【輪換機制】高普：假如上季我哋有而家嘅陣容，我早就會咁做 精選

高普係最近嘅賽事中不停轉陣，佢亦表示球員都好努力咁去習慣呢個變動。係歐聯小組賽3－3打和西維爾後，利物浦嘅正選陣容場場都有不同。其賽高普嘅原意係好嘅，佢係上年一月黑暗時期時應該見過鬼怕黑。今季開始採用輪換戰術，一來對方估你唔到，二來又可以練下兵（大家都知利物浦球員都幾玻璃腳）。只不過係被追和或者處於下風時，球迷都會想快啲換返見慣見熟有保證嘅球員落場；高普有時都要係3分同埋試練plan B入面取得平衡。
被問到會唔會係星期四晚對西布朗嘅賽事上繼續輪換球員上陣，高普就表示會。

「當你有質素好嘅球員，你就應該使用佢地。」

「假如上季我哋有而家咁嘅陣容，我早就會咁做。」

「就好似上季呢個時間咁，球隊係十一月頭有主力受傷，你做唔到任何變動因為你無球員可以用，到咗一月，我哋就出事了。」
「（打個比喻）當十一月受傷嘅球員係一月傷癒復出，佢唔係即係有態、又或者唔可以立即有受傷前嘅表現。」

「經過咁多場波後，我認為如果球隊入面有優秀嘅球員，你就應該俾佢上陣。」

「因為你無可能永遠用死十一個正選球員，然後其中四位球員受傷，你希望後備出場嘅球員可以即刻有好表現。」

高普都講得岩，雖然有話後備球員要隨時ready，但對於長期坐冷板嘅球員黎講，要佢頂替一個長期正選，係就係機會黎啦飛雲，可以表現自己；只不過球員太耐無落場，突如奇來嘅比賽節奏／壓力亦係後備球員要習慣嘅事。

係呢個輪換機制下，受益最大嘅應該會係蘇蘭基（你睇古積到而家一場英超正選都無呀），自係夏季轉會市場從車路士買佢返黎後，已經係今季英超有兩次正選上陣－分別係對史篤城以及岩岩星期日對愛華頓嘅打吡戰。雖然蘇蘭基係場上並唔獨食，盡量配合對友而走位，但睇返佢同文尼以及沙拿都係無乜默契，呢個組合做唔到一啲有威脅嘅攻勢出黎。相信佢需要更多時間去同呢兩個「小明」去培養默契。
雖然如此，高普對蘇蘭基表現印象深刻，更表示希望呢個聖誕快車期間可以係佢上去一隊嘅過渡期。諗返佢只不過係一個後生仔，要係短時間適個新嘅環境，高普就咁講：
「蘇蘭基係場上應該俾更大嘅信心自己 」

「佢係場上嘅表現同平時嘅訓練有啲唔同，但我哋必須學識點樣去處理期望，球場上嘅氛氛以及比賽嘅重要性。」

「佢係一個聰明嘅球員，佢可以踢得更好。」

估計蘇蘭基係下場將會返到後備藉，費明奴重返佢嘅正選位置。但大家最關心嘅後防，sorry，都係無得變－摩蘭奴、佳尼、馬迪普都傷咗…所以輪換機制並不適合於穩健嘅後防線上 。大家可以放心，路夫蘭、卡拉雲、高美斯、羅拔臣、阿歷山大亞諾，俾埋占士米拿打左閘啦，大家係呢度慢慢揀啦～

source：this is anfield，Liverpoolfc