《後備席上的一號門將 - 卡巴尼路》 精選

-請支持藍獅 Facebook專頁-
《原創文章 歡迎轉載 請列明出處 謝謝》

．圖片來源 : Daily Express

身為列強擁有兩名具實力既門將絕對不是一件意外的事，即使其中一名或會長居後備，但一個賽季流流長而且多線作戰，總有需要到佢上場表演既時候。而近日，由於車路士正選門將古圖爾斯在對陣白禮頓賽前訓練時受傷，引致卡巴尼路再次得到上陣機會，亦係佢今季第一次代表藍軍在聯賽上陣，更助球隊保住清白之身。一齊回顧一下哩位前曼城門將既過去。

相信喺上季未完結之前無球迷會諗到卡巴尼路會被哥迪奧拿放棄，事因喺佢上任不久，就從母會巴塞隆拿高價收購當打門將巴禾，迎合戰術體系，取代本身表現不俗既祖赫特，更將後者外借流放到意大利拖連奴。但哥迪奧拿誓都估唔到，愛將巴禾第一季既表現可以用上「慘不忍睹」四字來作總結，基本上只要對手有起腳機會，巴禾都有好大機會撲救失敗，而且迎接高波既手法亦達到恐怖級別，更被不少球迷取笑為「禾大仙」有球必應。喺巴禾尚未適應同時需要冷靜期之時，機會就靜俏俏咁溜入左喺後備門將卡巴尼路手中。
卡巴尼路可算是跟隨前領隊智利工程師柏歷堅尼黎到曼城，而主要係當時擔任門將祖赫特既副手，同時亦為盃賽正選門將，但在場上偶然有甩漏，所以並不得到球迷歡心。到今季下半季階段，聯賽上陣數字係自佢加盟藍月亮以黎最高，一共以正選身份上陣17場，失左13個波，當中有7場為球隊保住清白之身，以臨危受命既後備門將黎講，哩個數據絕對擺得上大枱見得人，與巴禾拍埋兩者既表現完全係天淵之別，相信唔少曼城球迷對佢有突破性既改觀。

可惜哥迪奧拿並唔係一個隨便既領隊，對球員同戰術擁有一份無堅不摧既執著，佢絕不輕易放棄一手引入既巴禾既，祖赫特定必不能再在曼城立足，而三十有六既卡巴尼路亦成為清洗對象之一，而哥帥從賓菲加高價引入艾達臣與巴禾輪流競爭；車路士第二門將比高域轉投到般尼茅夫後，位置上的確需要進行補充，而以免轉會費方式由曼城引進卡巴尼路絕對係一個明智之舉。
球員已經在英超打滾三個球季，適應力絕對唔需要懷疑，而且能夠帶到經驗分享比古圖爾斯。自今季加盟後一共為藍軍在六場賽事上把關，包括一啲本土盃賽以及近期對白禮頓聯賽一仗，雖然有一下受爭議既攔截未有被球証判罰十二碼，但多番為藍軍力挽狂瀾保清白之身亦應記一功。車路士擁有一位具實力以及表現穩定既後備門將實屬球迷之福。

記著後備席上的一號門將，佢叫卡巴尼路。

文章最後更新時間 : 22/01/2018 21:30

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/