對陣馬體會後的啟示

卡斯米路發揮高效
今場對陣馬體會既比賽,其實球隊總體發揮出色,當中卡斯米路既表現由其突出。本場比賽卡斯米路坐鎮正防守中場,完全發揮到本身極為出色的攔截能力,每每能夠係五五波之爭中嬴出。同為防守中場,皇馬球迷可以回想印象中既基迪拉作比較,何時又見到基迪拉既攔截率如此高效。從球隊人員儲備而言,卡斯米路的功用舉足輕重,事關佢係皇馬陣中唯一一位防守中場。上一篇文章重提到摩迪及卻奧斯突前迫搶失敗後,無人包位既問題,今場卡斯米路就成功填補。比賽進程中重可以經常見到卡斯米路出現係禁區頂心臟地帶力挽狂攔。而且有左卡斯米路後,兩位中堅可以更加緊守禁區既作用更加不容忽視。

球迷會問,既然佢咁好波,咁點解平時唔擺佢打正選啊?我認為首先(其實唔係主要原因)因為佢心態重未夠成熟,例如周中歐聯對陣馬模既比賽,見到好多球迷喺討論區話佢廢、踢得唔好,其實背後原因好可能係佢心態放鬆、輕敵,致使狀態下滑。更重要既主因係,皇馬既金鑽陣容留不下佢既位置,亦因此我認為球隊需要係無卡斯米路的情況下,想辦法填補防守空缺。

卡華積傷出留下弱點攻擊
卡華積既傷出絕對為球隊失分留下敗筆。卡華積在陣時往往能為皇馬的進攻帶來左右均衡的闊度和力度,例如今場就傳中助攻賓施馬破門。卡華積另一個功效係,佢活力充沛,隊型整體推進時佢往往能夠跟上之餘,重能夠突破對方打開缺口。卡華積傷出前既球隊,與換入艾比路亞後形成鮮明對比。從進攻而言,基本上艾比路亞既作用已甚少。佢唔夠快,跟唔上隊型上落節奏,有幾次見到華拉尼想傳波去右路,但艾比路亞太慢落唔切去接應。從防守而言,艾比路亞亦因為唔夠快(好遺憾),緊迫做得唔足之餘,往往重會比人屈速,不斷被(弱點)攻擊。一個絕佳既綜合例子就係失分一球,艾比路亞慢條斯理於右路接應控球,結果被攔截成功,繼而被爆落底線傳中入球。接下來的賽程,沒有卡華積及丹尼路,球隊的進攻及防守將會進一步受到打擊。

肥賓調動失誤
容我馬後炮的講,我認為肥賓於對陣馬體會比賽中最錯的調動就係換走左賓斯馬。賓斯馬被入替時間約七十分鐘左右的時份,其時皇馬領先一球,而馬體會氣勢極為高漲。此時,皇馬最需要既係穩守突擊。似陳相識,偏偏無左賓斯馬就做唔到。賓斯馬既控球、身位、平衝、靈活係球隊被壓住黎打時,往往可以穩定皮球、製造反擊。自從賓施馬被入替,皇馬場中已無球員可力壓對手下控穩高球,結果皮球頻頻落到馬體會腳下。此外,作為陣中剩餘能夠與C朗心有靈犀打天下既戰將,無左賓施馬基本上C朗都無左好多機會。重要留意一點係,賓施馬被換走後,鏡頭特意重播賓施馬神情似乎不甚滿意。隨著球隊戰績既搖擺,這些細微既心理會否變成球隊隱憂,就讓我們容後驗證。

皇馬戰績一般 不容再失  
今仗對陣馬體會本應把握巴塞隆拿連敗切爾達、西維爾的喜訊順登榜首,誰知完場前十分鐘被追平。咁樣既結果對皇馬黎講實屬參差。現時排西甲頭五位既球隊都各戰七場,由榜首至第五位分別係維拉利爾(16分)、皇馬(15分)、切爾達(15分)、巴塞(15分)、馬體會(13分)。皇馬最近先後對戰畢爾包、馬拉加及馬德里體育會,取得一勝兩和的不敗成績,聽落算係不俗。但如果話比大家聽我地既萬年死敵巴塞隆拿都已經對戰以上三隊並全取三勝,你會否重覺得滿意?此外,大家重要留意一下皇馬未來的賽程,將要對陣多支上游球隊:切爾達、西維爾、巴塞、維拉利爾。作為球迷,停一停,諗一諗,其實皇馬係對陣強隊時仍然存在好大缺陷。

進攻單一 傷兵滿營
皇馬現時進攻最大問題係板斧單一。對陣馬拉加、馬模及馬體會的比賽,皇馬的攻勢幾乎都來自左右兩邊傳中。但對陣此等會堅守禁區的球隊,利用傳中破門就需要多些運氣、或對手失誤才能增加效率。賓尼迪斯的球隊有一個共通點,就係缺少「球味」,或者叫球員的靈性、創造性,而要打破陣地戰,往往需要這些特點。最近消息指占士仍需傷出多三星期,此消息將進一步打擊球隊的進攻模式。占士的特點係小範圍技術好,常見於敵方禁區邊沿位置控球,有利球隊在心臟地帶增加威脅。占士亦擅於背身控球後盤過對手,製造人多打人少局面。此外占士的後上射門及神來之筆,更係進攻打開缺口的一大板斧。於未來的短時間內,似乎就要寄望伊斯高擺脫迷失,為球隊爭取心臟地帶製造更多威脅;或者係馬些路的突破更起作用了。

最後,球迷亦需留意隊伍於季初時間已傷兵滿營,先有拉莫斯、巴利;現有卡華積、丹尼路、比比、占士。如此多的傷患,是否反映教練的訓練方式有問題呢?


留言


請按此登錄後留言。未成為會員? 立即註冊
  • 樂爺 於 05/10/2015 評論 NO. 1

    蝗馬狗一個字垃圾,對住馬體就收曬皮,唔係十二碼飛機,蝗馬狗輸撚埋。

  • 基奧特 於 05/10/2015 評論 NO. 2

    傻的嗎,球十二碼被navas救左,精華都唔睇吾好係到吵

快捷鍵:←
快捷鍵:→