財務報表分析(7) - 球員買賣

足球財經 於 13/05/2019 發表 收藏文章
上一集同大家睇過英超各隊嘅薪酬支出與及薪酬水平高低同聯賽成績嘅關係,今集講埋另一項主要支出 - 球員交易喺財務報表上點反映。

大多數歐洲頂尖球會最大嘅使費,通常都係收購球員所支付嘅轉會費。今時今日一個球員閒閒地都成幾千萬甚至過億英鎊,仲有一班勢力越嚟越大嘅球員經紀從中收取巨額嘅收費,但原來喺球會嘅財務報表中,唔係話俾五千萬鎊簽咗個球員,嗰一刻就記錄五千萬鎊嘅”支出”咁簡單。要從財務報表了解球會嘅球員買賣,就必須要先了解喺會計制度下,一單球員轉會交易係點樣記賬。

唔少企業都標榜”人才係公司最重要嘅資產”,呢句說話對一間球會理論上更加適用,但係大家要了解,而家社會唔再有奴隸制度,球會其實並唔係買緊一個”人”,而係買緊呢個人某段指定時間嘅”註冊權”,從而令嗰名球員喺期內只能為持有佢註冊權嘅球會效力同衍生經濟利益。而有趣地,喺會計上球員註冊權係歸納為”無形資產” (intangible asset). 的確,某啲大牌球星有時喺場上都真係幾”無形”!

接住落嚟我哋用數字模擬唔同嘅交易條件,對財務報表有乜嘢影響(所有例子假設交易日為 1/7/2019, 球會年結日為每年30/6) (如果想跳過會計入賬嘅手法,可以直接跳去第二頁)

例一:球會以£50m購入球員,簽下五年合約,轉會費全數立刻支付。球員效力五年後約滿離隊。
球會喺交易當日支付全數£50m現金,同時記錄同一銀碼球員註冊權資產。而喺損益表上,會按照球員合約年期將轉會費平均攤銷 (amortise),即係打後五年每年記錄 £10m (£50m/5年)開支。球員效力滿一年後,球員註冊權賬面值變成 £40m, 兩年後變成£30m, 如此類推。球員離隊相等於清理註冊權資產,由於五年後賬面值已完全攤銷變為零,因此離隊唔會做成額外嘅賺蝕。

例二:球員收購條件與例一基本相同,唯獨轉會費改為一半 (£25m) 立刻支付,另一半一年後無條件繳付(現今球員轉會費日益上揚,分期付款安排逐漸常見)。
由於一年後清繳嘅£25m餘額並不取決於任何條件,因此唔影響例一中記錄註冊權資產及每年攤銷的方法,球會照喺交易當日記錄£50m註冊權資產,唯一分別係當日會另外記錄一筆應付賬 (accounts payable), 一年後清還。

例三:球員收購條件與例一基本相同,球員效力滿三年後(30/6/2022),由於表現理想,獲球會續五年約(即效力至30/6/2027), 並一次性支付 £5m 簽字費予該球員。球員最後於新約屆滿日離隊。
喺 30/6/2022簽新約前,呢位球員嘅註冊權經過三年攤銷,賬面值剩餘 £20m. 呢個時候支付嘅 £5m 簽字費,將會記錄為註冊權資產嘅增值,即係變成 £25m, 然後整筆數按新約剩餘年期攤銷,亦即係由當日起打後五年,每年攤銷 £5m.

例四:球員收購及續約條件與例三基本相同,但轉會費附帶額外條件,規定若球員為買方效力期間贏得聯賽冠軍,買方需額外繳付 £15m. 買方於第二年 (2020/21 球季)贏得聯賽冠軍。
同例二唔同,需額外繳付嘅£15m附帶不確定性條件。買方於交易當日未知將來係咪需要繳付呢筆款項,所以係交易日一樣只係會記錄£50m 註冊權資產,但會喺報表個附註露有一筆咁嘅”或然負債” (contingent liability). 去到第二年尾贏到聯賽冠軍之後,呢條數就要找,球會就好似上面例三一樣,增大球員註冊權資產帳面值,按照合約餘下年期攤銷。

例五:球員收購及續約條件與例四相同,但球會喺第五季(2023/24) 完成後,以£40m 出售球員。
會計上,會將出售球員註冊權作價同喺出售當日嘅帳面值相減,得出相關嘅賺蝕。喺呢個情況,球會會喺 30/6/2024 當日記錄 £19m 嘅盈利。留意當初球會以 £50m 買入球員,但經過幾季嘅攤銷,即使賣出價比當初買入價低,球會依然喺交易中錄得盈利,而唔係視為蝕咗£10m.

下一頁同大家分析各隊球員交易嘅數據!(請按此)

如果喜歡我們的文章,請即分享到︰

< 1 2 >
標籤: 曼聯  曼城  車路士  利物浦  阿仙奴  熱刺  轉會費  愛華頓  

留言

會員
我要評論
請按此登錄後留言。未成為會員? 立即註冊
  • Chun Kit Chow herman
    Chun Kit Chow herman 於 13/05/2019 評論 NO. 1

    wow gingg

  • mzm
    mzm 於 20/05/2019 評論 NO. 2

    以前啲 英超 啲球員 真正踢波 不是為錢 但現在英超變咗商業化 球員薪金 逐漸 膨脹 不是對球隊好 好快就會惡性循環 步後塵 以前意大利聯賽

快捷鍵:←
快捷鍵:→