【爽手買得過呀】紅軍有望轉會窗前敲定費基亞?

利永遠不會毒行 於 31/05/2018 發表 收藏文章
利物浦今年買人既動作可以話係十分爽快,上年已經肯定左基達會係今年夏天加盟,而早幾日就極速簽入摩納哥既法賓奴,有消息就指出利物浦希望可以係未來10日內同里昂方面達成共識,買入佢地今季踢到超晒班既費基亞。換句話講,利物浦希望係世界杯之前確定費基亞既加盟。如果呢單轉會成真,巴塞隆拿既迪比利應該就唔會有機會再同高普合作,係呢單轉會之後紅軍應該會再加快步伐去完成埋守門員既補強。
根據最新既轉會消息,利物浦會係未來10日搞掂費基亞既交易,但係其實紅軍仲未向里昂方面提出一次正式既報價。附加資料,宜家費基亞既身價大約係5000萬英鎊,眼見利物浦咁有信心去買人,就證明左高普下一季希望帶領球隊衝擊英超冠軍,而唔在係殺入前四就算。呢一單交易,球員本身都好希望可以去晏菲路球場跟隨高普,費基亞亦已經同里昂既主席表達過自己既意願,更加希望係世界杯開始之前就可以完全一切有關既轉會手續。由於雙方都有意,小編就認為利物浦真係有可能係未來一個禮拜入面簽入費基亞。而里昂既主席就表示自己唔心急去完成呢單交易,因為現時球會既資金狀況十分良好,里昂既主席認為費基亞一代表法國出戰,身價就仍然有上升既空間,所以里昂應該係想要更多既轉會費,但總括黎講,呢單轉會亦好快會成真。
咁小編就簡單講一講費基亞既資料啦,呢位法國藉球員成功入選左法國國家隊最新一期既名單,同時間有機會隨法國隊參與世界杯既賽事。佢係一位90後,宜家只有24歲,可以踢前場多個攻擊位置,可以話係一個前場多面手。費基亞今季一共代表里昂踢左40場比賽,攻入左23個入球同9個助攻。佢既特點就係盤球技術高,傳中度準繩同埋有遠射既功夫,佢加盟左利物浦之後應該可以成為紅軍前場另一把尖刀。
至於買門將個方面,今日最新既消息就係話由於羅馬方面索價太高,紅陣暫時未有進一步既動作去收購巴西國門。另一邊,車路士方面門將古圖斯好似就唔想續約,利物浦亦都會查詢一下比利時人轉會既可能性。但係,紅軍更大機會將目光轉移到巴塞隆拿既後備門將施利臣身上,巴塞方面目前係無意賣走呢位荷蘭門將,但係施利臣既解約金只係6000萬歐元,相比起古圖斯﹑奧比歷同艾利臣需要討價還價,紅軍可以更容易將佢帶到晏菲路球場。現時馬體會門將奧比歷既解約金係1億歐元,即係話施利臣足足平佢4000萬歐元。而艾利臣個方面雖然無解約金,但係羅馬就要價9000萬歐元,即係話買施利臣都會平佢3000萬歐元,小編就覺得施利臣都好值得買,始終佢有一定既實力,應該唔甘心係巴塞做後備,同埋佢亦都十分年輕,可以係未來繼續為利物浦守著大門。

標籤: 利物浦  買人  費基亞  施利臣  高普  

留言


請按此登錄後留言。未成為會員? 立即註冊
  • Paul Sun 於 31/05/2018 評論 NO. 1

    如果60M買個他隊後備 點解唔使多30M買艾利臣 可能仲可以講下價 話唔定70~80M就買到

  • kinfung 於 31/05/2018 評論 NO. 2

    90m買艾利臣點解吾買奧比歷?

  • Paul Sun 於 31/05/2018 評論 NO. 3

    因為奧比歷一定要100M解約 艾利臣可以講價 兩個級數唔差得幾多

  • kinfung 於 31/05/2018 評論 NO. 4

    吾系掛,奧比歷勁過艾利臣好多喎

  • aczephyr 於 31/05/2018 評論 NO. 5

    咪玩啦,高普都未同過奧士文迪比利合作過,又何來再合作?

  • Lee Yik Long 於 01/06/2018 評論 NO. 6

    施利亞成29歲都仲話後生???

  • Lee Yik Long 於 01/06/2018 評論 NO. 7

    施利臣

  • wombat 於 01/06/2018 評論 NO. 8

    之前有篇文話門將訓練員先係死因,讚成咗好耐。 如果唔炒佢,迪基亞返黎都死

  • Alessi 於 01/06/2018 評論 NO. 9

    巴西藉呀

  • supar08 於 02/06/2018 評論 NO. 10

    施利臣1,400萬歐元去巴塞。6000萬去利物浦?簽返oblak/donnaruma/allison算。

快捷鍵:←
快捷鍵:→