2018/19: 第11週陣容總結 – 阿古路再次發揮主場王本色

FPL Guy 於 06/11/2018 發表 收藏文章
今週雖然條防線嘅表現不似預期,但係個陣整體嚟講都算唔錯,都有好幾位球員交到表現。更重要嘅係,揀得啱阿古路(Aguero)做隊長,咁依家就先睇睇呢個星期陣中嘅球員踢成點啦。
本週陣容

守門員
艾達臣(Ederson)—3分
曼城(Man City)直到開賽之前嘅防守都係非常好,但竟然係今場對住中下游嘅修咸頓(Southampton)失波。好可惜喺上半場,艾達臣出迎封位嗰陣喺禁區內撲跌咗艾格斯(Ings),而艾格斯亦因為咁而射入自己搏得嘅十二碼。除咗呢一球之外,艾達臣其實都相當稱職,修咸頓全場有6球中目標射門(包括呢球十二碼),但艾達臣就救出咗其餘5球,亦因為咁而拎到1分撲救分。

後衛
馬高斯阿朗素(Marcos Alonso)—6分
今場車路士(Chelsea)主場以3比1擊敗水晶宮(Crystal Palace)。雖然車路士今場未能夠保持不失球,但係阿朗素就交出1個助攻,助攻柏度建功。阿朗素全場錄得2個關鍵傳送,表現唔錯,亦順利令佢拎到1分bonus。
羅拔臣(Robertson)—2分
今場利物浦以1比1同阿仙奴(Huddersfield)握手言和,羅拔臣今場嘅表現不過不失,有一個唔錯嘅射門機會,可惜射得太正俾龍門接實。
班捷文文迪(Benjamin Mendy)—2分
今場曼城又一次大炒對手,主場以6比1狂數修咸頓。可惜嘅係曼城有能力對住熱刺唔失波,但對住修咸頓就失咗1球。同我賽前嘅預測有啲出入,本身仲以為後防有艾達臣同文迪會拎到好多分。

中場
李察利臣(Richarlison)—15分
愛華頓(Everton)今場主場以3比1擊敗白禮頓(Brighton),李察利臣全場錄得4次射門,而當中嘅2個中目標射門就成為咗今場嘅2個入球。李察利臣梅開二度,表現咁好,亦令佢拎足3分bonus。
巴克里(Barkley) —2分
今場巴克里嘅表現靜咗啲,冇前幾場踢得咁生猛,全場只係得1腳射門。因為咁,沙利亦早早於64分鐘換出咗佢。
麥迪遜(Maddison)—3分
今場李斯特城(Leicester)作客以1球小勝哈特斯菲爾德(Huddersfield)。雖然麥迪遜已經有4場冇喺進攻上作出貢獻,但係其實佢嘅表現唔差,就好似今場咁,佢全場就錄得2射1中,同交出4次關鍵傳送。佢送出關鍵傳送嘅次數係全隊之冠。
文尼(Mane )—2分
利物浦今場1比1賽和阿仙奴,文尼嘅表現雖然唔係話好出色,但呢個分數絕對唔係佢應得嘅。事關有一球係費明奴(Firmino)嘅挑射中楣,然後彈落喺門前嘅文尼補中。可惜,呢球俾旁證舉旗示意越位,被判入球無效,但睇返慢鏡,其實文尼並冇越位。呢球係一個誤判,如果英超有視像裁判(VAR)就好喇。唉……文尼就咁白白冇咗5分,好唔抵。
夏薩特(Hazard) —4分
雖然今場夏薩特今場冇正選落場,但後備落場嘅佢,一換入就即刻交出1個助攻,幫車路士反超前返水晶宮。由此可見,夏薩特喺車路士陣中係相當重要。

前鋒
哥林威爾遜(Wilson)—7分
今場般尼茅夫(Bournemouth)雖然以1比2輸咗俾曼聯(Man Utd),但係威爾遜延續佢上乘嘅表現,今場開波冇耐就已經收穫1個入球。雖然最尾球隊都要失分,但佢出色嘅表現亦令佢拎到2分bonus。
阿古路(Aguero)—26分(Captain)
又一場曼城以大比數擊退對手,入波又點少得阿古路呢!好感動,阿古路係近7場比賽,首次踢足90分鐘。今場係曼城嘅第5場主場嘅比賽,主場王阿古路亦一如以往咁喺主場有入波或者助攻。而今場佢就兩樣都做齊,交出1入球2助攻,最尾亦憑住出色嘅表現拎到2分bonus,總共拎咗13分。

今週成績
本週分數:72
本週平均分:52
總成績:704
總排名:53,808

如果你鐘意呢個專欄,請不忘訂閱呢個專欄同讚好我個專頁:https://www.facebook.com/fplguy1905/

如果喜歡我們的文章,請即分享到︰

標籤: Fantasy Premier League  FPL  英超  

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→