【心態決定境界】 精選

赢1場，你可以話佢好彩。
赢2場，你可以話係巧合。
但赢3場，赢4場，赢5場，
可以係英超赢到第15場，絕對唔再係幸運唔再係巧合，而係真正實力。
好多人分析李斯特城打得好嘅原因，
幸運地少傷兵係其一，唔使打歐洲杯賽係其二，
幾乎場場full team full power同你打聯賽，造就李斯特城嘅絕對優勢，尤其少傷兵呢點真係好多強隊想學都學唔到，睇睇阿仙奴，睇睇曼城，好似被咀咒咁，總係有幾個主力受傷。
但李斯特城可以一直繼續神奇之旅，其實最重要原因係佢地嘅心態。
由一支榜尾球隊，殺上英超前列，壓力理應比護級更大。
但李斯特城卻似乎剛剛相反，爭標比護級似乎更輕鬆。

好多人都話「李斯特城過唔到聖誕快車架喇！」
「1、2月就見真章架喇！」

但領隊雲里亞里一句:「球隊今季目標係拎40分。」

結果似乎即刻幫球隊舒解晒所有壓力，球隊似乎真係以40分為目標，踢落似乎場場都無包袱。

單睇今場某些球員牌面，摩根 vs 阿古路，飲水哥 vs 大衛施華，大佬阿，拍落點都輸成條街啦，但踢落又唔係喎，踢落大家都係五五波不分高低。雖然每場比賽球隊都被睇低，對每隊強隊馬會都開李斯特城受讓+1，但就係因為無人對李斯特城有期望，球員亦似乎變得無壓力，每場都只專注做好自己，鬥心十足希望踢好場波，唔會覺得自己係球星點點點。
相反一啲強隊球員總覺得自己係強隊，要踢得漂亮，要好表現爭國家隊正選...總是顧慮多多，結果造成壓力，表現自然強差人意。

所以相比起球員實力，一份無包袱嘅比賽心態，其實一樣重要！

仲有13周，李斯特城拋離第2位6分，李斯特城已經唔再係黑馬，而係真正嘅爭標份子。
仲有無人夠膽話李斯特城無可能拎冠軍？

球來球往: https://www.facebook.com/ballcomeballgo/