【左閘之交易】利物浦拒絕拿玻里對摩蘭奴£11m出價

利永遠不會毒行 於 23/06/2017 發表 收藏文章
有好多傳聞都話利物浦將會賣走摩蘭奴,但最近利物浦就拒絕左拿玻里對佢嘅£11m 開價。

雖然呢位西班牙球員就比較少正選上陣,三年前利物浦用左 £12 m由西維爾買佢返黎,但24歲嘅佢有嘅係青春,所以利物浦將會標價為 £15 m。拿玻里嘅開價同仲少過買返黎個價,利物浦緊係等下先啦…反正個轉會市場都未完。


其實摩蘭奴唔係無人要,係利物浦,佢左閘位俾part time 占士米拿代替左,但其實AC米蘭、國際米蘭都對佢有興趣。而佢黎利物浦前嘅球會西維爾,亦都考慮緊簽返佢返去。而馬德里體育會曾係一月果陣提出借用摩蘭奴架,之不過被利物浦拒絕咁解~

今次亦係拿玻里係轉會市場嘅第一次第一個球員開價,亦即係代表摩蘭奴係國際市場係有價有市,咁又唔怪得利物浦咁淡定啦,真係淡淡定,有錢剩呀!而據外媒消息指出,摩蘭奴嘅去留將會由高普買到邊位新左閘再定斷。買到岩心水又岩價錢,咪放佢走囉,個世界咁大,後生仔要睇多啲野嘅;一個唔好彩買唔到,留佢係度都可以做後備,話晒佢係隊中僅餘嘅正職左閘嘛。
但球迷對利物浦係£11m呢個價位都唔放走摩蘭奴有啲意見,有部份球迷認為佢咁嘅表現都有價係合理,埋怨高普點解唔賣;有部份就表示佢比較岩踢意大利波,走對佢都有好處;有部份就認為佢並唔係「垃圾」,£11m呢個開價係完全唔合理!

好啦,又係時間講下高普想買咩人…
今次就話高普對摩納哥嘅班捷文文迪(Benjamin mendy)有興趣,呢位94年出世嘅法國仔係左閘呀!無錯呀,係正職左閘!佢更被譽為法國新星,係一個好有天份嘅球員。佢有185cm身高,又夠大隻,身位唔錯。佢唔只係防守上有用,憑住反應快,係counter attack果陣好多時都成功製造威脅。

https://www.youtube.com/watch?v=YV2nlwz9f5I但佢想就想去英國啦,不過唔係利物浦,係曼城喎... 據知曼城已經接觸緊摩納哥,而家係討價還價嘅階段。利物浦可唔可以係度搶到返黎呢?

算啦,都係小妹FF,利物浦唔擅長於搶野方面…我地都係繼續留意劇情發展算啦…


source:liverpoolechotelegraph


留言


請按此登錄後留言。未成為會員? 立即註冊
    快捷鍵:←
    快捷鍵:→