[全場終] 車路士 3-3 修咸頓

車迷Z 於 18/10/2020 發表 收藏文章
進攻令人驚艷,防守令人驚訝。上述兩句描述係車仔今場嘅主旋律,亦好有可能會係車仔今季嘅主旋律(有冇人記得我提過大家今季要入貨入番十打八打平安鐘)。

loading

1️⃣ 前場四重奏

先講進攻。季前增兵時已經有提及過,新加盟嘅球員都係前場多面手。配以陣中同樣位置可塑性高嘅莫特、普利錫,有望組成換位靈活,各自同時具備帶波、做波、射波能力嘅,高流動性嘅give and go進攻。

今場以雲拿、夏伐斯、莫特、普利錫領銜進攻,綜觀全場發起嘅攻勢都見到季初設想嘅fluidity開始成型。此前銜接中前場一直係球隊嘅死穴,夏薩特韋利安相繼離隊後,可以有效地將皮球送上final third嘅只有高華基治。今場亦久違地令筆者覺得球隊嘅進攻體系開始成形,而唔再係要倚賴球員嘅靈光一閃。

2️⃣ 四重奏的配角

撇除前場四人組合,有兩名球員喺車路士嘅進攻上都扮演住舉足輕重嘅角色,分別係捷維爾同佐真奴。

先講捷維爾。呢名英格蘭國腳幾乎以一己之力打通成條左路走廊,不時見到佢酷似M.阿朗素咁後上殺到入禁區參與進攻。而佢比M.阿朗素更上一層樓嘅地方,在於佢出波能力不俗有餘,助攻範數比M.阿朗素更多元化;同時又有夠快嘅回追速度,唔會好似M.阿朗素咁一踢左閘就成為後防缺口。球隊戰術上出任左中場嘅係莫特,但佢中路出身嘅特質會使佢更傾向內切。捷維爾嘅壓前可以填補左路進攻嘅空缺,同右路嘅普利錫呼應成為雙翼齊飛。

至於佐真奴,球迷間雖然對佢褒貶不一,但喺長傳調度同控制節奏上,佢無疑係車仔陣中嘅第一把交椅。以往車仔比賽比較多見佢集中於中後場嘅梳理,今場則係印象中第一次見佢喺進攻組織上大放異彩。適逢修咸頓上半場嘅戰術係採用兩個牛高馬大嘅中堅打high line,佐真奴第一時間嘅長傳屢次非常有效地捕捉戰機,令進攻球員有機會喺修咸頓身後嘅空位如入無人之境。雖然冇直接貢獻助攻,但車路士嘅第二、三球都係得益於此。

3️⃣ 中場——平衡、抗壓、防守

防線「派膠」式嘅失誤令人沮喪,但筆者認為從戰術上而言,中場嘅失衡先係最需要根治嘅問題。正如友page Blu波pen 所言,上半場尾段失波嘅車仔「令人非常熟悉」,然後果不其然90分鐘後失分收場。上半場尚且能夠靠進攻掌控節奏,但下半場一被對方加強逼搶就無以為繼,其進程同聯賽盃對熱刺1-1場波如出一轍。

之前嘅賽評已有提及過,車路士嘅中場組合近排場場變,但都係無法拿捏到兼顧攻防兩端嘅平衡,最明顯嘅漏洞係冇人能夠喺防線正前方嘅位置為後防提供屏障嘅作用。

簡迪嘅攔截能力不俗,但其攔截風格屬於見招拆招嘅B2B,而唔係企實喺6號位靠預判同位置保護防線嘅防守中場。簡單嚟講,佢係個「有防守能力嘅中場」,並非「防守中場」,而其防守能力喺上季傷患後一直未見當年勇。高華基治同佐真奴又都不以正面防守能力見稱,林伯心水嘅懷斯又來投無望,導致中場一直面臨「一拍就散」嘅困境。

下半場之後,中場無法應對修咸頓施加嘅壓力,佐真奴被逼移後到兩個中堅之間,組織距離一拉遠就自然無法為前場提供足夠嘅支援。佐真奴移後後簡迪獨力難支,莫特回後亦無補於事,攻防兩端都形成斷層。

