【SAD10】有咩慘得過踢緊歐聯果陣屋企俾人爆格?

利永遠不會毒行 於 22/02/2019 發表 收藏文章
有咩慘得過踢緊歐聯果陣屋企俾人爆格,就係有2次踢緊歐聯果陣屋企都俾人爆格!係俾人爆格兩次呀!
利物浦前鋒文尼喺對拜仁嘅歐聯十六強第一回合比賽時,講緊真係喺晏菲路踢緊波果陣,就被賊人入屋爆竊,警方估計,賊人於晚上6時到11時45分闖入文尼位於南利物浦Allerton嘅住所,偷走數隻名錶﹑手提電話以及車匙。
而默西賽德郡調查員 Phil Mahon亦希望目擊到案件發生嘅市民主動聯絡警方,協助調查。更公開表示希望犯人自首,將贓物交還事主。Mahon更指出手錶呢家野可以價值不菲,呼籲如果有商店懷疑有人拎啲贓物出嚟賣,就立即聯絡警方。

其實喺年幾2年前,即係2017年11月,亦係踢緊歐聯比賽,一樣係主場,文尼喺踢緊對Maribor嘅賽事時,屋企被人入屋爆竊。當時賊人去文尼間屋偷完野之後,仲「順路」爆埋住係附近,利物浦隊友路夫蘭住所,據知賊人當時打爆路夫蘭屋企露台門,驚動周邊市民報警。
其實利物浦球員都成日俾人偷野,話說早喺2007年嘅歐聯比賽時段,謝拉特屋企亦成為賊人目標。當年佢老婆Alex仲被匪徒面對面威脅,話如果唔俾晒啲珠寶手飾匪徒,就會殺咗佢啲小朋友。不過最後賊人都被繩之於法,仲被判入監7年4個月。
2017年1月,一班蒙面嘅匪徒襯住費明奴一家唔係屋企時入屋爆竊,偷走總值7萬英嘅珠寶﹑手錶以及衣服。
而多位前利物浦球員好似古治﹑連拿﹑羅比堅尼﹑盧卡斯利華﹑艾加﹑杜迪克同埋高治嘅屋企都不幸被爆竊過,睇返當年嘅隊相,成半隊都俾人爆過格...

默西賽德郡嘅目標並唔只係利物浦球員,愛華頓球員亦都不幸地中過招-愛華頓隊長菲臘積基卡就曾經被匪徒持械入屋行劫,連架代步嘅Range Rover 都俾人偷嚟走佬用。

希望呢單野唔會影響到文尼嘅心情,(估計佢都有買保險嘅),因為星期日對曼聯嘅賽事...WE NEED MANE!!!!!!

SOURCE:FOX sports mirror

留言


請按此登錄後留言。未成為會員? 立即註冊
    快捷鍵:←
    快捷鍵:→