【球星講台】足球浪人 • 杜馬斯

香港足球 於 13/07/2017 發表 收藏文章
杜馬斯,生於足球大國 巴西,2013來港加盟標準流浪,之後再轉投黃大仙。2015年,佢穩定嘅表現吸引到冠忠南區教練 Ricky 邀請加盟,可惜去到今季就因為季中長時間受傷,加上有踢過英超嘅列文加盟,令杜馬斯被南區放棄,不被續約。究竟巴西人點睇自己嘅遭遇?又點諗自己嘅前途?

網上片段 引起列卡度關注

杜馬斯嘅足球生涯始於家鄉 巴西,但原來佢一直希望跳出巴西『我希望喺巴西以外嘅地方踢波,所以我將我嘅比賽片段擺上Youtube,好彩得到列卡度嘅賞識,邀請我加盟流浪。』咁香港又有咩吸引到佢繼續自己嘅生涯呢?『我覺得香港嘅足球發展非常迅速,所以我認為自己嘅技術亦會有所進步,甚至有機會到其他國家,例如 日本、韓國發展。』

3年前 杜馬斯效力標準流浪

家鄉同香港嘅分別

由巴西到港超,杜馬斯覺得兩地有咩分別?『當然,巴西同香港喺語言、文化同食物方面都有好大分別。而且天氣亦唔係太容易適應。足球方面,我覺得香港嘅節奏比巴西快,不過訓練同設施方面就遠不及巴西喇。』

被南區放棄

兩季為南區上陣47場,卻因為一次傷患而換來不被續約。『當時我非常傷心,亦有啲驚訝。為南區踢咗兩季,我認識到好多朋友,我亦好愛南區,當咗佢係我嘅家庭一樣。可惜我唔好彩,季中受傷而續唔到約。不過宜家我已經將呢啲唔開心嘅嘢拋諸腦後,亦已經100 % 康復好,期待有球會簽我。』以杜馬斯嘅表現,又有冇香港球會接觸過佢?『有係有嘅,不過就咩都未同我傾,亦未同我簽約,所以我仲係非常開放地接受其他球會嘅開價。』

今季因為傷病而未能得到續約

不捨離開香港

喺香港生活咗4年,杜馬斯點睇呢個城市?『我非常鍾意香港,除咗因為呢度生活質素高,更重要嘅係因為我喺度識到我老婆,組織咗自己嘅家庭,所以我亦一早視香港為我嘅家,我亦希望喺香港留多3年,成為香港永久性居民,拎香港護照。』但問到杜馬斯如果有外國球隊希望佢加盟,可能要放棄香港嘅護照,佢會點揀?『作為一個職業足球員,有波踢一定係最重要,所以如果外國球隊嘅開價真係好吸引,我相信會係一個好難嘅抉擇,因為要離開香港對我同我嘅家庭亦絕非易事。』

標準流浪對自己最有意義

32歲嘅巴西人不經不覺原來已經效力過10間球會,呢位『浪人』又對邊隊最有感情?『一定係流浪!我喺香港嘅第一間球會就係流浪,加上當時我期待咗自己能夠外闖好耐,所以我當時感覺係非常奇妙,流浪亦成為對自己最有意義嘅球會!』

冇列卡度,香港球迷亦唔會喺香港見到杜馬斯踢波

基奧雲尼 費蘭度 最難應付


而喺香港踢咗4年,佢又認為邊個球員最難防?『基奧雲尼同費蘭度都好難對付,一個就係港超神射手,一個就係足球先生。而且佢地嘅走位非常難預料,加上各自嘅速度同射術,阻止佢地入波絕非易事!』至於外國球壇,佢就話皇馬嘅沙治奧拉莫斯係自己偶像『佢係一個好全面嘅球員,佢有速度,有團體精神,有搶奪能力,有入球能力,最重要係佢受隊友尊重。』

同樣來自巴西,杜馬斯非常欣賞同鄉 費蘭度、基奧雲尼嘅球技

感謝球迷支持


最後問到佢有乜同球迷講。『首先就要多謝佢地比錢入場支持球隊同球員,入場嘅球迷絕對係球員踢好波嘅最大動力,上季(2015-2016)喺大球場踢嘅銀牌決賽,球迷冒著大雨入場支持南區 / 東方,令我非常感動,即使最終贏唔到錦標但都對球迷嘅支持好滿足。Football is nothing without fans! 』

杜馬斯感謝球迷支持

小結:

媒體嘅報導,往往較多著墨於前線嘅球員,後方球員冇太多入波,亦只能默默為球隊防守作出貢獻,讓前鋒隊友能處於鎂光燈下。杜馬斯亦是如此,沒有太多媒體關注,唯有靠自己嘅表現吸引球隊關注。也許杜馬斯消失於港超,球迷亦唔會有太大反應,但筆者卻認為,以巴西人嘅身形、技術,絕對足夠繼續喺香港揾食,表現自己!希望杜馬斯能盡快有班落!

~~~~~~~~~~
本專欄會從不同角度,與球迷分享有關香港足球的所見所想。同時亦希望能吸引更多球迷入場欣賞本地波嘅賽事,為香港足球加油!

本專欄每月會出4-5篇文章,當中會有分析,講解或其他唔同類型嘅文章。

facebook page :撐起港足 We Are HK

photo credit: 杜馬斯 oncc apple daily 冠忠南區 體路
標籤: 南區  杜馬斯  香港足球  本地波  港超  

留言


請按此登錄後留言。未成為會員? 立即註冊
    快捷鍵:←
    快捷鍵:→