【小組第二】威爾斯王子活特本

利永遠不會毒行 於 08/09/2017 發表 收藏文章
人稱木燒嘅活特本喺國際賽周成為眾人焦點,話說佢代表威爾斯對奧地利入咗球世界波,對摩爾多瓦亦助攻咗球靚波。

賽後,賓戴維斯提及呢名17歲國家隊新丁時更講到,當球隊有活特本呢類球員,咩事都有可能發生。我哋睇返佢入果球遠射,發現佢估計落點準確,控果下非常冷靜,人哋後衛望波衝出黎果下都已經遲咗(之不過英超應該唔會咁易畀佢控到,果個位實有後衛衝上黎),加上果球射得有角度,條curve、力度計得岩岩好。由呢球波睇得出,活特本清楚知道自己要做啲咩,並且完美咁實行出黎。


https://www.youtube.com/watch?v=aRs-alX8pHY

而睇返對摩爾多瓦果場比賽,活特本後備登場亦都有球助攻。呢球波睇到佢膽識過人,就係佢呢種向前衝嘅膽識, 加埋隊友走位配合到佢嘅傳送, 先造就到呢個入波嘅出現。
https://www.youtube.com/watch?v=OR7hGDLd0bM

但係佢都有缺點嘅,或者應該話未夠成熟。佢俾人迫一樣會甩波,而且視野一般,好多時都帶咗去死位。另外就係唔夠硬淨、好易就俾人撞跌。佢欠缺同閘位/左邊幫波隊友配合既意識,喺英超咁踢法好易俾人打反擊,假如活特本係打左翼,後面係摩蘭奴加路夫蘭…

2016年10月,岩岩17歲嘅佢就同利物浦簽咗3年合約,跟據規例,3年係呢個歲數可簽合約嘅最長年期。當球員年滿18歲後,利物浦青訓球員嘅合約就可以簽5年(好似阿諾咁)。而活特本嘅努力並無白費,黎緊10月15日, 係佢18歲生日,利物浦已經為佢準備咗一份生日禮物-一份新合約。

講下呢個後生仔啦,佢喺車路士出世,當佢喺青年軍果陣,佢媽媽就講到明想個仔過啲「正常人嘅生活」,即係明知個仔返學練波會遠啲,都想佢住喺屋企,唔想佢住宿舍。(好彩人地呀娘個正常生活定義都只係想見多個仔幾面有返家庭樂姐,如果喺香港話踢波?做好功課未呀,咁快做好?報多兩個補習班先!好啦返哂補習班學完七國語言就俾你踢五分鐘波啦!)基於呢個原因,加上利物浦睇中咗呢個後生仔,所以球會就請咗個司機,專門接送佢去練波同返屋企。

而利物浦睇人都睇得幾準嘅…話晒係長線投資,回報呢家野慢慢就會見到。
上年11月聯賽盃對列斯聯,佢第一次為利物浦一隊上陣,以17歲又45日之齡成為利物浦最年輕入波球員,呢個入波亦係佢喺利物浦嘅第一球,果球波由韋拿度姆送到埋龍門口,活特本輕鬆射入。雖然高普認為果球波唔係真係咁難入, 畀著高daddy自己射都會入,但公平啲,韋拿姆度個波交俾佢都彈彈下, 佢都要壓得住個波先會入嘅。

而佢上季合共為利物浦上陣過9次,但今季就仲未入選過正規賽一隊。高普教後生仔有佢自己一套方法,相信活特本歸隊之後,就會將佢嘅場外曝光率減少,主要目的係想佢唔好未紅先驕,同埋將注意力集中喺球場上,而唔係虛名。

有球評人指出高普應該喺呢一季將活特本外借,令呢位年輕球員得到更多上陣機會,因為留喺利物浦有太多競爭對手;但亦有人反駁,指利物浦今年最少要踢四線作戰,球隊需要活特本喺度,而佢上陣機會亦因為多賽事而大增,加上同一隊球員一齊受訓,可以加強佢對球隊嘅歸屬感,以及球員間嘅默契、師兄弟間嘅bonding。
高普係訪問中亦講到:「我聽到有人叫佢威爾斯王子, 呢個名幾好呀!但我就唔肯定活特本鐘唔鐘意啦。佢嘅表現非常出色,我好了解活特本,佢會盡全力去踢每一場波、參與每一節訓練。我當然有留意到佢係國家隊嘅比賽,要一名17歲嘅球員係場上發揮到呢個水準實在少見。活特本係一名有耐性嘅男孩,對佢係球場上或者個人發展都係一件好事。」

高普都曾擔心威爾斯國家隊太早俾活特本參與一隊賽事係一件壞事,但唔上都上咗啦,仲成為球壇焦點。高普就咁回應:

「相信係球場外好多人為活特本歡呼緊,但歷史教訓我地,好多年輕球員係一夜成名之後高速墮落,光芒一閃即逝(即虛榮感會摧毀一個球員)。不過,我相信呢樣野唔會係活特本身上發生,因為利物浦會保護佢,揀一條最岩佢行嘅路,佢會踢U23定一隊定點樣?教練團遲啲會有決定, 而最終嘅目標係活特本成為一隊球員-可能係下個月、又或者出年?時間並唔係重點,佢仲年輕。活特本嘅球技 好好,係一名好有潛質嘅球員。」



source:the guardianepsnsports

留言


請按此登錄後留言。未成為會員? 立即註冊
  • Lawrence Mok 於 08/09/2017 評論 NO. 1

    支持小妹,絕對好過另一專欄

  • Sparta0018 於 08/09/2017 評論 NO. 2

    Lawrence Mok 果個專欄近期唔見咗,可能比你打殘咗😂😂😂

  • Lawrence Mok 於 10/09/2017 評論 NO. 3

    其實應該黃牌,舉腳過高引致危險動作不嬲都係俾罰球,踢中人最多咪黃牌,估計今次直紅原因係因為踢中果個係守門員,再加上踢到頭,但細禁區外守門員係同一般球員一樣,無特別既保護,果刻艾馬臣用頭去攔某程度上只係佢對自己隻腳無信心,試諗下係佢個頭撼中文尼個肚(拖丹翻版)佢係咪又直紅?

快捷鍵:←
快捷鍵:→