2018/19: 第33週陣容預告 – 又一個Blank Gameweek

FPL Guy 於 05/04/2019 發表 收藏文章
因為第32週用咗Free Hit,所以球隊陣容又瞬間變返做第31週咁嘅樣。用完Free Hit之後就只得1個免費轉會(Free Transfer),好彩球隊本身都有10名球員係喺第33週有比賽,咁即係今週嘅轉會只係專注於賣走1個喺今週冇比賽嘅球員,轉去買入1個喺今週有比賽嘅球員就得喇。順帶一提,筆者依家仲淨返3個法寶未用,包括:Bench Boost、Triple Captain同Wildcard。筆者打算之後連續3個比賽週都出法寶,分別係第34週用Wildcard,第35週用Bench Boost,然後第36週用Triple Captain。所以今週嘅轉會決定相對之前嚟講係冇咁難,因為唔洗考慮未來嘅賽程,只需要著眼於今週嘅比賽。咁依家就睇下筆者今週會點排陣啦。

由於距離截止時間都仲有一段時間,陣容都有機會因球員受傷情況或有關出場嘅消息而改變。預計陣容:4-4-2
本週陣容

球隊價值(Squad value): 99.8M剩餘資金(In the bank): 3.8M

轉會
賣出:阿古路(Aguero)
買入:華迪(Vardy)
原因:
雖然曼城(Man City)第35週都繼續一週雙賽,但係賽程就同第31週嘅情況恰好相反,兩場分別都要硬撼Big 6球隊,分別係對熱刺(Spurs)同曼聯(Man Utd)。再加上佢嘅傷情未明,都唔知佢第34週有冇機會上陣嘅情況下,就賣咗佢先喇,買入李斯特城(Leicester)嘅華迪(Vardy)。咁睇中華迪,當然係李斯特城嘅對手哈特斯菲爾德(Huddersfield)同佢嘅狀態啦。哈特斯菲爾德暫時排榜尾,兼已經篤定降班,理應冇晒戰意嫁喇,再加埋佢哋全季失咗59球,係英超第三多。哈特斯菲爾德近4場狂失9球,照咁睇狀態非常好嘅華迪應該都唔難取得入球。華迪近4場交出4入球1助攻,狀態火熱,令到我都寧願揀佢做隊長,都唔揀沙拿(Salah)同夏薩特(Hazard)。前者已經錄得6場嘅入球荒,後者就狀態極度唔穩定。

守門
保路錫(Boruc
今場般尼茅夫(Bournemouth)會主場對般尼(Burnley),兩支球隊嘅近況都麻麻。般尼近4場錄得1勝3負;而般尼茅夫就錄得1勝1和2負。不過都唔好睇小般尼嘅入球能力,佢哋近4場入咗6球,而般尼茅夫就近4場只得1場不失球,希望今場般尼茅夫能夠保持清白之身啦。

後衛
彭利拿(Pereira)
今場李斯特城(Leicester)會作客對已篤定降班嘅哈特斯菲爾德(Huddersfield),兩支球隊嘅近況真係差天共地,哈特斯菲爾德近4場全敗,而李斯特城就近4場錄得3勝1負。哈特斯菲爾德近4場只係得1場有波入,攻力疲弱。雖然李斯特城近4場只係得1場冇失波,但係近4場只係失咗4球,防守已經有進步,希望佢哋今場對住暫時今季聯賽入球最少嘅球隊可以唔失波啦。
阿歷山大阿諾(Alexander-Arnold)& 羅拔臣(Robertson)
今場利物浦(Liverpool)會作客對修咸頓(Southampton)。兩隊嘅近況都唔錯,修咸頓近4場錄得3勝1負,而利物浦近4場就錄得3勝1和。修咸頓近4場攻入7球,攻力唔差,其中一場仲贏過熱刺添,佢哋為護級真係搏到盡。利物浦嘅防守就一般喇,近4場失咗4球,希望佢哋為咗英超冠軍可以做好防守,唔失波啦。
舒哈(Schar)
今場紐卡素(Newcastle)會主場對水晶宮(Crystal Palace),水晶宮近4場錄得2勝2負,表現不過不失。而紐卡素近4場就錄得1勝1和2負,表現普通。水晶宮近4場攻入6球,攻力絕對不容忽視。紐卡素近4場失咗8球,防線大穿窿,希望停賽刑滿復出嘅舒哈能夠令紐卡素嘅防守有改善啦。

中場
沙拿(Salah)
沙拿近排狀態非常低迷,已經連續6場入球荒,近4場只係交出咗2個助攻。修咸頓近4場只係失咗4球,防守並唔弱,但都希望佢盡快打破入球荒啦。
辛迪加斯(Snodgrass)
今場韋斯咸(West Ham)會作客對車路士(Chelsea),車路士近排嘅狀態回升,近4場錄得2勝1和1負。而韋斯咸嘅狀態都唔係好輸蝕,近4場錄得2勝2負。車路士近4場只係失咗4球,要攻入佢哋嘅大門都唔容易。不過,比較擔心嘅係辛迪加斯嘅上陣時間,佢近4場只係正選上陣過3場。但係喺呢3場入面都交出過1個助攻,算係幾好喇。希望佢今場會有正選啦。
李察利臣(Richarlison)
今場愛華頓(Everton)將會主場硬撼阿仙奴(Arsenal)。愛華頓要小心喇,阿仙奴近4場錄得3勝1和嘅佳績,表現好好。而愛華頓近4場就錄得2勝1和1負,表現其實都唔差。阿仙奴近4場只係失咗2球,防守好好,李察利臣要入佢哋波都唔易。李察利臣近4場交出2個入球,表現都唔錯,希望佢都繼續入波啦。
夏薩特(Hazard)
今場車路士將會主場迎戰韋斯咸,韋斯咸近4場失咗7球,防守唔算太好。夏薩特近4場交出2入球1助攻,表現唔錯,希望佢今場都會好似上場對白禮頓咁既入到波又交到助攻啦。

前鋒
華迪(Vardy)- Captain
上面嘅轉會原因都交代得好詳細,所以都唔再重複多講喇。
威爾遜(Wilson)
威爾遜近4場只係踢咗3場,交出1入球1助攻,表現有少少回落。不過,般尼近4場失咗9球,防守麻麻,希望威爾遜今場能夠重拾射門鞋啦。

如果你鐘意呢個專欄,請不忘訂閱呢個專欄同讚好我個專頁:https://www.facebook.com/fplguy1905/

如果喜歡我們的文章,請即分享到︰

標籤: Fantasy Premier League  FPL  英超  足球  Football  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→