盧比迪古?Sorry, but no

西甲皇馬又輸一場,佩雷斯年代最差開局,竟然有人比賓尼迪斯更差。輸三球比西維爾您話強隊都算,跟手和馬體會都叫比季初超級盃有進步,然後作客中央陸軍當佢無運,今日再比艾拉維斯絕殺,比人感覺係老鼠拉龜。

原來時間係會沖淡一切,原來作為場場都睇足比賽嘅皇馬球迷,我已經差不多忘記左上季重喺施丹帶領下嘅皇馬究竟點樣比賽。好似每個動作都好合理,好似每個球員都發揮緊自己,好似成隊波都好生猛,好似球隊有著自己節奏,好似施丹總能喺絕境時候從四方帽子變岀兔仔。

從不相信盧比迪古
今年夏天嘅球壇好熱鬧,世界盃期間竟然宣布盧比迪古接任,重要跟手比人炒左。老實說,由果一刻起我自己就唔相信佢係適合皇馬嘅人選,因為似乎佢缺少喺皇馬成功帶隊所需要嘅人格魅力。作為當時人,有乜理由唔理解到呢個唔係宣布嘅好時機。而且就算佢本人被迫,咁都只係代表佢註定沒有權勢。再者,之前嘅執教覆歷頂多係青年隊錦標,喺波圖重要被炒,黎到皇馬更衣室,喺呢啲關鍵時刻,重要唔識審時度勢,佢嘅說話份量高極有限。

當然,喺一支頂級嘅專業球隊𥚃面,只要領隊係有實力嘅話,球員都一定會尊重佢。但我認為盧比迪古並無如此本事。無他,因為佢從來只有一把劍,沒有其他板斧。控制戰局時搓波,進攻時搓波,落後時搓波,明知比人打反擊,頂,總之都係圍住禁區,由左搓到右,再由右搓到左,然後傳中。搓波係不變嘅理念,可變嘅只有提升節奏,或者換其他球員,然後做番同樣嘅嘢,再唔係,用攻中換防中,但都係圍住黎搓。簡單黎講,就係醜陋又半吊子嘅tiki taka。

只有一隊tiki taka
我認為,世上唯一踢到真正嘅tiki taka嘅球隊,只有哥迪奧拿當年帶隊、擁有艾維斯、布斯基斯、沙維、小白、美斯、韋拿嘅果隊巴塞隆拿。整體上就係前場緊迫同傳控,實際上係有一班岩嘅球員去成就呢個踢法。沙維係好串咀,但係佢作為大腦,極佳球感,調控節奏,永遠保持進取和警惕破綻,皇馬係一次又一次咁比佢突然性嘅傳球撕破,佢絕對係呢種踢法嘅關鍵。然後再有小白嘅怪腳、美斯嘅無解突破、韋拿嘅盲眼失位、艾維斯極高效嘅助攻,根本係無可複製。事實上,沙維退役之後,球壇岀現好多好多似是而非嘅tiki taka,但無一隊能夠取得成功。盧比迪古帶著相似嘅理念和體系黎到皇馬,似乎太過天真。

因此,我地會見到球隊用傳球不斷不斷推進,然後到對方禁區頂就老鼠拉龜。當岀現呢種情況,先發覺原來面對嘅種局面,皇馬根本無從入手。因為面對大巴嘅時候,巴利同阿辛斯奧唔能夠好似美斯咁小範圍強行突破,伊斯高再好波都唔似小白有沙維、韋拿同佢心有靈犀,賓斯馬拉邊做波令到球隊少左韋拿呢類侍機走位嘅前鋒。

無所適從
為左呢種踢法,好多球員根本發揮唔到。點解摩迪要放棄控球權打攻中、點解要將呢個世上最好嘅中場變成攻中、對手千方百計要防止摩迪觸球,盧比迪古竟然安排摩迪打攻中,比人封哂接球路線,變相削弱摩迪影響力,此為何解?點解阿辛斯奧淨係識回傳、鳭斬,唔見哂閃光時刻?點解華斯基斯岀親場唔知喺度做緊乜?點解拿祖打閘位永遠都係企喺度傳波。因為盧比迪古嘅體系令進攻空間嚴重壓縮,無空間、無翼位、無轉變節奏,所以球員無所適從,所以換極人都無效果。唔係球員唔掂,係個體系一開始就唔掂。

試舉例說明之,以今場為例,賓斯馬同馬里安奴根本做同樣嘅野,就係做接球點、拉邊、入禁區搶點,既然要打破悶局,點解唔直接打多個前鋒增加禁區威脅性?另外,用阿辛斯奧換入卡斯美路,好似好正路,但其實阿辛斯奧喺呢種無空間嘅局面更難發揮,佢係盤球細膩、加速快,但係幾乎無招式突破、無突然變向、無右腳盤球,比對手完封左腳,因此只能回傳、橫帶、early cross,呢種局面,華斯基斯係咪更應該岀現?而且,由頭到尾皇馬都有充足嘅控球,有摩迪同卻奧斯,今場施巴約斯幾乎重疊位置,與其換走卡斯美路,不如留番喺度補位,起碼可以留番本錢比球隊全軍進攻,比留下施巴約斯更有價值。此外,施巴約斯確係滿場飛,但似係隨意、無目的走位,位置又遠離禁區,控球功能重疊,而未能製造威脅,點解重留喺場上?最後係八十分鐘換入雲尼素斯,盧比迪古係期望呢個十八歲仔可以做到巴利、賓施馬、阿辛斯奧都做唔到、打破僵局嘅任務?同樣地,點解唔相信華斯基斯?呢個調動係對剛剛上陣嘅後生仔嘅重擔,更加係對隊內重要角色球員嘅自尊傷害。我認為,盧比迪古今場嘅調動係徹底失敗,根本係諗唔到點做,根本無其他方法。

Sorry, but no
作為領隊,知人善用好重要,係基本,但佢淨係一味盲信自己嘅理念,忽略球員嘅特性長處,相比而言,係咪更應該諗下點樣最大發揮球員嘅長處?當體系被研究通透,又缺少應變計劃,咁樣一成不變嘅足球,係註定唔會成功。

我見到一啲外國嘅球迷網呼籲大家相信皇馬相信盧帥,但抱歉,我唔鼓吹呢個諗法。就好似你會愛一個國家,但你唔會愛一個政府。我相信並支持皇馬,但盧比迪古?就不了。

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
  • iamagoodboy
    iamagoodboy 於 07/10/2018 評論 NO. 1

    沙維未退休,上星期先踢完亜冠

快捷鍵:←
快捷鍵:→