【賽後簡評:白禮頓0-1利物浦】小勝止血 = 兩閘齊飛 x 沙拿單刀救主


今場白禮頓對利物浦的意圖好明顯,就係死守全場,搏有1分進帳。係1分為大前題下,今場白禮頓今場表現十分出色;防守快上快落,中場一甩波,就不停掩護後防;一對中堅Dunk同埋Duffy幾乎冇失過位同犯過錯,門將Button基本上亦冇乜可以挑剔嘅地方。只係可惜,Gross係禁區勾跌沙拿,被利物浦打破缺口。

雖然白禮頓防守好好,但係利物浦今仗即使係入波前,其實亦踢得好有耐性,只係延續咗上兩場嘅運滯。今仗白禮頓好明顯唔畀利物浦係中間做波,中間一有波就即刻收入去夾;只係有得必有失,兩邊變相釋放出更多空間比利物浦。而今場入球前最有威脅嘅兩球,就係分別由左右閘係兩邊策動:

1)9分鐘,羅拔臣傳中、費明奴門前兩碼食唔應個波
2)26分鐘,TAA右邊出個靚嘅過頭波、沙基利升高頂中貼左邊柱邊出界...

兩球組織都靚,可惜兩球都欠運;好彩,下半場憑沙拿單人扭入禁區,博到12碼,打破缺口。

打開咗破口之後,其實利物浦有多次機會;費明奴嘅遠射、韋拿杜姆禁區頂接應嘅抽射...可惜同樣欠運,未能拉開紀錄。

防守方面,今場整體來講叫做不過不失。頭60分鐘都冇乜受到考驗,之後面對白禮頓一輪急攻,仍然站得住陣腳。但係法賓奴個位兩三次走漏人,好彩都係啱啱好越位,但已經嚇死一班利迷。

整體黎講,今場利物浦嘅比賽,小弟十分滿意。雖然只係小勝1:0,但係係面對大巴嘅時候仍然能夠冷靜搵缺口;而且雖然只係小勝1:0,但今場利記嘅進攻其實相當立體。係連輸兩場後,今場嘅勝仗會係非常好咁幫我哋止血。

至於其他球員嘅個人表現,會係陣間篇文逐一評分,密切留意。

最後,係係小勝白禮頓後,我哋有7分榜首優勢,睇狼隊頂唔頂得住曼城啦!狼之報恩part2?

鍾意利記同埋唔鍾意利記嘅球迷,都可以入嚟下面個page一齊吹下水。講乜都得。

另外想睇我踩單車嘅遊記,都可以like我另一個Page:Steelpedaling。目前為止:馬來西亞。

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
  • 白禮頓海鷗香港球迷會 BHA Hong Kong Fans Club
    白禮頓海鷗香港球迷會 BHA Hong Kong Fans Club 於 13/01/2019 評論 NO. 1

    係白禮頓把握力差d....

  • kinfung
    kinfung 於 14/01/2019 評論 NO. 2

    樓上講到你地把握力好啲就會贏感喎,睇下邊個攻勢多啲先啦

快捷鍵:←
快捷鍵:→