【究竟睇緊歐聯定英超】八強利物浦主場迎戰曼城 精選

今晚0245將會上演歐聯八強賽事，利物浦將會主場迎戰曼城。留意返，呢場唔係英超，雖然兩隊都係英超球隊，但係球員波衫印字﹑章以及個波都係同英超唔同架！
其實利物浦曾經係英超比賽中都贏過曼城，對於利物浦劫富濟貧嘅能力小妹絕不懷疑，但講返啲實在啲嘅野先，利物浦今晚個陣真係…好易估！後防方面，傷兵問題極度嚴重呀！首先有祖高美斯喺國家隊受傷，再有馬迪普被指今季剩低嘅時間都要養傷，再睇下仲有咩球員先…咦後備中堅阿卡叔卡拉雲原來都傷喎！

而岩岩好返嘅佳尼就被高普直指未有態，咁條防線就簡單啦，中堅出雲迪克加路夫蘭，左右閘分別係羅拔臣同阿諾。阿諾個態最近都唔係咁好，會有失誤，但係無人揀嘅情況下，估計都會用佢；除非高普肯搏，用占士米拿做右閘（但一定傷阿諾自尊心），如果唔係由路夫蘭逗住阿諾，好大機會變成右路放題。
雖然利物浦防守問題存在，但對方曼城阿古魯都出唔到；而高普曾經贏過哥迪奧拿五次，而係利物浦四次對戰曼城中得到兩場勝仗。打和，super～講笑，認真講，曼城就算無咗阿古魯，但仍然有捷西斯同史達寧，而閘更有辛尼，要阿諾去封鎖到佢的確係有啲難度。辛尼係今季兩場對利物浦嘅賽事中已經入咗3球波，都唔野少。（上場贏曼城右閘利物浦係出祖高美斯）

正所謂俾你估到就唔係利物浦啦！主場氣氛加上其實利物浦早係英超已經同曼城作賽兩次，對於哥迪奧拿會點樣排陣同踢法，高普心水都清架啦應該。曼城快速傳波以及前排互換位置都會係利物浦防守上嘅難題。哥迪奧拿更係賽前講到明週末對曼聯會留力，而家就全力歐聯添！曼城個殺氣係重嘅，佢地係英超只係輸過一場，就係作客輸俾利物浦。你話今次係咪要報仇？以一個女仔嘅角度，在公在私小妹都會答你－係！但我利未驚過，岩架啦，再多啲不利因素啦，利物浦呢隊波真係用數據解釋唔到架，主場之利呀！今晚0245自備平安鐘一齊撐利物浦啦！