財務報表分析(6) - 薪酬支出與成績優劣的關係

足球財經 於 07/05/2019 發表 收藏文章
一連幾集同大家分析咗各大球會嘅主要收入來源,今集開始講吓一間球會嘅主要支出。

隨住球員議價能力越嚟越高,傳媒經常都會報導球員週薪點樣再創新高,又或者球員係傾續約時就薪金問題同球會拉鋸,可想而知薪金開支對一間球會嘅重要性。另一方面,近幾年不時都聽到有球會因為財政問題陷入經營困難,甚至面臨破產風險,球會點樣控制成本之餘,又保持球隊嘅競爭力,自然係管理層一大課題。

首先睇吓2017/18 球季20支英超球會薪金支出佔總營業額嘅比例。根據歐洲足協嘅指引,如果超過70%就屬於唔健嘅水平。可以發現,熱刺喺呢方面零舍比另外19隊明顯地低,連 40% 都唔過,雖然一方面可以話係非常之健康,但係另外一方面亦都可能反映熱刺對球隊深度嘅投資不足,令到熱刺始終未能夠成為爭標常客。而且,隨住熱刺近年成績不斷進步,不斷都有傳聞指熱刺幾位最大牌球星都要求大幅度加薪,睇嚟熱刺未必可以長期維持係呢一種低薪酬支出嘅水平。


至於另外五隊 Big 6, 薪酬比率都係介乎50%-61%, 反而中游有四隊(愛華頓、李斯特城、水晶宮、般利茅夫)同包尾四隊都超過70%嘅水平。Big 6 受惠參加歐洲賽嘅收入,自然有較高嘅收入水平佢之前薪金支出。但係其他冇份參加歐洲賽球隊,而又想用較高薪金去爭取成績,自然就會面對較高嘅薪酬比率。

但係唔係俾得高人工就一定會有好嘅成績呢?我哋可以嘗試用統計學上嘅線性回歸手法(linear regression),將每一隊嘅薪金支出與及聯賽所得積分劃成以下嘅圖表,然後用線性回歸手法搵出兩者有幾大關連性。


從圖表上嘅R-Squared 值,可以見到喺17/18球季,球會喺聯賽積分同薪酬水平嘅高低,有成 74% 嘅關連,都算係幾高。當然,錢唔係萬能,曼聯喺成個英超薪酬最高,都唔一定贏到冠軍(今季就更加唔好提...),而李斯特城亦都可以創造奇蹟。事實上,大家可以睇到熱刺同般尼都稱得上以蔗渣嘅價錢踢出燒鵝髀嘅味道,而降班嗰三隊,亦其實比新升班嘅白禮頓同哈德斯菲嘅開支高。

不過,大家亦都知道,李斯特城同般尼嘅佳績都只係維持到一季,畢竟今時今日唔少球員踢咗一季好波就會俾大球會高薪挖角,中小型球會往往一季之後就會打回原形。長遠嚟講,喺英超似乎都係有錢大晒,要打破 Big 6 嘅壟斷局面,睇怕唔係咁容易。

順帶一提,一般解僱員工時支付嘅賠償金,都會歸納為薪酬支出嘅一部分,並且通常會分別披露。喺度同大家分享一下車路士,曼聯同利物浦三隊自 2007/08 球季起,因為解僱領隊同教練團隊而付出嘅賠償金:



各位想更多足球界嘅財經新聞,可以like 足球財經嘅 Facebook page!

留言


請按此登錄後留言。未成為會員? 立即註冊
  • Patrick Au-Yeung 於 11/05/2019 評論 NO. 1

    你好,多謝糾正,只係兩會之前經常加價,想搵佢地突顯哈軍班主嘅慷慨
    Btw,你都係SJC?

快捷鍵:←
快捷鍵:→