【賽事分析】20190113 港超聯 ~ 香港飛馬 1：1 佳聯元朗 - 球證你真好嘢 ! 精選

香港球證，有睇開本地波都知哩個唔係中性詞，係1個問題。
本身香港球證執法已經唔少詬病，所以偶然1場執法無問題已經值得鼓掌。但今場吳超覺執法實在太離譜，球員犯規其實係1件正常不過之事，球證只要作出適當判罰就無咩問題，事與願違，每次係每次都等到元朗球員比人犯規又推又拉又踢到五勞七傷，球證先捨得勉強拎張黃牌。本身元朗球員身型都單薄，咁樣比人犯規法，唔傷真係要還神。今場咁既執法，元朗球迷梗係好好招呼球證，唯球證極邪惡，愈招呼佢愈執法不一，當以為佢尾段變番正常，佢就整個回馬槍12碼孝敬。當然，杜馬思是否有手球，筆者都答唔到你，精華片段亦係睇唔到。其實下半場飛馬就有球禁區手球，球證當見唔到，當時就無同球證計，最後補時整球咁既爭議性12碼就真係佛都有火。為何總受傷是元朗 ? 之前都唔少例子：前季主場對東方，補時爭議性罰球比東方絕殺咗。上季主場對大埔，補時撞龍入波都照計數。有無咁巧合次次比人絕平絕殺都係有問題既波 ?正選陣容
前鋒：13 陳廣豪 25 卡立
中場：17 陳柏衡 10 基爾頓 6 基斯 11 葉子俊 15 陳曉鋒
後衛：30 王睿 22 法比奧 3 杜馬思龍門：1 陳嘉豪
賽初陣式：352
戰術：高壓迫搶
What I saw
講完衰野，講番啲理性野。今場MVP，筆者會俾陳嘉豪，作出4次成功撲救，2次出擊擋出飛馬射門，可以領先都好大功勞歸功於陳嘉豪，不過開龍門波同打手鎚真係仍再要改善。王睿表現就及格以上再高多啲，肯搏肯埋身，有活力，成功將佐佐木周，查維斯，祖連奴威脅減到好低，可能腳下功夫要再苦練，始終中堅底。陳廣豪就時打邊時打中，打邊就多數無威脅，筆者都知練埋佢打邊能力需要時間，暫時只可講都係打中最有威脅。其實場波係高速率發展，飛馬主要都係長傳打元朗身後，而元朗三中堅人數夠多好大程度輕易化解長傳，元朗則反擊唔夠速度，身型唔夠高大，大家成場都係度刷角球刷罰球，以致遲遲都無入波出現。下半場開始見到元朗變成4後衛，法比奧有時上到防中位俾波，換埋張健峰入嚟就推斷郭嘉諾想贏波。
郭嘉諾
改善方面：葉子俊體力真係頂唔到70分鐘咁耐，反擊速度問題
讚方面：三中堅防守較穩固，睇得出係穩中求勝，出卡立作奇兵，發掘卡立係有靚傳能力
3個換人
張健峰>葉子俊 72'：攻上去
黎格爾>卡立 87'： 下半場中段卡立就無乜體力
慕沙>基爾頓 87'：卡立出嚟要換番中鋒入去
總括，雖然係打持久戰，但防守的確提高咗，話晒飛馬都屬於高攻1隊，都只能靠12碼追平。球證啲野再唔係我哋控制，望就望下次不再見，多謝。
相隔幾個月元朗球迷TV回歸 第7集
https://www.youtube.com/watch?v=hqhQp8udRpA圖片來源：元朗足球隊facebook，We are facebook