《車仔哪裡出了問題－排陣和出場人選》

上季出閘脫腳，干地果斷變陣343，取得空前的成功，一度平了英超連勝紀錄，最後勇奪英超冠軍。343的立竿見影固然是成功的關鍵，但也不能忽視一點，就是球隊不用應付歐聯戰事，大大減輕了球員體能的負擔。
夏天干地已屢次表示現有陣容不足以應付今季的多條戰線，球員從場上的疲態亦證明了這點，而這關乎球會管理的請容許我在下篇才再作詳談。

說回排陣，無可否認，陣容是單薄的，但這不代表不可以有變化，如果干地明白到343不是一勞永逸的話。
個人認為，他是意識到這點，亦有嘗試過求變，但做得不夠。

首先說說343為什麼不是車路士陣容長治久安的答案。
3中堅、2翼衛、2中場中、2翼/inside forward、1前鋒，概念是很好的，但為何今季不能複製上季的成功呢？343多打了1個中堅穩固防守，中前場球員的要求就自然更高，中場中要很全能、兩翼衛要打晒成條邊、前鋒要有個人搵食能力。

馬迪走了，換來了巴卡約高；哥斯達走了，換來了莫拉達。說實話，二人的走是挺關鍵的，但個人而言不感到十分可惜，反正他倆的心早已離開。但干地也必須接受一點：巴卡約高不是馬迪、莫拉達不是哥斯達。

原本，馬迪＋簡迪這中場中組合的助攻力就嚴重不足，但哥斯達、夏薩特等的進攻火力遮蓋了這問題，加上當時球隊兩翼衛摩西斯、阿朗素體力充沛，給了很大的側擊力度。
但今季，說到口臭了，巴卡約高未能足夠給予後防屏障、兩翼衛疲倦不堪、前線莫拉達是需要輸送的球員，種種加起來，形成了真正的攻不銳守不穩。
343的二人中場，面對很多英超隊的三人中場就是不夠搶，干地也清楚明白這點。這方面他是有求變的，車仔今季也一直在343與352陣容之中游走。但最令我摸不著頭腦的是，為什麼每次巴卡約高＋簡迪＋法比的組合，都是巴卡約高比法比更前？如果說法比要墮後校炮，那豈不是進一步犧牲了中場的掃蕩，而且前場威力又降低了？又，真禾特確是每次上陣都交足功課，但為什麼仍然在人選上排在巴卡約高後面呢？

說得太多巴卡約高，想說說巴舒亞伊。沒錯，開季幾場他上場表現都強差人意，但直至對熱刺擺老烏之後的比賽，他每次上場其實都交足功課，只是似乎不太獲得干地的歡心，在莫達達傷停時，甚至數次寧願踢啞火到不行的無鋒陣都不起用他。我們都不知道操練時發生了甚麼事，但到底是干地找不到他的使用說明書，還是他的實力真的差到如此地步，如果你問我，我會覺得是前者。沒錯，巴舒亞伊的質素不高，但也有二線頭吧？他的勤於跑動也是相當不錯的替補人選。只是要勉強他作柱躉中鋒，做支點接應高波二傳，又未免有點強人所難吧？

無論如何，巴舒亞伊已經借走，也找來了干地一直尋找的制空中鋒基奧特。但要鬧排陣和人選，或者我寫多1篇文都未鬧得晒。簡單直接點，我就這半季的排陣和出場人選有以下控訴：
1）唔好再出7防守球員陣對弱旅了，已經3中堅、2翼衛，再加個簡迪，真係有必要出埋巴卡約高打防中？前面孤軍作戰得好慘呀！
2）如果卡希爾、巴卡約高再發夢就直接後備啦，雷斯你都係咁做，真係冇人選咩？我哋仲有魯迪加，仲有真禾特法比，你要揀仲可以用安柏度。係可能唔夠級數，但態度都好重要，冇理由由佢哋差落去。
3）後衛默契真係好緊要，除咗azp之外到而家其餘2個人選好似都冇穩定過。我明要輪換呀，但係咪可以唔好今場基斯甸臣+卡希爾，下場又變魯迪加+卡希爾呢？最大問題，唔係淨係同位置調動，而係一個球員，有時打中中堅有時打左中堅呀！4）如果雙中場唔夠搶就打3中場啦，買咗巴克利、真禾特復出，其實除咗簡迪防中位置不能動搖外，另外2個中場位真係好多好多選擇。尤其是基奧特買埋可以踢到雙箭頭，希望352唔會令我哋失望。
5）上季343成功唔代表今季都可以，中前場斷層真係斷得好緊要，三中堅亦唔見得非常穩健。既然原本車仔應該有能力保持控球壓制對手，係咪一定要堅持3中堅？會唔會諗下回到4231？

鬧咗好多，因為於我而言，連續被般尼矛夫、屈福特大炒，係一場恥辱。就算呢半季陣容有幾天殘地缺，就算你話罪名不能全怪罪領隊排陣都好，咁樣嘅戰績就係不能接受。如果你問我，今季對般尼、對水晶宮、對韋斯咸，加埋呢2場嘅表現，我會覺得今季已經失望夠。

所以，認真講嘅，我支持車路士，我亦信干地，希望經過今次震盪、經過1月轉會窗總算完整了陣容後，你唔會再令我哋失望。唔係要求咩新加盟球員立即fit in球員，但至少，俾我哋見到呢隊車路士會重上正軌。