【球員評分:白禮頓0:1利物浦】紅軍10將齊心Carry懦夫隊長

呢邊文章會直接進入球員評分,想睇賽後簡評嘅朋友,可以點入下面條連結:
【賽後簡評:白禮頓0-1利物浦】小勝止血 = 兩閘齊飛 x 沙拿單刀救主
門將-艾利臣(7分)
雖然今場前60分鐘比較少受到威脅,但係仍然打醒12分精神。下半場靚救一球柱邊遠射,再瓦解一球有威脅近門。望住艾利臣就係有種無法解釋嘅安心感。

中堅-VVD(7分)
代表利物浦上陣的第50場。穩如泰山-仍舊穩如泰山。基本上每場用依個形容詞形容VVD都啱用。一場半場表現出色唔難;長期都能夠交出穩定表現,真係超級難能可貴!

中堅-法賓奴(5.5分)
作為兼職中堅,表現合理;但上到場無人會理你兼職定full-time。今場法賓奴整體表現唔錯,但幾球致命高波都係係法賓奴個位漏,如果唔係球證眼利有吹越位,都幾牙煙...

左閘-羅拔臣 (6.5分)
僅次於VVD,利物浦隊中最穩健嘅球員。今場繼續搏命表現,9分鐘就左邊絕妙crossing,可惜費明奴未能食中,否則比賽初段已經先開紀錄,防守上亦無乜失位。

右閘-TAA (6.5分)
今場同樣比較少受威脅,表現對路,同樣比賽早段出過一球靚波。

中場-軒達臣 (2分)
完全冇針對,純粹以波論波。今場軒達臣嘅表現,連坐後備席嘅資格都冇。向後傳同橫傳,唔係一個問題;但係都要視乎情況下嘛?球球攞波時都係對住自己龍門,只要附近5米有對方球員,直頭身都唔轉就即刻回傳;講緊嘅係對方都未開始逼佢喎,咁呢次後傳嘅實質意義係咩呢?完全冇拉郁到對面球員嘅防守位置,純粹拖慢自己進攻節奏。

軒達臣嘅回轉同後傳,個人認為反應緊佢能力不足所造成嘅怯懦。因為護球能力不足、以及缺乏帶球過人能力;軒達臣根本唔敢正面面對的敵方球員,個波傳到佢腳下,佢就好似接到炸彈咁,只係想求其甩走個波。連少少勇氣都無,你有冇見過軒達臣好似韋拿杜姆咁箍波呀/或者好似法賓奴咁推過一兩個再出波?一次都冇。連VVD今場過人同向前傳送都比軒達臣多。

最後,軒達臣嘅走位真係好大問題。球球傳完就企側近。次次見親佢都係跟係自己個有波嘅隊友身邊,距離可能已有兩個身位。每次見親佢啲走位真係眼火爆,見到佢啲傳送直頭想死。今晚向前嘅長傳短傳,成功咗幾多球?隊友組織緊攻勢向前,佢就突然中斷節奏,無啦啦交返後...實在太多啦。

已經唔止唔喜歡軒達臣咁簡單,而係討厭同失望。踢得差唔係問題,但唔好踢到成個懦夫咁!真係好嘔心...有外國網民話:『軒隊今場係中場踢得最好,韋拿杜姆先踢得屎。』真心覺得佢就一對眼都裝住屎。

軒達臣廢呢件事已經唔需要再爭論,值得討論嘅係點樣處理軒達臣係球隊嘅位置而已。

中場-韋拿杜姆(6分)
上半場無影,下半場回覆狀態;助攻助守,勤力有餘、創作力略嫌不足。

中場-沙基利(6分)
奔走全場,表現合格。

前鋒-費明奴(7分)
雖然今仗bobby冇入波,但係前面無球走動,同埋墮後踢進攻第一點組織都做得好稱職,球遠射更加靚到爆。

前鋒-沙拿 (7.5分)
單刀赴會銅牆鐵壁、搏得十二碼、再冷靜操刀為球隊攻入全場唯一入球,助球隊全取三分。

前鋒-文尼 (6分)
代表利物浦上陣的第100場。可惜未能攻入入球助慶。

後備-占士米拿 (6.5分)
助攻助守,表現合格有餘。

後備-基達、奧歷治(N.A.)

『好攰呀,隊長...』

鍾意利記同埋唔鍾意利記嘅球迷,都可以入嚟下面個page一齊吹下水。講乜都得。


另外想睇我踩單車嘅遊記,都可以like我另一個Page:Steelpedaling。目前為止:馬來西亞。

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
  • kinfung
    kinfung 於 14/01/2019 評論 NO. 1

    軒達臣自從改踢防中之後一場比一場保守,佢同拉蘭拿已經冇能力係利記立足,隊長位一定要改人選,邊有理由全隊最廢個個做隊長,強烈建議改由vvd做正隊長;而且賣走軒、拉蘭拿同洛夫雲之後再買一個攻中、一個防中同一個中堅,感全隊就成形

  • AAL
    AAL 於 14/01/2019 評論 NO. 2

    樓上唔洗咁煩, 用你換高普就得啦.

  • kinfung
    kinfung 於 15/01/2019 評論 NO. 3

    樓上,哈哈請笑

  • kinfung
    kinfung 於 15/01/2019 評論 NO. 4

    樓上,哈哈請笑

快捷鍵:←
快捷鍵:→