與其話係細節「決定」成敗，不如話係細節「左右」成敗 精選

與其話係細節「決定」成敗，不如話係細節「左右」成敗。
受益於科技嘅發展同戰術作為一門學問嘅成熟，球壇整體嘅戰術水平近年一直有住穩定嘅發展。曾經Tiki-taka同Gegenpressing係令人如獲至寶嘅嶄新潮流，如今已然成為高級教練手頭上必備嘅兩張底牌。因此，當涉及兩隊水平相若嘅球隊嘅對碰，尤其是當兩隊都係資源充沛嘅強隊時，單靠戰術嘅主體本身要獲得壓倒性嘅優勢基本上已經不可能。有見及此，球隊就會尋找不同嘅細節位去鑽研，務求可以盡可能地網羅哪怕係最微小嘅1%優勢，畢竟邊個都唔知呢種marginal gain幾時會成為致勝嘅關鍵。亦正因如此，教練組嘅人才亦愈發專精同多樣化，界外球教練、十二碼教練、角球教練等，分工嘅細緻從以前嘅不可能變成當今嘅必需品，大家都努力追求屬於自己嗰1%。
俗語中嘅「細節決定成敗」，放到足球嘅世界，其細節就係上述嘅各種1%。

而之所以話係「左右」而非「決定」，係因為無論係各種死球嘅訓練，對對手球員技術細節嘅分析，定係教練換人同戰術嘅臨場調動，所能夠做到嘅只有儘可能加大球隊嘅勝率，或是臨場決定採取當下認為最有可能最大化球隊勝率嘅決定。從來唔存在咩訓練方式，或者咩臨場調動係「包生仔」，係一定會成功。


皇家馬德里對曼城嘅次回合，主隊到90分鐘先開始上演絕地反擊，仲要係一分鐘兩球。由於哥迪奧拿於85分鐘選擇換入費蘭甸奴，少不免有人（而且仲為數不少）指責哥帥嘅換人太過保守，係令皇馬有機可乘嘅元凶。因為事件A同事件B先後出現，而假定A引致B本身，呢個推論本身就係一個邏輯謬誤。而就算撇除邏輯謬誤嘅部份，大家應該記得喺絕地反擊上演前夕，電視螢幕上曾出現按照數據分析嘅推算，曼城嘅勝率有99%，皇馬只得1%。數據推論不代表一切，但某程度上可以理解為，皇馬當下要成功反cup，就必須要上演只有1%可能會發生嘅大奇蹟日。哥帥嘅「保守」，於當時而言有99%嘅機率會奏效，畢竟喺比賽嘅第85分鐘考慮鞏固防守實在再正常不過。

正如之前所講，領隊唔係先知，冇辦法好似Dr. Strange咁預測1400萬個未來。領隊可以做嘅，無非係選擇當下佢認為可以將己隊勝率最大化嘅選項。哥帥嘅換人，喺99%嘅情況下都會大步檻過，偏偏呢條時間線就係踩中咗嗰1%。而老實講，一個戰術調動可以有99%嘅成功率，真係已經係極限了。

再用前一次車路士對利物浦嘅互射十二碼去做例子。Kepa當時嘅十二碼撲救成功率比文迪高，牌面上換佢出嚟可以為車仔帶嚟嗰1%或更多嘅marginal gain，仲要有歐洲超級盃嘅珠玉在前。最後事與願違，Kepa仲要不幸成為射失最後一球十二碼嘅「罪人」，輿論自然係又引嚟千夫所指，連帶住決定換走文迪嘅杜曹都不例外。當然，呢種論點除咗又干犯咗上述「事件A同事件B先後出現，而假定A引致B本身」嘅邏輯謬誤之外，亦包含咗「換咗Kepa就一定要成功，otherwise換Kepa呢件事就係失敗嘅」嘅錯誤假定。
喺「增加勝率1%」同「增加勝率到一定會成功嘅100%」之間，畢竟有住99%嘅距離，並唔係同一樣嘢嚟。增加1%嗰啲叫「左右」，增加到100%嗰啲叫「決定」。如果認為細節一定要「決定」成敗，自然會得出「Kepa = 失敗」嘅結論；如果能夠接受細節只係可以「左右」，就會理解換入Kepa最多只係未竟全功，唔一定就代表係做錯事。


最後將目光轉移番去今次嘅互射十二碼身上。關於利物浦互射十二碼時精神面貌嘅佔優同細微之處嘅討論出爐後，引嚟網民表示係「事後孔明」、「成王敗寇」、「過分吹捧」等等。而呢種心態，某程度上同之前Kepa事件中形成反差，看似係一面「反成王敗寇」嘅旗幟。但呢種心態嘅謬誤，在於假定咗出post者（如我，如BLnaze的足球札記 ）係抱住「成王敗寇」嘅心態去吹奏利物浦嘅「成王」，而忽視咗諸如BBC同眾多網民，係射緊嘅時候已經觀察到好多呢啲細節。

如果學某李姓特首咁「以結果為導向」，贏咗波先格硬搵嘢嚟讚，咁確實係有抵屌之處。只不過今次嘅事件並非如此，大家只係分享下sports science同sports psychology喺足球嘅應用已經發展到呢個地步而已。利記嘅談笑用兵同車仔嘅如臨大敵故然形成鮮明對比，但喺另一個平行時空下，如果車仔頂得住壓力，如果隊長嘅十二碼稍差幾公分，利記提早喺心理建設上嘅部署就會變成同聯賽盃決賽嘅Kepa一樣，成為不足以改變戰果嘅1%。Even then亦都唔代表利記嘅心理建設係無用功，只係咁啱唔夠做而已。
希望有幫大家辨清「決定」同「左右」嘅分別。

Facebook專頁傳送門：https://www.facebook.com/ChelZfan
FanPiece專欄傳送門：https://football.fanpiece.com/ChelZfan/
YouTube Channel傳送門：https://www.youtube.com/channel/UCN5eigZ-schgJbH6NuJ5UsA