【我著一號】艾利臣暗示自己想要一號波衫,卡利奧斯點算呀?

利永遠不會毒行 於 30/07/2018 發表 收藏文章
利物浦岩岩早兩日對曼聯嘅國際冠軍球會盃比賽,最終紅軍係以4:1擊敗曼聯,當中新加盟嘅沙基利嘅表現更可以話係十分出色,呢筆收購真係小編都覺得「扺Deal」,而傷完嘅沙拿都有唔錯嘅狀態,新賽季高普應該會面臨著幸福嘅煩惱。另一方面,新買嘅巴西國門艾利臣亦都岩岩同球隊匯合左,佢以6500萬英鎊嘅價錢從羅馬轉投,呢個轉會費亦都打破左門將身價嘅紀錄,相信唔少球迷都會覺得佢將會成為紅軍下個賽季嘅正選門將。而問題就係呢個時候出現啦,呢位巴西門將一路都著緊一號波衫,而紅軍嘅一號波衫主人正正就係卡利奧斯,咁究竟呢位德國人會唔會讓出呢位「正選球衣」呢?
上個球季高普係英超賽場上面俾卡利奧斯同米勞列一人各踢19場比賽,所以其實無分正選同後備,但係去到歐聯決賽高普都係選擇左卡利奧斯做正選,而呢兩位球員上季就分別係卡利奧斯著一號,米勞列著22號,比利時人係利物浦嘅五個賽季都係著22號球衣所以佢都無話特別想搶呢件一號波衫。但係艾利臣嘅到來令到情況有變,巴西人宜家已經同球隊一齊集訓,而佢極有可能可以係下星期六對陣拿玻里嘅比賽上陣,不過有趣嘅係佢係自己社交網絡上面發放左一張圖片,圖片入面艾利臣用左上「AB1」嘅Hashtag,相信大家都心水清知道意思係等於艾利臣比加1,Alisson Becker。
但係外界就認為卡利奧斯就唔想讓出自己嘅一號波衫,佢係過去兩個球季都著住利物浦嘅一號波衫,更加用上左LK1嘅Hashtag,就連佢自己架車上面都有LK1嘅標誌。小編就覺得卡利奧斯應該唔會放棄呢件一號波衫,而球會方面應該都唔會強迫佢咁做,但係就算留得住件波衫,下個球季嘅一號門將都極有可能會係艾利臣而唔再係卡利奧斯。有消息報導指出,利物浦就希望賣走米勞列去套現,由於今年夏天紅軍擴軍都用左好多錢,比利時人都離開或者可以填補返紅軍嘅資金,有傳好多間英超球會都有意買入米勞列,但係佢都首先要係工資上面達成共識,始終離開左利物浦,佢都必須要接受降薪嘅事實。不過相信星期六對陣拿玻里嘅比賽,就會知道艾利臣揀左件咩號碼嘅球衣,如果真係一號,卡利奧斯被迫到去呢個情況下又會唔會離開利物浦呢?大家又可以多一個理由留意一下呢場比賽啦。
標籤: 艾利臣  利物浦  一號  卡利奧斯  

留言


請按此登錄後留言。未成為會員? 立即註冊
    快捷鍵:←
    快捷鍵:→