2018/19: 第28週陣容總結 – 被激死

FPL Guy 於 28/02/2019 發表 收藏文章
筆者一邊睇波,一邊睇埋另外同時進行緊嘅實時比分,再一邊睇埋FPL嘅實時積分,真係差少少搞到心臟病發。陣入面有好多球員都係去到下半場,甚至係比賽後段先交出表現,但後備又不斷拎分,你話係咪睇緊直播係咪會緊張死呀?今個星期又係激死人,大部份球員都好低分,高分嘅又放喺後備,真係激死。首先,揀錯後衛,出咗2個都各失1球嘅後衛已經係敗筆。本身都未係錯得好離譜嘅,但係因為咁而錯過咗一場交出3個助攻嘅阿歷山大阿諾(Alexander-Arnold)就真係好激心。另外,仲有長期穩佔正選嘅夏薩特(Hazard)冇表現都算喇,仲要喺59分鐘俾沙利換走。就係差1分鐘,差1分鐘就可以拎多2分,真係激死我喇!就係差在冇出阿歷山大阿諾,令到今週嘅分數低過平均分。咁依家就睇睇今週筆者嘅陣容踢成點先啦。
本週陣容

守門員
艾法列治(Etheridge)—1分
今場卡迪夫城(Cardiff)主場以0比3輸咗俾愛華頓(Everton)。愛華頓今場佔盡優勢,佢哋嘅控球率達到67.5%,射門次數達到12次,足足比卡迪夫城高出1倍。愛華頓全場錄得12射4中,入3球。艾法列治全場只係作出咗1次撲救,表現唔係幾好。因為佢失咗3球而被扣1分,所以今週只係拎到1分。

後衛
彭利拿(Pereira)—2分
今場李斯特城(Leicester)主場以2比1贏咗白禮頓(Brighton),今場兩隊踢起上嚟都勢均力敵,李斯特城嘅控球率達到49.1%,稍稍低過白禮頓。兩隊嘅射門都係差唔多,李斯特城錄得19射3中入2球,而白禮頓就錄得15射3中入1球。
賓納特(Bennett)—1分
今場狼隊(Wolves)補時階段俾哈特斯菲爾德(Huddersfield)絕殺輸0比1。兩隊嘅控球率都不相伯仲,但攻門就以主隊較多同較有威脅。哈特斯菲爾德全場錄得15射3中;而狼隊就錄得可憐嘅7射0中。狼隊其實都輸得好唔抵,臨完場前先失波。因為賓納特拎咗張黃牌,所以被扣1分,今個星期只係拎到1分。
羅拔臣(Robertson)—13分
今場利物浦(Liverpool)主場以5比0大勝屈福特(Watford)。今場羅拔臣表現出色,一共交出2次關鍵傳送,就收穫咗2個助攻。佢憑住出色嘅表現,除咗幫球隊保持清白之身,仲拎到1分bonus,所以今週拎到13分。

中場
沙拿(Salah)—3分
沙拿今場繼續佢嘅入球荒,雖然利物浦佔盡優勢,全場錄得19射10中,但沙拿今場錄得嘅4射2中就好遺憾地未能轉化成入球。
普巴(Pogba)—5分
今場曼聯(Man Utd)作客以1比3贏咗水晶宮(Crystal Palace),今場普巴都繼續佢嘅好表現,全場錄得3射1中,並交出2次關鍵傳送。佢亦喺比賽嘅尾段成功交出1個助攻俾楊格(Young)埋齋。
摩天奴(Moutinho)—3分
雖然狼隊今場表現唔好,但其實摩天奴今場表現都唔差。佢全場錄得4次關鍵傳送,係隊中最高,可惜佢嘅隊友把握唔到機會。
李察利臣(Richarlison)—3分
雖然愛華頓順利贏波,仲入到3球咁多,但係李察利臣狀態依舊低迷。佢踢咗60分鐘就已經被調離場,好大程度係因為佢只係錄得1次射門。
夏薩特(Hazard)—1分
今場車路士(Chelsea)主場以2比0淨勝熱刺(Spurs)。夏薩特今場只係踢咗59分鐘就被換出,搞到連基本嘅2分出場分都拎唔到。踢咗59分鐘嘅佢今場只係交出咗1次關鍵傳送。

前鋒
阿古路(Aguero)—18分(Captain)
曼城(Man City)今場主場以1比0險勝韋斯咸(West Ham)。曼城今場完完全全就係㩒住韋斯咸嚟砌,佢哋嘅控球率達到75.5%。佢哋全場錄得20射7中,而韋斯咸全場就只係錄得2射1中。今場曼城都贏得有運,喺下半場貝拿度施華(Bernardo Silva)引球推進,殺入禁區嘅時候搏到十二碼,然後由阿古路操刀射入。今場阿古路繼續交出好表現,全場錄得3射1中,並交出2次關鍵傳送。就係憑住阿古路呢一球,曼城至順利贏波,所以今場佢都拎到3分bonus,總共有9分。
占美利斯(Jimenez)—2分
占美利斯全場錄得1次射門,仲要係唔中目標添,表現好差。

今週成績
本週分數:52
本週平均分:53
總成績:1,697
總排名:40,126

如果你鐘意呢個專欄,請不忘訂閱呢個專欄同讚好我個專頁:https://www.facebook.com/fplguy1905/

如果喜歡我們的文章,請即分享到︰

標籤: Fantasy Premier League  FPL  英超  

留言


請按此登錄後留言。未成為會員? 立即註冊
    快捷鍵:←
    快捷鍵:→