摩迪：判罰總係對我哋不利，VAR 必須係 200% 錯判先應該介入

世界盃32強賽事，葡萄牙以 2比1 反勝克羅地亞。賽後，克羅地亞隊長摩迪（Luka Modrić）接受傳媒訪問。

問：你點睇今場比賽？

摩迪： 我覺得可以將呢場比賽分開兩部分去睇。上半場我哋未踢出應有水準，陣形缩得太後；但下半場我哋表現非常出色，可以話係我哋今屆賽事最好嘅比賽之一。

我哋本來有機會更早殺死比賽，但冇做到，亦錯失咗好多機會。之後發生咗一啲令我覺得難以置信嘅事情。就係咁啦。比賽啱啱完，情緒仲未平復，要即刻講出有建設性嘅分析其實好難，我亦唔想講錯說話。
不過，我哋絕對可以為下半場嘅表現感到驕傲。我認為我哋值得得到更多，但足球有時就係咁。

問：入球被判無效後，球證同你講咗啲乜？

摩迪：
佢話有球員掂到個波，但我哋睇過重播同影片，冇任何畫面顯示有人掂到個波。如果冇人掂到個波，咁就唔應該係越位。

問：C 朗同你講咗啲乜？
摩迪：冇乜特別，我哋只係正常交談。

問：關於退役同未來有咩打算？摩迪：
而家唔係討論呢件事嘅時候。你哋好快就會知道答案。就係咁。（據報摩迪喺記者問題未問完前已經打斷對方，呢番說話亦被外界解讀為可能好快會公布國家隊生涯嘅最終決定。）

問：今次出局係咪一個非常大嘅打擊？
摩迪： 係，因為我認為我哋值得得到更多。有啲事情對我哋非常不利。嗰個十二碼，如果調轉角色，我相信 VAR 永遠唔會介入。其實由 VAR 引入足球開始，我就一直講過，我唔鍾意呢套制度。佢喺某啲情況下確實有幫助，但同時亦經常被錯誤地或者選擇性地使用。或者係睇球隊名氣，又或者其他原因，我唔知道。

我嘅立場一直都係： 「只有喺 200% 明顯錯判嘅情況下，VAR 先應該介入。」
如果唔係，如果屬於灰色地帶、可判可唔判嘅情況，就唔應該介入。而今場比賽嗰個判決，根本唔係十二碼。雙方球員當時互相拉扯、互相推撞，大家都拉住對方，最後一齊跌低。喺呢種級別嘅比賽，你唔可以因為咁樣就判十二碼。

所以我一直強調，VAR 必須只用喺百分之二百確定係錯判嘅情況。如果屬於可以兩邊解讀嘅灰色地帶，就唔應該介入。呢件事令我非常憤怒，而且呢類情況總係對我哋不利。不過算啦，我哋唔會用呢個做藉口。

但我真係唔鍾意呢啲事情，因為佢哋會改變一個人嘅命運。當你為咗一個目標付出所有、犧牲一切、拼盡全力之後，呢啲判決會直接影響你最終嘅情緒同結果。我哋陣中有好多年輕球員正在成長，發生咁樣嘅事情，你會為佢哋感到難過。
而且我一直都講：「呢類事情，總係對克羅地亞不利。」不過算啦，我而家唔想再討論呢方面。

我哋應該為自己嘅比賽方式感到驕傲，為自己嘅拼搏精神感到驕傲，為代表克羅地亞嘅態度感到驕傲，尤其係下半場嘅表現。

呢個先係全世界認識同尊重嘅克羅地亞，亦係點解我哋喺國際球壇一直受到尊重同喜愛。

冇乜好講，我哋會繼續向前行。依家係時候重新調整自己，準備迎接下一個挑戰。