【球壇打工仔】 - I have a dream...

勁好波 於 21/07/2015 發表 收藏文章
"You may say. I'm a dreamer, but I'm not the only one."
John Lennon - Imagine

轉會時期,相信大家最常聽到的說話,就是「為XX效力是我的夢想。」新老細同新球會Fans聽到當然開心啦,但係為咗打份工擦鞋,咩都講得出架嘛,唔可以盡信,所以而家世界波同大家回顧下部份球壇Dreamer,仲同大家分析佢哋可信度。因為球壇有太多夢想,所以今次只會寫住5個先,大家都可以提議我哋寫邊個架!

1. 舒韋恩史特加
“One last dream in my career come true. I am excited about the next chapter in my life with Manchester United.”
「我足球生涯最後一個夢想已經達成,我很高興可以在曼聯開啟新的一頁。」
小豬係拜仁青訓,講話效力曼聯係夢想似乎無咩可信性?
不過睇下呢張相:

左面就係小豬喇!再加上小豬曾經講過兄弟係曼聯球迷,仲成日叫佢加盟曼聯,潛移默化之下影響到都唔出奇

可信度:75%
願望成真!

2. 韋菲特邦尼
夢想家都有畀人笑嘅時候!曼城前鋒韋菲特邦尼就係其中一個!
今年冬季轉會窗離開史雲斯,加盟曼城嘅科特迪瓦前鋒,喺轉飯鑊之後接受訪問,話夢想踢曼城已經想咗15年喇!
15年咁耐?忠實擁躉喎,不過就有人話:「曼城15年前仲踢緊乙組。」(98-99年踢英乙,99-00年踢英甲)
如果邦尼講嘅野係真嘅,佢相信係曼城嘅No. 1 Fans!

98-99賀升班…升英甲…

可信性:10%

曼城No. 1 Fans

3. 林拔
林拔嘅勵志故事唔洗再多講。喺英格蘭各級聯賽都入過波嘅佢,由細都到大響晒朵係利物浦Fans,仲踢過利記青年軍!

佢仲係利記青年軍贏過獎盃!

佢輾轉去到修咸頓,仲踢到有聲有色,引嚟利記決定收購佢!當時佢已經係32歲,所有人都覺得佢出場時間會大幅減少,都認為佢去利記唔係一個選擇,但林拔都義無反顧照去可也,仲話達成咗「童年夢想」!縱使第一季上陣時間的確較少,但佢都無諗住離開!

可信性:100%

4. 艾達杜蘭

艾達杜蘭嘅故事就複雜啲,出生自加拉塔沙雷青訓嘅佢,喺15歲嗰陣仲喺加拉塔沙雷對巴塞隆拿嘅比賽做過球僮!巴塞官網就話果場波艾達杜蘭仲四圍問巴塞球星拎用品留念。
果場波邊個入波?安歷基,現任巴塞教頭果個呀!


仲有咩證明去巴塞真係杜蘭嘅「夢想」?巴塞有轉會禁令,轉咗會都要到下年1月先註冊到,同埋條款仲話巴塞選出嘅新主席(啱啱選咗),如果唔鍾意杜蘭,可以即時退貨!咁都去,仲唔係愛巴塞!

可信性:90%

5. 雲佩斯
大家睇下呢張相先:

由飛燕諾轉會阿仙奴時,自稱係阿仙奴第一風扇,不過效力兵工廠8年後,一「我心中嘅小男孩叫我去曼聯!」就轉會曼聯了…當時仲著埋20號波衫話想幫曼聯20奪英超冠軍…成功之後仲話同曼聯一齊贏冠軍係達成夢想。
前年莫耶斯帶領曼聯做7弟之後,VPS仲誓神劈願話下季曼聯會反彈!
本來可信性冇100%都有90%架喇,點知佢啱啱由曼聯轉會費倫巴治,就話雲加同阿仙奴常在佢心,可信性減番一半先喇…

可信性:45%

效力邊隊先係你夢想?

太多人太多夢想,未能盡錄。唔知講起「效力XX是我的夢想。」呢句說話,你哋又諗起邊位(啲)球員呢?

歡迎大家上黎世界波一齊講下波,風花雪月一番
你嘅LIKE係我地嘅原動力
https://m.facebook.com/hereisworldball
標籤: 足球  轉會  夢想  

留言


請按此登錄後留言。未成為會員? 立即註冊
    快捷鍵:←
    快捷鍵:→