【年尾感想】請珍惜你身邊的每一個利迷 精選

今日就係除夕啦，咁呢個時候，小妹緊係要懶係感性咁樣出返篇年尾感想啦！今次想同大家講一樣野－請珍惜你哋身邊嘅利物浦球迷。

點解咁樣講呢？

利物浦球迷擁有以下優點:
1.利物浦球迷心臟負荷力強大
A.利物浦係一隊海鮮波，贏開三球都係輸返三球。平時㩒開平安鐘、食開救心丸，面對特如其來嘅打撃可以保持冷靜，絕對係團隊入面一個重要人物。
2.利物浦球迷有嘅係堅持
A.唔知點解，利物浦嘅球迷無論比賽時間係幾多點都好，風雨不改，都會堅持起身睇波。
3.利物浦球迷十分謙虛
A.由於利物浦係一隊唔讚得嘅球隊，所以利迷就算贏緊波都唔會點樣讚隊波，曾經有球評人丘健威係利物浦贏緊兩球果陣講咗句：「我未試過讚利嘅後防，今次真係值得一讚！」之後就輸返三球。4.利物浦球迷有愛心
A.利物浦係最有善心既強隊，作為球迷支持得愛隊梗係以身作則要撐埋愛隊嘅作風。
5.利物浦球迷專注力高
A.由於利物浦賽事一日未吹雞一日都有變數，利物浦球迷睇波時睇到最尾一分鐘都會保持專注，久然久之，利迷被培養出未到極高嘅專注力。
6.利物浦球迷有耐性而長情
A.無論球員傷出幾耐，利物浦球迷有期望地都會等佢復出，好似京斯咁，絕對唔會因為佢傷佢玻璃腳而放棄佢。7.利物浦球迷嘅創作力量和幻想會嚇你一跳
A.一句「古埃及文明」已經贏足成條街，有見於利物浦後防唔穩陣，連登更有巴打球迷比喻金仔幾時發射導彈同摩蘭奴加路夫蘭呢pair同時在場。同利迷一齊包你一定無悶場兼笑呵呵。


綜合以上各點，利迷絕對係成為男/女朋友、同事、朋友嘅好對像，所以，假如發現你身邊有個利迷，一定要好好愛惜佢、錫住佢呀！

非利迷睇完一定會話係飛機文，不過唔緊要啦，都係想講，2017又好、2018都好，大家最緊要記住珍惜身邊人。係呢一年，小妹見得太多離離別別，所以只希望大家來年身體健康、大家開開心心；做緊野嘅工作順利，讀緊書嘅學業進步；利物浦最好就場場贏波，就算贏唔到，球迷大家都會齊心撐愛隊！