財務報表分析(5) - Big 6 以外的收入結構

足球財經 於 29/04/2019 發表 收藏文章
之前幾集同大家睇過英超 Big 6 各隊嘅收入分佈,今集同大家睇埋其餘14隊嘅情況。


Big 6 球隊雖然多數都有歐洲賽收入,但同時亦都有較多嘅贊助商,與及容量較大兼入座率較高嘅主場。因此,即使電視播映收入佔整體比率較高,另外兩項收入都唔相差得太遠。


其餘14隊對電視播映收入嘅依賴就高得多,平均佔整體收入超過 78%, 最厲害嘅般利茅夫甚至佔超過 88%, 反而比賽日收入所佔嘅比率,有10間球會都唔夠10%.


從以上嘅數據,可以得出以下嘅結論:
Big 6 與其他球會收入水平差天共地
Big 6 之中收入最低嘅熱刺(£380.7m),比第七位嘅愛華頓(£189.2m)都多超過一倍。參與歐洲賽固然為Big 6 球隊帶來可觀收入,但連帶商業收入 Big 6 都領先一大截,其他球會要追上並唔容易。

不過同一時間,Big 6 以外嘅英超球會收入都比唔少歐洲大陸嘅球會高。根據國際四大會計師行之一嘅德勤喺 2019 年1月發表嘅 Football Money League 報告,喺 2017/18 球季,全球收入最高嘅30 間球會當中,英超就佔咗13席,連無歐洲賽踢嘅韋斯咸同紐卡素都比當季意甲亞軍拿玻里排得更高。箇中原因,基本上係因為英超轉播權合約價值,比起其他歐洲聯賽都要高。

中小型球會極度依賴英超電視播映收入
之前講電視播映收入時同大家睇過,即使係包尾嘅西布朗,都從英超電視收入分到 £95m. 非Big 6 球會一般受球場容量限制,亦唔能夠吸引巨額贊助。雖然英超歷年來每三年簽新嘅播映權合約都可以提高叫價(尤其係海外播映權),但假如將來英超嘅吸引力減弱,或者面對其他聯賽(如西甲、意甲等)競爭而令播映權費用減低,相信非Big 6 球會受到嘅影響會比Big 6 更大。

而喺現行制度下,播映權合約係由英超賽會談判,球會處於較為被動嘅地位,無乜空間去影響談判結果。而擴建或者搬遷球場涉及費用龐大,仲需要較長時間先回到本。球會除咗更積極尋求商業贊助之外,似乎就只能靠平買貴賣好駛好用嘅球員,先有機會同 Big 6 競爭。

留言


請按此登錄後留言。未成為會員? 立即註冊
    快捷鍵:←
    快捷鍵:→