2018/19: 第11週陣容預告 – 最強防線

FPL Guy 於 03/11/2018 發表 收藏文章
今個星期係今季首次擺出最強嘅防線,因為3名後衛,以至門將嘅位置,都係嚟自至今仍然保持不敗嘅球隊,分別係車路士(Chelsea)、利物浦(Liverpool)同曼城(Man City),而且佢哋都係全英超失球最少嘅頭三位。今週重頭戲係阿仙奴(Arsenal)主場迎戰利物浦,依家就嚟睇下今週點排陣先。
由於距離截止時間都仲有一段時間,陣容都有機會因球員受傷情況或有關出場嘅消息而改變。預計陣容:3-5-2
本週陣容
球隊價值(Squad value): 101.3M剩餘資金(In the bank): 1.7M

轉會
賣出:藍斯(Ramsey)
買入:巴克里(Barkley)
原因:賣走藍斯其實一啲都唔出奇,因為我上一週其實都已經有呢個念頭。賣走藍斯嘅主因其實都係因為佢上陣嘅時間不足,佢已經有好多場冇打過正選喇,連續4場後備上陣都少過30分鐘。其次就係阿仙奴嘅賽程都變得冇咁易踢,未來5場有3場都係對Big 6球隊。至於揀買入巴克里,都權衡過狀態、賽程、價錢,都發覺佢係最好嘅人選。喺狀態方面,佢近3場比賽入面,交出3入球3助攻,更加係連續3場都入波,係近排咁多位球員中最出眾。至於賽程方面,車路士未來12場賽事入面,只係得2場要對Big 6球隊,賽程都算係幾好。

守門員
艾達臣(Ederson)
曼城最近6場都冇失過波,防守非常好,而曼城今季只係失咗3球。今場曼城主場對近5場都冇入波嘅修咸頓(Southampton),預計都可以順利拎到不失球。

後衛
馬高斯阿朗素(Marcos Alonso)
今場車路士(Chelsea)嘅對手係近5場不勝嘅水晶宮(Crystal Palace)。車路士近4場比賽入面有2場不失球,防守都算唔錯。阿朗素上場對般尼(Burnley)更加交出1個助攻。預計車路士呢場都可以保持不失球,同埋阿朗素應該都可以喺進攻上帶嚟貢獻。
羅拔臣(Robertson)
今場利物浦要作客對住近8場不敗嘅阿仙奴,相信呢場都會係一場硬仗嚟。不過,作為英超失球第二少嘅球隊嚟講,利物浦嘅防守今季都幾可靠。希望今場高普會出返羅拔臣啦。
班捷文文迪(Benjamin Mendy)
曼城最近6場都冇失過波,防守非常好,而曼城今季只係失咗3球。今場曼城主場對近5場都冇入波嘅修咸頓(Southampton),預計都可以順利拎到不失球。最強嘅盾遇上最弱嘅矛,應該都冇咩問題。

中場
李察利臣(Richarlison)
李察利臣近4場都有1入球1助攻,表現都算不過不失,希望今場愛華頓(Everton)主場對白禮頓(Brighton)會取得入球或者助攻啦。
巴克里(Barkley)
巴克里過去3場比賽,交出3入球3助攻,更加喺FPL拎到36分,無疑係呢個星期最炙手可熱嘅中場。今場車路士對住近5場不勝嘅水晶宮,車路士明顯係被睇高一線嘅。
麥迪遜(Maddison)
呢一場波對李斯特城(Leicester)嚟講,會係相當沉重,而且隨時會係佢哋今季嘅轉捩點。事關佢哋啱啱先經歷完喪失班主之痛,究竟佢哋會係打返場勝仗,定係自此一沉不起呢?今場作客卡迪夫城(Cardiff)會係相當關鍵。麥迪遜上場比賽交出4個關鍵傳送,可惜都未能轉化為助攻,今場對住喺英超僅得一勝嘅卡迪夫城會有好表現啦。
文尼(Mane)
文尼上場表現非常好,全場錄得3射2中入2球,同埋做出2個關鍵傳送。今場作客對上3場都有失波嘅阿仙奴,希望佢都入到波啦。
夏薩特(Hazard)
作為暫時FPL分數榜首嘅夏薩特,希望佢今場背傷好返,可以趕得切復出對水晶宮啦。暫時錄得7入球3助攻嘅佢,係全英超直接或間接參與入球最多嘅中場,綜觀所有位置亦只有哥林威爾遜(Wilson)係比佢多。

前鋒
哥林威爾遜(Wilson)
今週般尼茅夫(Bournemouth)主場對曼聯(Man Utd),相信都會係一場硬仗。哥林威爾遜係全英超直接或間接參與入球最多嘅球員,總共有5入球7助攻。威爾遜近4場交出3入球3助攻,希望佢對住近6場都有失波嘅曼聯會入到波啦。
阿古路(Aguero)- Captain
今週曼城主場對近5場3次對Big 6球隊都場均失3球嘅修咸頓,修咸頓分別對利物浦同車路士都係輸3比0,相信今場佢哋對曼城都係凶多吉少。基於咁嘅情況下,都預計阿古路係能夠取得入球嘅,所以會揀佢做隊長。同埋,阿古路今季主場係從未試過入唔到波或者交唔到助攻。

如果你鐘意呢個專欄,請不忘訂閱呢個專欄同讚好我個專頁:https://www.facebook.com/fplguy1905/

如果喜歡我們的文章,請即分享到︰

標籤: Fantasy Premier League  FPL  英超  

留言


請按此登錄後留言。未成為會員? 立即註冊
    快捷鍵:←
    快捷鍵:→