請大家一齊支持傑志、理文喺亞洲賽再創佳績!港台電視 31 將會提供傑志嘅亞冠分組賽直播,各位球迷敬請留意!

大家嘅支持就係對我嘅鼓勵,如果大家想支持下我或者一齊講下波嘅,歡迎 like 我嘅 Facebook Page 同 Instagram!
https://www.facebook.com/blacksontalkball/
https://www.instagram.com/blacksontalkball/
標籤: 港超  亞冠盃  亞協盃  傑志  理文  

留言


請按此登錄後留言。未成為會員? 立即註冊
    快捷鍵:←
    快捷鍵:→