【走過球迷大地】- 德國篇 精選

德甲終於開波，咁啱多蒙特第一場就係對慕遜加柏，就令我諗起上年睇多蒙特對慕遜加柏！

話說洛迪高係多蒙特球迷，上年3月，我趁去德國旅行嗰陣，仲特登去咗多蒙特市！。睇波緊係少不免喇！

仲記得第一日去到，喺當地時間3月14日嘅夜晚，啱啱到宿舍嘅我去超市買水前，換咗一件多蒙特球衣。行行下前面有兩個男士對住我大叫「Dortmund！Dortmund！」經過一輪溝通後，原來對方都係多蒙特球迷，傾完一輪波經，臨分開前佢哋仲熱情咁講希望可以喺球場內見到我（因為我同佢哋講，我要喺場外買黃牛…）。
足球氣氛好濃厚！

第二朝，即係3月15日，比賽之前我決定先到市內嘅多蒙特球迷專賣店行下，點知店舖一開工，已經有唔少fans一擁而入。其實一路走來，已有唔少多蒙特fans在街上唱歌搖旗準備出發到球場，令本來好靜嘅朝早都不時有歌聲傳出。我最後都用咗成九十幾蚊歐元買咗件韋丹費拿

試身室塊簾

同朋友會合後，就馬上出發到球場－多蒙特主場（西格納伊度納公園， Signal Iduna Park，不過我都係中意佢舊稱，西法倫球場，（Westfalenstadion）。當日係多蒙特同慕遜加柏嘅普魯士打吡（兩間球會名稱之前嘅Borussia其實係普魯士嘅拉丁文）。

其實，筆者當時並沒有波飛！因為喺港發現外國網上門票銷售網站所賣嘅波飛太貴喇，所以一早就打算到球場碰碰運氣。無錯，即是要買「黃牛」！當然球場附近已有很多「黃牛黨」，由於我的朋友們唔打算入場睇波（因為他們早已試過入場滋味。），所以我只需要買一張飛，其實唔難找到。經過一番詢問後，筆者成功以80歐元的價格，購入原值43歐元的門票，結果我同我朋友們都覺得「物超所值」呢。
我張黃牛呀！

唔係運犯，而係作客嘅慕遜加柏球迷要由警方護送入場（話晒大區打吡喎）

一入場，發現「出事了！」座位旁邊有好多慕遜加柏的球迷！其實那個區域並非所劃定的作客球迷區，只是有太多作客球迷透過網上和黃牛買門票，致令我處於相當尷尬的境地…

呢區係作客球迷區，但我果面都好多作客球迷…

喺我身邊嘅係一個慕遜加柏肥佬球迷，去到唔記咗幾多分鐘，慕遜加柏入第一球，個肥佬球迷即刻彈起身，擰轉身想攬我，不過一見到我著住多記波衫就即刻扮無事…

最近距離…
之後慕遜加柏入埋第二球，佢又彈咗起身，點知突然上面有人扔啤酒，搞到我哋兩個濕晒，到最後我都係俾張紙巾佢，總算friend咗野喇。之後下面又有慕遜加柏同多記球迷鬧交，仲差啲開波。

差啲打埋！

到最後多記破蛋，終於到我彈番起身！同後面僅有嘅兩三個唔識嘅多記球迷擊掌，但最後都係追唔番。
完咗場緊係散水，原來我兩個朋友去咗球場外隔離一堆酒吧睇波，最後都係同成班球迷迫地鐵走人。不過成場氣氛真係好正，尤其望到多記著名嘅西看台係咁跳都好震撼！而且一開頭仲有成個鐘先開波，多記球迷已經係咁唱"You'll never walk aone"，慕遜加柏球迷又會大唱打氣歌，真係好正！不過最衰贏唔到喇…

西看台緊係壓軸啦！

歡迎大家上黎世界波一齊講下波，風花雪月一番
你嘅LIKE係我地嘅原動力
https://m.facebook.com/hereisworldball