2018/19: 第32週陣容預告 – Free Hit終極11人

FPL Guy 於 28/03/2019 發表 收藏文章
第32週Double Gameweek嘅最終陣容已經定好,如無意外,筆者都係會用呢個陣嫁喇。除咗上一篇《2018/19: 第32週陣容解構 – Double Gameweek! 係時候用Free Hit!》有講到大致上個陣會係由邊幾隊球隊組成,咁今篇就會再深入少少講下點解會咁砌個陣喇。

首先,喺陣式方面,將會起用3後衛陣式,原因係今週有唔少強隊都只係同弱隊對壘,例如:曼城(Man City)同車路士(Chelsea)咁。除咗預計佢哋都能夠順利贏波,更加係有好大機會上演入球騷。不過,大勝一場並唔等於淨勝,佢哋隨時贏4比1或者5比1,咁如果放太多佢哋嘅後防,咁就濕滯喇。既然係咁,咁倒不如將重心放喺進攻度,筆者採取嘅策略就係喺上一篇提到嘅賽程最好嘅頭5隊入面分別揀嚟自4支唔同球隊嘅後防球員。咁樣就避免咗將所有雞蛋放晒喺同一個籃度喇,而且4名球員合共會有8次機會增取不失球分。即使佢哋只有當中一半嘅賽事係能夠保持不失球,2分基本分再加4分不失球分,4個加埋已經有24分。所以今個星期,我預計4名後防會為我帶嚟至少24分。至於前面嗰7個,我都有掙扎過究竟用3-4-3定3-5-2好,唯一變嘅地方就係前者係卡尼(Kane)搭柏度(Pedro),後者就係孫興民(Son)搭夏薩特(Hazard),其餘正選人選不變。呢個位嘅兩難之處在於有卡尼就冇夏薩特,有夏薩特就冇卡尼。雖然卡尼近排嘅狀態係好穩定,近4場有3場都有波入,入咗3球,但係熱刺(Spurs)今週嘅對手係聯賽榜首嘅利物浦(Liverpool)同水晶宮(Crystal Palace)。強強對碰,兩邊五五波,更加唔知多唔多波入;而對水晶宮,睇返呢兩隊過去5次嘅碰頭都係熱刺小勝1比0,照咁睇就入波都未必多,更何況呢場會係熱刺用新球場嘅首場比賽,真係有好多未知數。另外,揀柏度嘅話,最主要都係擔心輪換問題。若果用孫興民同夏薩特嘅話,好處係如果熱刺大開殺戒嘅話,我都有個熱刺兵頂一頂,咁個搶分重責就落咗去對兩支弱隊嘅夏薩特度。照牌面嚟睇,咁排法嘅風險會比將個重心放落卡尼度低一啲。不過,值得一提嘅係,今季車路士嘅表現都係時好時壞,唯有希望佢哋能夠發揮出佢哋應有嘅水平啦。

由於距離截止時間都仲有一段時間,陣容都有機會因球員受傷情況或有關出場嘅消息而改變。預計陣容:3-5-2
本週陣容

球隊價值(Squad value): 102.6M剩餘資金(In the bank): 0.2M

守門員
阿列沙巴拿加(Kepa Arrizabalaga)
車路士今輪嘅對手分別係卡迪夫城(Cardiff)同白禮頓(Brighton),前者近4場錄得1勝3負,後者近4場錄得2勝2負,而車路士就近4場錄得2勝1和1負。以近況嚟講,車路士就稍稍佔優。卡迪夫城近4場只係攻入3球,而白禮頓近4場就攻入5球,兩隊嘅攻力都唔高,相信車路士能夠取得2場不失球嘅機會都頗大。不過,車路士近4場失咗4球,只係得1場不失球,防守都唔係特別好,但係大部份嘅對手都比呢兩隊強。

後衛
舒洛比(Schlupp)
水晶宮今場嘅對手分別係哈特斯菲爾德(Huddersfield)同熱刺,前者近4場僅錄得1勝3負,後者嘅近況就仲差添,近4場錄得1和3負,而水晶宮就近4場錄得2勝2負。雖然水晶宮嘅近況都唔係好好,但都完勝另外兩隊。哈特斯菲爾德近4場攻入4球,而熱刺近4場就只係攻入3球,兩隊嘅攻力都唔高,期望水晶宮至少會有1場能夠保持不失。不過,水晶宮近4場失咗7球,防守麻麻。但值得一提嘅係,雖然舒洛比喺FPL打嘅位置係後衛,但現實中佢係一名中場。換句話講,即係水晶宮唔失波嘅話,佢都會拎到不失球分,但同時佢就打得更前,有更多機會參與進攻。佢近4場就交出咗3個助攻,助攻力非常強,亦有賴佢打得更前嘅關係。
連迪路夫(Lindelof)
曼聯(Man Utd)今場嘅對手分別係屈福特(Watford)同狼隊(Wolves),前者近4場錄得2勝2負,後者近4場錄得1勝2和1負,而曼聯就近4場錄得2勝1和1負。論近況,曼聯都係稍稍佔優。屈福特近4場攻入咗8球,而狼隊近4場就入咗4球。曼聯近4場失咗5球,只係得1場冇失波,防守一般。揀連迪路夫嘅原因係佢係曼聯恆常正選11人中最平嘅一個,只係5.1M,喺唔確定曼聯能唔能夠唔失波嘅情況下,最好就係揀返個最平,同埋連迪路夫近4場都交出過1個助攻,進攻上應該都能夠帶嚟貢獻。
拿樸迪(Laporte)
曼城今場嘅對手分別係富咸(Fulham)同卡迪夫城,前者近4場全敗,後者近4場錄得1勝3負,而曼城就近4場全勝。論近況,曼城就贏晒,亦都預計曼城兩場都會贏先至押重落曼城度。曼城嘅兩個對手近4場僅攻入3球,攻力弱到爆。相反,曼城嘅防守就超晒班,近4場僅失1球,所以呢兩場對曼城能夠唔洗失波都好大期望。雖然拿樸迪對上3場比賽都因為受傷而冇上陣,但係依家曼城有5名後衛受傷,而拿樸迪又好返,應該都係時候輪到佢復出嫁喇。

