【匪夷所思】點解米奴列連後備都無？ 精選

係尋日利物浦對阿仙奴果場波，米奴列並無上陣，就連後備席都無佢份。由model門將卡里奧斯做正選，以及ward做後備，米奴列無病無痛，係對阿仙奴呢啲大戰有咁嘅安排，的確會引黎不少猜疑。
咁意大利傳媒就報導，鑑於利物浦前任門將連拿有好大機會離開拿玻里加盟巴黎聖日耳門，拿玻里就對現任利物浦門將米奴列有興趣。而今次並唔係第一次米奴列同拿玻里扯上關係，早喺2013年，當年米仔仲係新特蘭，拿玻里就開始留意佢啦。

係賽後，高普就同大家講，唔驚，米奴列只係今場休息，下場對曼城必定會正選上陣（如果國際賽無特別事發生）。

正所謂休息是為了走更遠的路，高普指門將嘅心理質素好重要，米奴列係過去12日打左四場比賽，對佢黎講都算係幾密集，而佢表現亦相當唔錯，特別係救左球12碼。

「係季前，我講過我地需要三位強勁嘅門將。」
「你唔係可以講到實邊個係二號門將、邊個係三號門將，但係米奴列就一定係首選。」

「我尋日同米奴列傾過（阿仙奴場波個安排），個劇本當然唔會係我講完佢就同我抱抱再講句thanks boss啦，但我想佢抖下。」

對於阿仙奴8射0中，被問到卡里奧斯今場係咪無野做，高普就咁答：

「你唔應該咁樣問，我認為呢條問題有啲唔尊重。」

「卡里奧斯有時太冷淡，但我認為佢今場打得幾好。」

但高普都有批評佢嘅，佢花太多時間去用波，但佢需要時間同經驗去習慣。老實講，今場卡里奧斯又真係令到利物浦防守更性感而已。點解咁講呢？卡里奧斯兩度於禁區被韋碧黑高速迫搶嘅氣勢嚇倒，好在佢去到龍門口自行終結進攻。講到尾，卡里奧斯用波慢囉。而卡里奧斯今場壓力都咪話唔大，對住阿仙奴，米仔表現又好，有比較架嘛。好在佢嘅手鎚都好左，打走山齊士嘅罰球以及奧斯爾嘅角球；但都唔可以忘記佢俾人偷左兩球。作為一個觀眾，尋日無失波係好彩，有幾球都只係咁岩封到，仲有幾次都區頂混戰都危險架，成場黎講，佢差唔多無接實過咁滯，如果利物浦先失波就完全唔同玩法。
但高普今次呢個舉動的確有啲怪，下個星期係國際賽， 如無意外係比利士國家隊入面，米奴列都會係坐後備，由車路士嘅古圖哲斯上陣。你想俾米仔抖，擺佢係後備咪得囉。唔通之前外借及協助哈特斯菲爾德上英超嘅ward仔嗌走，高普想留住佢？小妹有朋友就話呢個係高普嘅暗黑兵法，要斷後路，至諸死地而後生，目的係要激活路夫蘭同埋摩蘭奴…咁都俾佢諗到，小妹認輸啦。

當年連拿都係打起少少就賣，換龍又衰幾年…雖然幫過一隊打歐聯果年唔可以幫第二隊⁠⁠⁠⁠，但附加賽唔計嘛…
睇到米仔仲咁緊張場波，唔似得山齊士咁笑笑口，無事嘅。