【最貴中堅】雲迪克獲選為英超年度最佳球員

利永遠不會毒行 於 29/04/2019 發表 收藏文章
尋晚舉辦嘅英國職業球員工會(PFA)頒獎禮於倫敦舉行,雲迪克力壓史達寧成為英國職業球員工會(PFA)選出嘅英超最佳球員。雲迪克得獎都唔算咁驚訝,佢都算大熱勝出呀!但今年呢個頒獎禮最具爭議嘅獎...曼聯嘅普巴竟然都可以入選年度最佳陣容,而佢正係取代咗夏薩特嘅位置!

最佳球員
雲迪克力壓一眾競敵成為最佳球員,全因為佢令利物浦嘅防線完全升級!今季英超紅軍只係輸過一場比賽,同埋可以保持到18場不失球呢個咁好嘅成績。所以,佢拎到呢個獎都係實致名歸。其實雲迪克都識英雄重英雄,雖然曼城同利物浦爭緊英超冠軍,但其實佢早前同傳媒透露過,佢年度最佳球員果票係投咗俾史達寧-另一位熱門會贏出嘅曼城球員。喺先前嘅訪問入面,雲迪克就話佢認為曼城今年踢得好好,除咗史達寧之外,佢都好欣賞賓拿度施華。之不過因為史達寧今季進步得好快,所以呢票就俾咗佢啦~
睇返個名單,原來文尼、史達寧、阿古路、賓拿度施華、夏薩特,呢啲都係雲迪克嘅對手,不過笑到最後嗰個... 係雲迪克!

最佳陣容

雲迪克攞獎都係實至名歸嘅,之但係喺最佳陣容入面有普巴嘅出現就真係好「神奇」喇!
普巴係唯一一個非曼城、利物浦球員入選最佳陣容。睇返個陣先,曼城有艾達臣、拉撲迪、費蘭甸奴、阿古路、賓拿度施華、史達寧。而利物浦就有雲迪克、羅拔臣、阿歷山大阿諾、文尼。兩隊爭冠軍爭到風頭火勢,唔知喺邊度就殺個普巴出黎。雖然普巴今季有段時間係踢得唔錯,但單計數據嘅話,同樣係中場位置嘅夏薩特、艾歷臣今季真係踢得好過普巴好多,所以,好多球迷都質疑呢個最佳陣容嘅認受性。
呢個頒獎禮嘅玩法其實係透過英超球員投票,去選出最佳球員﹑陣容等等。所以,理論上只要你夠多朋友,要入選其實不是夢。

今屆嘅選舉亦係45年來,候選名單只有3隊球隊嘅球員入選嘅一屆,個機制係點,小妹就唔評論啦。而雲迪克唔係第一位利物浦球員奪得最佳球員呢個獎項,就講返上屆咋嘛,沙拿就係得獎者。而蘇亞雷斯 (2013-14)、謝拉特 (2005-06)、班尼斯 (1987-88)、魯殊 (1983-84)、杜格利殊 (1982-83)、麥德蒙 (1979-80)都曾經拎過呢個獎項!

但點都好啦,拎到獎,開心完,又係時間返去專心踢波啦。話就話而家英超處於被動狀態,但係都要做好自己,剩低嘅比賽要全勝先得嘛!而歐聯方面,5月2又要作客巴塞...真係唔可以心散呀!


source:the guardiantelegraphdailymailliverpoolecho

留言


請按此登錄後留言。未成為會員? 立即註冊
    快捷鍵:←
    快捷鍵:→