[全場終] 車路士 1-1 李斯特城－－初步點評「林氏」車仔 精選

睇完場波其實有少少灰到唔想寫。但係望一望自己個page名，又聯想下自己開季到宜家未評論過車仔，都係唔可以太過名不副實。即管分享下自己對呢場波有啲咩觀察。
1️⃣ 進攻組織有待改進


將波從後場傳遞到中場，再推進到對方禁區頂，非常流暢；但係一殺到上對方禁區頂，無論傳波定走動，都顯得好生澀。以上呢一幕，開季以黎三場比賽都經常見到。莫特嘅入波來自尼迪迪受逼性犯錯。基奧特接應艾瑪臣落底傳中後腳回傳俾簡迪後上射門，係車仔進攻最大嘅亮點，但除此之外靈感欠奉。
2️⃣ 體力下滑，表現判若兩隊


任何一支打進攻足球嘅隊伍，對前場壓逼同就地反搶嘅要求都好高（例如利記曼城）。而不論係上個星期對曼聯，定係今場對李城，車仔都係上半場某啲時段生猛，而下半場一拉車就無以為繼。周中歐洲超級盃對利物浦又打足120分鐘，對體能又係額外嘅消耗。所以總的來說，車仔球員嘅體能水平，未足以支撐到全場90分鐘都發揮林伯嘅戰術需求。
3️⃣ 角球防守體系有缺陷


3個球員一字排開企喺細禁區邊緣，用意係確保可以比對方早搶到細禁區嘅制空權。而細禁區外佈防嘅其他球員，就要負責阻礙對方球員嘅後上攻門。尼迪迪嘅入波，就係衰喺細禁區外嘅車仔球員冇及時阻礙佢嘅後上。而好老實講，車仔開季以黎嘅角球防守，都有種搖搖欲墜嘅感覺。
4️⃣ 4-2-3-1的先天不足


近幾年黎，歐洲球壇嘅主流戰術，由4-2-3-1轉變成4-3-3，會出攻中嘅球隊都會出3-4-1-2，似乎代表住一個時代嘅終結。而4-2-3-1會fall out of favour嘅其中一個主因，係攻防轉換時，防守上可以動用嘅兵源同直接截擊能力，都先天性地低於4-3-3。喺越黎越多球隊轉打high press同high line嘅時候，4-2-3-1嘅先天性不足，會被無限放大。而4-2-3-1最鼎盛嘅年代，足球嘅大環境更接近稍為sit back嘅陣地戰居多。上周對曼聯會輸四球快攻，除左前述嘅體力下滑之外，陣型上嘅不足都係因素之一。
5️⃣ 韋利安……唉


一般黎講，我唔中意捉戰犯。但係韋利安後備入替嘅表現，確實係災難級。帶波同對球處理嘅速度極其遲緩，傳球準度甚差，屢次接應時懶得跑番出越位線內，整體黎講work rate都令人非常唔滿意。
總結

通篇所指出嘅，係我所觀察到林伯麾下車路士目前嘅不足。正式執教三場比賽，要宜家就斷林伯死罪絕對係荒謬地言之過早。希望喺之後嘅比賽，球迷可以見到上述嘅問題逐步得到解決。

請支持Facebook專頁「車迷Z」！