中場
史達寧(Sterling)
史達寧近4場交出5入球1助攻,狀態火熱,基本上曼城嘅攻擊線最信賴得過就係佢同阿古路(Aguero)。今週曼城嘅對手富咸同卡迪夫城都分別失咗9球同10球,正路嚟講,兩場都係會曼城控制戰局,然後狂數對手。因為曼城仲同利物浦爭緊標,所以佢哋係絕對唔會手軟。
普巴(Pogba)
普巴嘅表現有所回落,近4場只係交出1個助攻。不過,佢哋今個星期嘅對手嘅防守都唔係特別好,屈福特近4場失咗10球,而狼隊近4場就失咗3球。更重要嘅係,屈福特同狼隊將會喺之後嘅足總盃碰頭,因為兩隊都要一週雙賽同足總盃,咁就有機會會作出輪換。如果真係咁嘅話,就會對曼聯有利。
米利禾積域(Milivojevic)
米利禾積域近4場攻入2球,但係全部都係十二碼。揀米利禾積域最主要有兩大原因,一係因為佢係水晶宮嘅十二碼劊子手,二係水晶宮今季係英超獲得最多十二碼嘅球隊,見到佢哋近4場平均有2場都獲得十二碼就知道啦。水晶宮今季獲得10個十二碼,接近每3場就搏到1球十二碼,當中米利禾積域就射過9球十二碼,入咗8球。今個星期有兩場比賽,希望水晶宮都有十二碼可以射。
孫興民(Son)
熱刺今場嘅對手分別係利物浦同水晶宮,前者近4場僅錄得3勝1和,後者近4場錄得2勝2負,而熱刺就近4場錄得1和3負,連續4場不勝。喺熱刺陣中,最信得過嘅就係卡尼同孫興民,既然我唔用卡尼,咁就揀孫興民啦。利物浦近4場只係失咗3球,水晶宮近4場就失咗7球。熱刺都有機會爭取到入球嘅,雖然佢哋近4場只係入得3球,仲要全部都係卡尼入。希望孫興民能夠重拾佢替南韓國家隊出戰亞洲盃前嘅勇態啦。
夏薩特(Hazard)
夏薩特雖然近4場只係交出1入球1助攻,表現同佢嘅價值唔成正比,但佢對住弱隊不嬲都特別醒神,特別係卡迪夫城近4場失咗10球,而白禮頓近4場都失咗6球。值得一提嘅係,上半季夏薩特對住呢兩隊都有非常好嘅表現。佢喺對卡迪夫城嘅賽事中大演帽子戲法,而喺對白禮頓嘅比賽入面就交出1入球1助攻。佢喺呢兩場比賽入面豪取33分,希望佢今場都能夠好似上半季咁有咁好嘅表現啦。

前鋒
阿古路(Aguero)- Captain
阿古路近4場交出4入球1助攻,表現相當穩定。由於阿古路喺今個國際賽期休戰,體力應該唔成問題,再加上佢已經連續8場正選,所以佢被輪換嘅機會應該比史達寧細。同埋對卡迪夫城嘅比賽係曼城主場,已經過咗大半季喇,阿古路只要逢係曼城主場兼佢正選上陣就必帶嚟入球或助攻嘅定律依然屹立不倒。基於各種因素,揀阿古路做隊長好似比揀史達寧做隊長更加穩陣。
拉舒福特(Rashford)
拉舒福特嘅表現有所回落,近4場比賽並冇入過波或者交出助攻。咁點解仲揀拉舒福特呢?因為當佢狀態好嘅時候真係好勁。佢喺蘇斯克查上任後,由第18週至第25週呢8場比賽入面,曾經貢獻6入球2助攻,表現非常好。除咗希望佢可以重拾狀態之外,仲希望佢能夠傷癒復出,踢足兩場比賽。拉舒福特因傷喺國際賽期間退隊,抖足兩個星期,應該都好大機會好返嫁喇。

如果你鐘意呢個專欄,請不忘訂閱呢個專欄同讚好我個專頁:https://www.facebook.com/fplguy1905/

如果喜歡我們的文章,請即分享到︰

標籤: Fantasy Premier League  FPL  英超  Football  Soccer  足球  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→