【走過球迷大地】- 日本篇

世界波 於 14/07/2015 發表 收藏文章
每一個球迷心裡都想親身去到自己支持的愛隊所在地,觀看一場愛隊的主場比賽,與其他支持者奮力尖叫打氣。奧脫福、晏菲路、安聯、魯營、班拿保、聖西路……每一個都是球迷心目中的聖地。

不過未必每位都有機會到外地觀看球賽,所以今次我們『世界波』邀請了特約撰稿員 – 「哥斯拉」為大家分享一下他在日本觀看J-League的所見所聞。

除了圖片,大家也可以從影片中感受一下不同國家對足球的熱情。

以下內容為特約撰稿員「哥斯拉」第一身角度直擊:

當我買咗去日本機票嘅時候,第一時間check嘅唔係酒店,唔係景點...... 而係J-League係咪仲踢緊!!
最後,幸運地能夠欣賞一場J2賽事 ( 京都不死鳥 vs 橫濱FC )同另一場J1賽事 ( 橫濱水手vs鹿島鹿角 )。
J2個場波我係開波前一晚係Lawson(日本便利店)買嘅。而J1果張就係託個日本朋友買嘅。由於佢都會入場睇,而佢鄉下亦都係鹿島果邊,所以當佢問我想要咩位個時,我緊係選鹿島球迷區。

比賽當日,一係西京極站(京都不死鳥主場)落車就已經見到好多人著住紫色波衫,而我就跟住紫色人群行到黎球場。入場前,就會見到專賣主隊紀念品(eg波衫頸巾鎖匙扣等)嘅攤檔同日式小食店。

開頭仲諗住J2應該好似港甲咁無咩人睇,開波前一晚買飛都未遲。但原來都幾多人入場。
而我都唔執輸拎左本場刊,入面有哂球員資料同之後既對賽日期,好細心好sweet。

開波前兩隊球迷區既球迷已經唱哂歌fing哂旗開party咁,而黎自橫濱嘅客隊球迷雖然大概只有50人,但打氣聲已經嘈到坐對角嘅我都聽到。入場嘅都有唔少小朋友,亦都有老一輩嘅球迷,但最估唔到係連後生嘅日本少女都不是小數目。

由於我係自己一個人入場,所以我選左個比較正中,離球迷區較遠既坐位,靜靜咁欣賞唔場波,睇氣氛就決定留番J1果場!
最後主隊京都不死鳥以1 : 2輸左比橫濱FC。


之後終於黎到我比較期待嘅呢場波,就係J1嘅橫濱水手vs鹿島鹿角。
坐係作客鹿島球迷區嘅我著左件紅色衫入場,而我亦都同朋友買左條鹿島鹿角頸巾,原來除左裝飾仲好有用。

雖然鹿島係作客,但入場嘅球迷都好多,球迷區都幾乎爆滿。
而作為主隊嘅橫濱當然唔會輸蝕,球迷打哂鑼打哂鼓,唱歌又唱得大聲,大聲到基本上成個場都聽到佢地唱咩(如果你識日文嘅話)。 加上佢地跳黎跳去,你真係會feel到個場地係係到震緊。

到球員正式入場,所有作客球迷高舉屬於自己球隊嘅頸巾,氣勢十足。
開波後,球迷都會繼續唱歌。雖然我唔識日文,但其實好多歌詞都包含「Kashima」(即鹿島),後尾聽到熟哂自己都可以跟住嗌。
先開紀錄嘅係鹿島鹿角,坐我旁邊嘅阿叔,同後面一家大細都不約而同咁狂「fing」頸巾,我諗呢個可能係佢地入波之後嘅例牌慶祝動作。

結果,鹿島鹿角以3 : 0擊敗橫濱水手。


睇左兩場日職我發現就算自己捧嘅球隊就算交失波,射出界,球迷們都唔會指罵球員,更多嘅係抱頭概嘆。
換著香港嘅阿叔......可能係會指住個球員係到鬧…..
整體黎講,日職嘅氣氛真係非常之正呀!!!


歡迎大家上黎世界波一齊講下波,風花雪月一番
你嘅LIKE係我地嘅原動力
https://m.facebook.com/hereisworldball

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
  • Tsoi Kwok Tung
    Tsoi Kwok Tung 於 14/07/2015 評論 NO. 1

    致筆者,如果你能埋到球迷組織堆你會覺得更正。小弟去年有幸去川崎睇川崎前鋒對大板飛腳,有幸埋佢地既球迷組織川崎華族堆,仲同佢做左朋友。今年再去可同佢地一齊幫手係球賽前入球場掛banner, 同佢地一齊幫球隊打氣,真係好難忘

  • Koma Chan
    Koma Chan 於 14/07/2015 評論 NO. 2

    5月去左橫濱主場睇橫濱對大阪,氣氛超級正

  • ErikoB Sanada
    ErikoB Sanada 於 14/07/2015 評論 NO. 3

    講真,j leuage 氣氛勁過英超,西甲。應援團唱歌唱全場👍

  • 世界波
    世界波 於 14/07/2015 評論 NO. 4

    To Tsoi Kwok Tung:之前我係某討論區,見到有人去睇川崎前鋒比賽,仲見到中村憲剛佢哋,仲埋球迷會堆,唔知係咪你呢?其實筆者都好想埋架,唔知到時點樣可以認識到佢地呢?日本球迷同球迷,球迷同球會、球員之間嘅羈絆真係好令人著迷,佢地好全心全意,筆者十分欣賞,都好想參與其中!

