【不為BIG MONEY而踢波】史杜列治拒絕轉會到北京國安 精選

今日同大家講下史杜列治先，之前鏡報就有話高普將佢封左盤，唔會賣佢架啦，因為要搵人頂替佢嘅機會成本太高。而亦有報導指出，如果有球會出到一個「吸引、驚人」嘅價錢，利物浦先會考慮出售呢名15號仔。

講到尾，對於FSG黎講，咪又係錢作怪。同利物浦洽談緊基達嘅萊比錫紅牛高層就曾經話過，要拒絕一個天價嘅開價係nonsense啦。

而史杜列治就被指係上星期一拒絕左一個來自中國球隊嘅開價，講得出係中國球隊，就知舊錢一定唔細，究竟係邊隊呢？據報就係北京國安啦，而北京國安就係由前利華古遜領隊舒密特做主帥，但佢地開左個咩價呢？暫時無人知道，所有報導都只係提到係「big money」。
❤ ❤ ❤ 容許小妹重申一次，史杜列治係拒絕左北京國安嘅OFFER，會繼續留係利物浦。❤❤ ❤

呢位27歲嘅英格蘭前鋒係2013年由車路士轉會到利物浦，總共為利物浦上陣119場，入過61球，數據上唔錯架。係羅渣士時代同蘇亞雷斯史達寧都part得幾好幾威，仲同英超冠擦身而過。但去到2015年，蘇亞雷斯走左，高普揸fit之後，佢嘅地位開始下滑。一來高普改變陣式；二來傷患亦一直困擾住佢。係岩岩果季，佢被封為玻璃腳，因為整季佢只上陣27次，入左7球波。縱使史杜列治係上季表現未如理想，但高普亦有多次係訪問中認同佢係球會嘅重要性，而係過去兩場（燦美爾及韋根）友誼賽都有上陣，睇到佢嘅表現平穩，之不過畢竟係熱身賽，個個都有得打…

睇返利物浦現時買人嘅計劃，買完蘇蘭基之後，高普應該唔會再買中鋒前鋒，所以史杜列治無九成都有八成繼續為利物浦上陣。但點都好，利物浦中鋒嘅核心都會放返係費明奴度，但留意返，利物浦來季仲要打歐洲賽事，換句話只要史杜列治搞得掂「容易受傷的男人」呢個問題，佢來季上陣機會係大增。史杜列治仲有團火去踢波嘅，去中國踢波就無高質素足球比賽踢，就算有再多錢都好，對於一個頂級足球員黎講都係一種…一種…唔愉快嘅事。再者，史杜列治係國家隊表現其實唔錯，只要佢無受傷都九成入選英格蘭國家隊。而佢係國家隊表現甚至比球會好，可能係戰術問題，英格蘭打防反多，空位多，而且係國家隊啲波唔洗自己反搶，走位等波到就可以；相反高普高壓搶迫，佢邊度會慣呀…但佢係球隊都有佢嘅角式，打密集果陣通常都係史杜列治搵倒位起腳，攻門意識同進攻走位（搵位起腳）都好過其他前場，只係唔知點解射門都比較正龍門姐。
講到尾，留史杜係度可以加強板櫈深度，而佢亦有好勝心，小妹仲想見到佢著住利物浦波衫跳入波舞架 ！
[url=http://i.makeagif.com/media/9-25-2014/FaS2DP.gif]http://i.makeagif.com/media/9-25-2014/FaS2DP.gif[/URL]