[全場終] 標準流浪 3-4 理文－－娛樂性滿分的亂戰 精選

有十二碼，有十二碼飛機，有紅牌，有VAR，有倒掛，仲有理文幾乎將三球領先優勢拱手相讓－－身為花生友，咳咳，我係話，身為中立球迷，呢場波嘅娛樂性真係值回票價有突。
入正題前分享樣花絮。神田夢實上半場尾段第二次操刀十二碼時飛機，身旁嘅Z弟瞬間用hoodie頂帽笠撚住自己個頭，表示"If I had a penny everytime I see someone fuck up a pen against Lee Man in Mongkok, I would have two pennies!"（佢上星期都入咗場睇理文）。細佬你有冇諗過係你嘅出現邪撚住理文對家……🤔


綜觀全場，流浪其實係進攻上比較有想法嘅一隊。從後build-up嘅思路比較清晰，推進到前場被包圍時都有幾次表現出窄角度下靠短傳脫險嘅能力。然而，流浪缺乏嘅一個可以喺理文禁區有in the box presence嘅球員，變相令大部份嘅攻勢都交唔出end product，而理文嘅後衞喺面對流浪嘅鋒線時始終有面體格上嘅優勢。

上半場睇得最多嘅畫面係流浪嘅分邊出波做得並唔差，但個波出完之後就冇下文。右腳嘅伊巴謙上半場出任右翼亦某程度上限制咗流浪進攻嘅路數，畢竟順足右翼除咗出波做唔到太多其他嘢。理論上搵到經中路嘅地波進攻機會可以迴避到欠缺禁區內outball嘅問題，但中路滲透一直係最難做得出嘅攻勢，要每次進攻都做到呢一點太過苛刻。


另一邊廂，立足於反擊嘅理文就顯得簡單粗暴好多。最大嘅關鍵在於左翼基華尼頓對住盧均宜時基本上撞親都贏，令理文嘅反擊有好清晰嘅進攻方向。保利臣亦索性全程捱住左邊嚟踢，佢同基華尼頓兩個人嘅配合往往已經足夠完成一次進攻，亦係流浪上半場9分鐘內輸夠三粒嘅主因，三球背後都同理文嘅左路進攻有關。

輸第一球十二碼係源自一次來自左路包夾下嘅短傳成功搵到前鋒形成單刀而令流浪被逼出腳（tbh球波傳得堅靚）；第二球係一次傳到去左路嘅斜傳，set番去遠柱期間門將梁興傑清唔乾淨而俾保連奴捕到；第三球就完全走甩哂基華尼頓，白送佢一個free header。當然呢三球除咗有流浪守唔住理文左路嘅問題外，流浪本身嘅防守都有問題。右閘嗰邊單對單唔夠揪係一回事，但禁區內兩次走漏哂對手球員點都涉及人為失誤。保連奴嗰次係second ball都叫做冇咁大罪，基華尼頓first ball空哂就真係冇得兜。

流浪下半場嘅換人其實有令隊波有番起息。基奧嘅換入一定程度上解決咗前述流浪欠缺埋齋option嘅問題，一嚟同理文嘅後防有得撞下，二嚟佢做到中路盤球到禁區頂區域起腳嘅工作，起碼令流浪嘅進攻多番啲end product嘅範數先。伊巴謙後來亦有被調去左路，起碼唔再侷限於落底傳中一樣先。流浪最終入到三球對得住佢哋喺進攻上採取嘅主動性，而失四球亦「對得住」後防屢次嘅自爆。而理文專心反擊嘅部署結果上嚟講亦相當成功，畢竟當簡單粗暴已經夠做嘅時候，實在冇必要同你玩咁多花臣嘢。

戰術嘢講到呢度，因為場波嘅娛樂性始終來自於好多好好壞壞嘅individual moments，缺德啲食下花生都要。基華尼頓無懸念地力壓盧均宜頭先有提過，理文攞親波都分俾左路呢下真係睇到笑，不過可恥但有用你可以點。梁興傑失第二球時手槌嘗試打走批番遠柱嘅傳波打得唔應已經出出地事，第四球同朴鍾範唔知係溝通失誤定點，以為keeper會兜得住遠柱但慢流尾袋，流浪咁都洩唔哂度氣某程度上都算抵讚。理文其實唔好得好多，第二球十二碼流浪其實已經橫推到走死哂，除咗格硬拗腰射冇其他出路，出腳勾跌人白送極刑真係好多餘，神田喺「Z弟力場」下炒機真係死好命。
最令人腎上腺素急升嘅當然係伊巴謙嘅倒掛金鈎，靠嗰球追到3-4反cup在望真係嗌出聲。靠VAR介入吹番迪高張紅牌轉頭亦係highlight之一，顧住望波真係唔會見到發生咩事，仲要喺正球證死位，係啲喺pre-VAR era一定會走甩嘅犯規。屌VAR有咩不足係公海潮流，但唔可以忽視有佢先帶嚟到嘅改變。


In the end，足球嘅本質係娛樂。而除咗好波係娛樂，犯錯有時都係娛樂。當然小弟同Z弟討論啲判決點解會咁吹都討論得不亦樂乎，不過呢個屬於職業病發行列，唔expect個個都會從中得到樂趣。當然某部分賽後「花絮」都係娛樂嘅一種，不過呢點小弟不予置評。當然某啲賽後「花絮」都係娛樂嘅一種……🤭