第三球死球係老問題兼獨立於戰術之外,暫且不提。但失嘅第一球直接就係死於禁區前沿嘅6號區域,中場失衡之下後防受壓產生第二球,都同中場問題息息相關。

(其實正正就係差個馬迪,當年佢離隊後一直冇成功地搵到防中接班人)
4️⃣ 「系統性」個人失誤

基斯甸臣、阿利沙巴拉加、泰亞高施華、蘇馬。上述防守球員今季都曾經因個人失誤導致失球。筆者一直認為,領隊再神算都算唔出球員幾時會神經刀,所以唔會將因個人犯錯而嚟嘅失波落哂領隊數。另一方面,人誰無過,筆者亦唔支持防守球員一犯錯就將之定罪,覺得要打入冷宮永不錄用,所以唔打算喺呢度話呢個中堅喳,嗰個中堅廢。

但係,當球隊經常性地陷入會令到防守球員有機會被逼到「派膠」嘅局面時,就要開始考慮戰術上係咪要更好地保護後防球員。承上所言,中場防禦力不足,防線經常被打荷包要1-on-1,增加犯錯嘅可能性。當問題嘅癥結開始明顯(戰術上要有個專職防中做最後一塊拼圖),而又無法即時透過轉會窗進補時(韋斯咸叫價懷斯8000萬咪撚玩),係咪應該要喺戰術上作出改變。

High line high press係時下潮流,但球員配置同反搶體系都未成形,車仔顯然未做到利物浦嗰種由費明奴開始防守嘅「全能足球」。打唔到high line係咪值得考慮打mid block,防守時留雙箭頭喺前場做騷擾而非高壓逼搶,中場形成4-4-2雙線screening,避免失卻人數上嘅優勢,順勢多善用佐真奴嘅長傳轉守為攻。如果教練組喺指導防守上嘅能力欠缺,增添專職防守嘅教練不失為一個出路。

總之,喺越嚟越講求整體性嘅現代足球,車路士防守端嘅問題非是換過個後衛就能妥善解決(當然人源上嘅upgrade好有可能係答案嘅一部分)。撇除傷癒後狀態一直飄忽嘅魯迪加,基斯甸臣同蘇馬都有喺頂級聯賽擔任長期正選嘅經驗,代表佢哋嘅實力遠不至於唔夠資格喺車仔立足,最多係風格未必最啱用。換句說話講,琴晚嘅防線牌面上再不濟,都唔應該展現出下半場喜劇式嘅表現。

5️ 林柏特嘅「功課」

調教防線非是現今教練組嘅長處,呢點經過上季已經十分清楚。理應係新防線核心嘅E.文迪同泰亞高施華琴晚一缺陣,全隊防守表現就打回上季嘅原形,正正揭露車仔防守端嘅問題依然任重道遠。今場損兵折將後嘅表現可以當係偶發性事件,但此後球隊係咪能夠更穩定地複製對水晶宮時嘅固若金湯,將會係以林伯為首嘅教練組今季考牌嘅關鍵。不求場場都可以對水晶宮咁封鎖到對方0.15 xG,但防守端同中場平衡嘅進步,將會係今季內必須要見到成效嘅事。

6️ MOTM: Timo Werner

兩入球一助攻。第一球快轉身擺脫對方後衛技驚四座,第二球一挑一控盡顯功架。應該可以令急不及待想話佢係水貨嘅doubters收聲(雖然FPL都係冇買佢)。

(同埋真心,無謂再出Kepa。勉強冇幸福,咁樣對大家都好。大家已經太習慣將焦點放喺佢身上,失第二球責任在於蘇馬多過在於Kepa,但千夫所指嘅都會係佢。當保護下球員啦。)

請支持Facebook專頁「車迷Z」!

如果喜歡我們的文章,請即分享到︰

標籤: 車路士  修咸頓  英超  賽評  

留言


請按此登錄後留言。未成為會員? 立即註冊
    快捷鍵:←
    快捷鍵:→