2018/19: 第33週陣容總結 – 僅得10人應戰

FPL Guy 於 09/04/2019 發表 收藏文章
唉……今週嘅Blank Gameweek同之前一樣都係湊唔夠11個人出戰,理想同現實總係有落差。不過,好彩嘅係揀啱咗隊長,因為華迪(Vardy)係今週最高分嘅球員,同夏薩特(Hazard)一樣都係拎到16分。筆者今週嘅得分亦比平均分高出一倍,算係一個成功嘅Blank Gameweek,總排名亦都升咗接近1萬名,距離目標頭1萬名又近咗。咁依家就睇睇今週筆者嘅陣容踢成點先啦。
本週陣容

守門員
保路錫(Boruc)—0分
今場般尼茅夫(Bournemouth)主場以1比3不敵般尼(Burnley)。雖然般尼茅夫輸咗波,但係保路錫就冇正選踢,冇得出場。

後衛
彭利拿(Pereira)—6分
今場李斯特城(Leicester)作客以1比4大勝哈特斯菲爾德(Huddersfield)。李斯特城今場喺控球同射門次數方面都佔優,控球率達55%,全場錄得18次射門,當中有一半嘅射門都係能夠命中目標。喺下半場初段,彭利拿喺右路傳中搵到遠處入楔嘅華迪,成功交出1個助攻。不過,好可惜,因為一個誤判,令到李斯特城輸咗個十二碼,而未能保持不失球。彭利拿嘅表現唔錯,所以都拎到1分bonus,今週總共拎到6分。
阿歷山大阿諾(Alexander-Arnold)—4分
今場利物浦(Liverpool)作客以1比3反勝修咸頓(Southampton),今場利物浦不論係控球同射門都佔優,控球率高達67%。利物浦全場錄得17次射門,不過只係得5球中龍;而修咸頓全場錄得11射1中,就已經入到1球。阿歷山大阿諾嘅表現唔錯,今場收穫一個助攻,成功助攻基達(Keita)。不過,可惜佢只係踢咗58分鐘就被換出,未能夠拎足2分嘅出場分。所以今週佢只係拎到4分。
舒哈(Schar)—2分
今場紐卡素(Newcastle)主場以0比1不敵水晶宮(Crystal Palace),雖然紐卡素控球同射門都贏晒,但都係贏唔到。紐卡素全場嘅控球率達到54%。紐卡素全場錄得18射5中,而水晶宮就只係錄得3射1中,就已經入1球。水晶宮嘅入球係嚟自十二碼。
羅拔臣(Robertson)—1分
羅拔臣今場嘅表現只係普通,全場只係交出1次關鍵傳送。另外,佢仲因為拎咗1張黃牌而被扣1分,所以今週只係拎到1分。

中場
沙拿(Salah)—6分
沙拿今場終於終止咗佢嘅入球荒,佢今場嘅表現都唔錯,雖然全場錄得2射1中,但就已經收穫1個入球。佢入球後亦都因為太興奮而除衫慶祝,導致拎咗1張黃牌而被扣1分。所以佢今週係拎到6分。
辛迪加斯(Snodgrass)—1分
今場韋斯咸(West Ham)作客以0比2不敵車路士(Chelsea),今場韋斯咸嘅控球率比車路士略為少少少,達到45.6%。不過,佢哋嘅射門次數就較少,全場錄得9射2中,而車路士就錄得16射7中。雖然辛迪加斯係下半場先上場,但都交出2次關鍵傳送,算係唔錯。可惜佢只係踢咗45分鐘,只係拎到1分。
李察利臣(Richarlison)—3分
今場愛華頓(Everton)主場以1比0小勝阿仙奴(Arsenal),愛華頓今場雖然控球率不及阿仙奴,但攻勢就比阿仙奴多。愛華頓嘅控球率只係得43.1%,但全場就錄得23射6中,而阿仙奴就只係得7射2中。今場李察利臣嘅表現一般,全場錄得3射0中,並交出2次關鍵傳送。
夏薩特(Hazard)—16分
今場夏薩特嘅表現非常好,全場錄得4射3中,並交出5次關鍵傳送,各項數據都係全隊最高。夏薩特入嘅第一球盡顯功架,一拎到波後就獨力扭過晒韋斯咸嘅球員射入。而佢入嘅第二球就係把握韋斯咸嘅防線唔完整,夏薩特空晒都無人看管,接應巴克利(Barkley)嘅傳球後,先控定,雖然有韋斯咸嘅球員力迫,但都無阻夏薩特入波。佢今場梅開二度兼拎足3分bonus,所以今週拎到16分。

前鋒
華迪(Vardy)—32分(Captain)
今場華迪嘅表現非常好,全場錄得5射2中,射門次數係全隊最高。另外,佢亦交出3次關鍵傳送,同隊友麥迪臣(Maddison)一樣係全隊之冠。佢今場交出2入球1助攻,除咗攻入隊友彭利拿助攻嘅一球外,佢仲射入埋親自搏返嚟嘅十二碼。而佢嘅助攻就係嚟自佢被侵犯,然後麥迪臣罰球直射入網。佢嘅表現咁好,所以亦都拎到3分bonus,今週有16分。
威爾遜(Wilson)—2分
雖然般尼茅夫嘅控球率達到59.9%,而般尼茅夫全場就錄得10射2中,但般尼控球又少,射門都只係10射3中,但就已經入到3球。威爾遜今場表現一般,全場只係錄得2射0中。

今週成績
本週分數:73
本週平均分:36
總成績:1,996
總排名:27,816

如果你鐘意呢個專欄,請不忘訂閱呢個專欄同讚好我個專頁:https://www.facebook.com/fplguy1905/

如果喜歡我們的文章,請即分享到︰

標籤: Fantasy Premier League  FPL  英超  足球  Football  Soccer  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→