  • Jackie Chung
    Jackie Chung 於 14/07/2015 評論 NO. 5

    其實香港球會都可以效法日職,將睇波變成一個親子活動,咁第時仔女話要去踢波,家長都會明白喇同支持喇。

  • Tong Kinlam
    Tong Kinlam 於 14/07/2015 評論 NO. 6

    4月尾去睇過一場川崎前鋒主場對甲府風林,甲府風林哥場輸0:3,d客場球迷由頭唱歌跳舞到最尾,輸到0:3都無停過

  • Jackal Chen
    Jackal Chen 於 14/07/2015 評論 NO. 7

    上年睇過大阪櫻花vsFC東京,唔知係因為打風定係大阪櫻花果年踢得太差,成個場坐得2-3成

  • Zinko Li
    Zinko Li 於 14/07/2015 評論 NO. 8

    我只係睇過j2,雖然唔多人入場,但都好好氣氛

  • Kengo Tsoi
    Kengo Tsoi 於 14/07/2015 評論 NO. 9

    比賽氣氛可以咁好,全頼球迷同職員的付出,早上6,7點就已經於球場集合準備,佈置球場,我經常講,佢地係好特別,愛自己球隊大於一切,連球隊青年軍比賽都會去睇去支持。好支持自己居住地區所有,香港真係唔會做到。
    補充:與川崎前鋒打氣團相識,一齊佈置預備比賽後之感想

  • Kengo Tsoi
    Kengo Tsoi 於 14/07/2015 評論 NO. 10

    此乃當時入場贈品,每人一包香蕉

  • Kengo Tsoi
    Kengo Tsoi 於 14/07/2015 評論 NO. 11

    球迷同球會職員一手一腳搬幾百箱香蕉,球迷係自發朝早就到球場幫手

  • Kengo Tsoi
    Kengo Tsoi 於 14/07/2015 評論 NO. 12

    至於球隊打氣之氣氛就由依幾個人負責,一個MC帶頭決定晿咩歌跳定拍手定揮手,然後鼓手打番果個beat,再用手勢指示其他角落之領袖唱幾多次,默契好好

  • Chung Chi Sum
    Chung Chi Sum 於 14/07/2015 評論 NO. 13

    上月橫濱水手對鹿島鹿角,坐唔滿,但氣氛👍🏻👍🏻

  • Terry Punny
    Terry Punny 於 14/07/2015 評論 NO. 14

    其實想感受氣氛,近近地去廣州睇恒大,肯定有氣氛過j league

  • Joey Chung
    Joey Chung 於 15/07/2015 評論 NO. 15

    上月尾去左神戶睇波
    賽前場外有好多唔同嘅小食檔
    比賽期間 球迷打氣又齊心又一流
    日本人仲要好多係一家大細去睇
    好似d親子活動 好值得港超聯學習

  • bigmoon
    bigmoon 於 15/07/2015 評論 NO. 16

    今年3月自己去睇左場日皇盃,鳥棲對松山,氣氛勁正👏雖然又落雨又大風加上得10幾度氣溫,但球迷依然落力打氣,不過去便利店買飛睇唔明,都唔知㨂左咩位,去左主場球迷區應該,check飛條友見我游客應該先比我入😊

  • 蔡國西
    蔡國西 於 15/07/2015 評論 NO. 17

    上星期睇川崎前鋒對多蒙特,朝早7點幫手掛banner

  • 蔡國西
    蔡國西 於 15/07/2015 評論 NO. 18

    川崎前鋒既感謝祭,參加完呢個感謝祭就可以完全體會到球員同球迷係零隔膜,可以好親密,好近距離。
    注:此活動要入左後援會先參加得

  • 蔡國西
    蔡國西 於 15/07/2015 評論 NO. 19

    感祭當日中村憲剛所影既大合照

  • 蔡國西
    蔡國西 於 15/07/2015 評論 NO. 20

    想感受下球員同球迷可以有幾近距離,同球員近距離接觸仲可以去睇佢地操練

  • Anthony Lo
    Anthony Lo 於 15/07/2015 評論 NO. 21

    去過飛腳同三箭主場睇波
    返唔到轉頭
    企足跳足嗌足120分鐘 (開波前後都會架)
    每次去日本都會睇場波 (Y)

  • betotang
    betotang 於 15/07/2015 評論 NO. 22

    我自已係紅鑽球迷,由零八年開始支持到而家,去過五、六次主埸睇,紅鑽球迷真係好熱血,曾經有外國網站講過紅鑽球場迷排名排前十

  • Benley Cheung
    Benley Cheung 於 16/07/2015 評論 NO. 23

    請問有咩方法check到比賽時間同日期?

快捷鍵:←
快捷鍵:→