韓媒爆韓國隊更衣室不和：洪明甫曾質問孫興慜「你憑乜可以討論比賽？」

據多間韓國媒體報道，韓國隊喺2026世界盃分組賽期間疑似出現隊內不和，爭議焦點主要圍繞墨西哥一戰後嘅更衣室風波，以及孫興慜、李在城其後喺對南非一仗未獲安排正選上陣。

韓國《每日經濟》報道指，韓國國會議員陳鐘午方面透露，透過「大韓足球協會密室行政及腐敗舉報中心」收到有關國家隊內部矛盾嘅爆料。
爆料指出，早前有部分記者曾就孫興慜兵役特別待遇問題作出調侃，令韓國隊一度集體拒絕接受傳媒訪問。其後，隊內就應否恢復接受訪問出現分歧。
TV朝鮮一個節目則根據相關爆料，重構墨西哥賽後更衣室內發生嘅情況。節目內容顯示，當時孫興慜正喺更衣室內同隊友交流，洪明甫走近後問道：「你哋喺度講乜嘢？」

孫興慜回答：「我哋喺度討論場波。」

洪明甫隨即再表示：「你憑乜討論呢啲？全部出嚟。」

該節目亦以「洪明甫喺更衣室同孫興慜爆發心理戰？國家隊不和傳聞擴散」作為標題，引起外界關注。另外，據報喺對墨西哥嘅比賽結束後，洪明甫曾於更衣室要求球員恢復接受傳媒訪問。大部分球員其後都有前往混合採訪區受訪，但孫興慜同李在城則未有現身。兩人認為球隊應該繼續維持拒絕採訪嘅立場。

SBS報道指出，正因為孫興慜同李在城持續反對恢復受訪，洪明甫最終決定喺對南非嘅關鍵一戰中，唔安排兩人正選上陣。韓國隊喺今屆世界盃分組賽最後一輪不敵南非，最終未能晉級淘汰賽。隨住球隊出局，洪明甫嘅用人決定、戰術部署以及更衣室管理能力，持續遭到韓國輿論質疑。
有韓國傳媒評論指出，無論相關爆料內容最終能否被完全證實，韓國隊喺世界盃期間接連傳出內部不和消息，本身已反映教練團隊喺球隊管理方面存在嚴重問題。