修咸頓新贊助 唔止心口幾隻簡體字咁簡單!

足球財經 於 18/05/2019 發表 收藏文章
修咸頓日前公布一間名為樂動體育嘅中國公司,以破球會記錄嘅贊助金額簽約三年,成為球會新嘅主贊助商。未來三季修咸頓嘅波衫,心口將會展示樂動體育嘅簡體中文logo.
本來中資企業贊助英超球隊已經唔係乜嘢新鮮事,修咸頓自從2017年8月獲中國財團萊茵達集團主席高繼勝收購80%股權成為大股東,搵返中資企業贊助亦都正常不過。但係,今次修咸頓呢單贊助,竟然引起英國政經界嘅關注,究竟係乜嘢一回事?

話說樂動體育宣稱自己為一間體育媒體平台(咦喂,個字頭咁熟口面嘅),但係登入佢哋嘅網站,就只會見到一段片同幾張相講佢地成為修咸頓贊助商,其他資料一概欠奉 - 因為佢哋預計今年夏季先會正式登錄。

網站offthepitch.com 報導,沙爾福大學(University of Salford) 商學院嘅教授Prof. Simon Chadwick 指,喺實施外匯管制嘅中國,一般內地企業進行大額嘅海外投資都需要事先得到有關部門出嘅批文。樂動作為一間尚未正式開始營運嘅企業,都可以咁高調動用龐大嘅資金向外投資,Prof. Chadwick 估計,可能樂動甚至萊茵達背後同中國國家領導層有密切嘅關係 (呢位教授似乎都幾熟識國情喎!)

Prof. Chadwick 嘅估計未必毫無根據,《金融時報》喺四月份就曾經報導,萊茵達集團將旗下喺深圳上市嘅萊茵達體育其中29.9%股權賣俾成都國資委,一度令英超賽會以為中國政府企圖直接操控修咸頓而作出調查。

offthepitch.com 亦指出,修咸頓作為英國其中一個主要港口城市,擁有優良嘅基建設施,對英國對外貿易有舉足輕重嘅戰略地位,唔排除中國政府可能藉住對修咸頓球會嘅投資作為對其他投資項目嘅跳板。唔通又關一帶一路事?

呢幾年越嚟越多中資企業投資歐洲球會,但似乎除咗由香港上市嘅復星國際(0656.HK) 控制嘅狼隊今屆英超以第七名完成之外,其他由中資操控嘅球會成績都未見十分突出。修咸頓又會唔會效法西甲嘅愛斯賓奴咁引入中國球員,大家可以密切留意。

各位想追蹤更多足球界嘅財經新聞,可以like 足球財經嘅 Facebook page!

參考資料:
offthepitch.com, “Expert: Southampton’s record-setting sponsorship carries hallmarks of Chinese state influence” - https://offthepitch.com/a/expert-southamptons-record-setting-sponsorship-carries-hallmarks-chinese-state-influence

Financial Times, “Southampton Football Club quizzed on China stake sale” - https://www.ft.com/content/062b6338-5a1b-11e9-9dde-7aedca0a081a

如果喜歡我們的文章,請即分享到︰

標籤: 修咸頓  中國  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→