集體輕率的代價

新球季以當頭棒喝拉開序幕。二比四敗局絕對係合理結果,同時,亦係最理想嘅開季方式。

皇馬呢個夏天非常動盪,施丹請辭丙朗離隊高華錫遠走摩迪轉會傳聞,帶來嘅效果一一喺今場顯現。

給領隊的最佳禮物
盧比迪古嘅足球哲學就係高壓迫搶、傳控足球。踢落似係施丹執教時代嘅足球,但對攻守平衡嘅專注,暫時睇黎差得遠。

今場比賽皇馬打得最好嘅就係整個上半場,每個球員都fresh leg,走動好多、好靈活,迫搶、包夾、壓前做得好快好到位。唔計頭一分鐘果球孤寒on9波,上半場嘅表現係好有皇者風範。

施蒙尼嘅馬體會以頂級嘅防守紀律守和半場,球員進入下半場依然體能充沛。相反,因為不斷全速跑動,皇馬嘅行軍速度喺下半場每況愈下,局勢開始向馬體會傾斜。施蒙尼就係蓄勢喺下半場反擊。

比起施蒙尼,盧比迪古似乎過於輕率,亦太過自信。點解喺54分鐘換走場上最年青嘅阿辛斯奧?係咪太過有信心喺90分鐘解決比賽?明知馬體會反壓,點解唔留阿辛斯奧走位打反擊?跑動多、變數更多嘅決賽,點解要喺早段就換人?如果咁認同摩迪岩岩放完大假嘅影響力,點解唔一早放正選?

更甚嘅係,拉莫斯入波之後,76分鐘就換走卡斯美路,點解喺最需要守嘅時候換走佢?就算係因傷而換,點解換施巴約斯?當時場上已經有摩迪、卻奧斯、伊斯高,如果想加強控球率,以上三位球員嘅控制力已經好足夠,而且呢個換人,係以犧牲防守性而作岀。既然係咁,何不岀華斯基斯,同卡華積穩守右路?或者以羅蘭迪、甚至用拿祖客串防中?上季同前季已經見過,無防中嘅時候禁區頂往往留有空檔,第三、四球都係同一位置失波。

決賽就係決賽,the best thing never come easy。順景波唔難踢,逆景波先見真章。作為冠軍領隊,必須要平衡各種因素、留有後著應付突發狀況。今日呢場敗仗,係比盧比迪古最好嘅開工利是。

輕率的隊長們
當然,要反省嘅點少得兩位隊長。拉莫斯第一球有得頂又唔頂,第三球喺禁區頂都到要傳比好明顯未攞好位、無為意嘅華拉尼。之於馬些路,high大左勾番個波入黎,之後嘅就已經係歷史。

事實上,感覺到兩位隊長踢起黎有點仿佛、失去專注。當然華拉尼同卡華查都有好大責任,不過失第二球時,見到後兩者揼心屌鬼嘅場面,相比兩位隊長,就知道邊個神遊、邊個集中。

喺呢個moment,更加令人想起前度,想起丙朗,想起佢嘅鬥心驅使佢去屌醒隊友嘅場面。有時候,一個球員會發揮超過戰術嘅影響力,丙朗嘅態度同鬥心帶岀嘅感染力,喺今後日子,係各位骨幹需要負起嘅責任。

未來的啓示
當然,呢場波其實都有可取之處。後生仔表現對板有鬥心,施巴約斯嘅反搶做得唔錯、馬約拿喺生死關頭拼命表現、巴利狀態得好、賓施馬表現應有實力、華拉尼大熟大勇、卡斯美路攔截依然可靠。重有季前賽雲尼捷斯令人興奮嘅表現,呢啲全部都係今季重要嘅力量。

之但係,今場最令人擔心係防中嘅替代,如果今場高華錫喺度,換入嘅一定係佢,而唔係施巴約斯。喺球隊配置和戰術角度而言,高華錫嘅影響力舉足輕重。暫時未見有球員可以擔當佢嘅第二防中兼中場發電機位置。寄望華維迪同羅蘭迪可以有銳變嘅表現。

最後,今場可以話係摩迪加盟以來表現最為失色嘅一場,明顯唔夠狀態。但眼神和動作透露嘅信息,似乎係心不在焉更加多。希望8月31之後,重見到您著住10嘅白色球衣。

留言


請按此登錄後留言。未成為會員? 立即註冊
    快捷鍵:←
    快捷鍵:→