【史杜列治救贖機會】利物浦國冠盃迎戰曼城 精選

世界盃踢完之後相信一眾球迷都覺得空虛同寂寞，而聽日就會有國冠盃嘅比賽進行，除左有拜仁﹑祖雲達斯﹑曼聯同AC米蘭之外，曼城對利物浦呢場比賽應該都會吸引到球迷既注意。雖然現時雙方嘅陣容都唔算完整，而兩隊都係第一場嘅比賽被多蒙特擊敗，但係兩隊有可能都係會派出正負選參半既陣容去迎戰，同時呢場比賽亦係試探一下雙方陣容同戰術嘅好機會，特別係行物浦今季參入多名球員。曼城方面一班有份踢世界盃嘅球員仍然未歸隊，所以正選方面應該一定會派上德國翼鋒辛尼同埋新收購嘅馬列斯，再加上一班小將例如戴亞同辛真高等等。
門將位置上面雖然祖赫特有隨隊，但係眾所周知呢位英格蘭人根本唔會有出場嘅機會，所以巴禾更有可能繼續正選。另外曼城近日都同祖雲達斯嘅比真歷傳得好埋，但係哥迪奧拿就表示:「比真歷係祖雲達斯嘅球員，我地對佢無任何興趣，距離轉會窗完結仲有幾個星期，我地會決定係咪應該繼續買人，不過目前我對於宜家嘅陣容都好滿意，我地每個位置上面都有幾個好球員。」換言之，曼城有可能會係未來兩個星期入面有所動作，但係肯定嘅係比真歷唔會轉到英超發展。講返利物浦啦，紅軍嘅陣容都唔算完整，雖然沙拿同文尼已經歸隊，但呢場比賽佢兩個應該只會做坐上客，未必會上陣。而新加盟嘅拿比基達同埋法賓奴係之前幾場比賽都有份踢，因此呢場比賽亦有機會會正選上陣。小編比較想講嘅係史杜列治，呢個曾經邊緣過嘅前鋒係熱身賽交出左唔錯嘅表現，而高普更點名想同佢續約，利物浦方面亦都已經開始考慮緊高普嘅意見。上個賽季史杜列治被外借出去西布朗，當時個個都以為呢個英格蘭前鋒同利物浦已經行到終點，由於佢實在太容易受傷，所以效力西布朗期間佢都只係踢左6場比賽。不過今季返到利物浦之後，史杜列治用自己嘅態度同表現打動到高普，佢係季前熱身賽已經攻入左3球。宜家史杜列治同利物浦嘅合約去到出年6月就到期，而佢目前嘅週薪係12萬英鎊，消息指出高普願意再次俾機會呢位英格蘭人，如果球會決定同佢續約，相信佢本人亦都會好滿意地接受。小編就覺得史杜列治留係利物浦亦都會唔錯，因為正選嘅應該會繼續係費明奴，史杜列治有望成為球隊嘅第二前鋒，下季利物浦亦都需要多線作賽，所以其實繼續留隊亦都不乏上陣機會。聽日同曼城嘅比賽，史杜列治亦都有望正選，如果佢對曼城又入到波，相信亦都會加快球會同佢續約。而另一個前鋒奧歷治就無咁好彩，上季外借完之後靈氣盡失，更被利物浦放上架。