【明確目標】踢歐聯定買人，前四將會係一個指標 精選

望一望今個星期既英超比賽，我地嘅對手會係屈福特，原來不知不覺間我地已經踢左34輪嘅比賽，雖然而家只係排係積分榜第3位，距離車路士同熱刺有一段距離，但今季其實係高普既帶領之下利物浦都有好大嘅改變，根據天空體育嘅消息指出，今季英超場均跑動距離最長嘅就係利物浦，我地平均每場比賽跑動距離有116.9KM，排係第二位嘅係曼城，哥迪奧拿球隊場均跑動115KM，而車路士只有113.1KM，更意想唔到嘅係曼聯竟然包尾，場均跑動只有106.1KM。
講完呢個消息之後，小妹都明白今季利物浦做到既只可要係爭前四，希望下季有歐聯踢，今季除左我地對下游球隊有時會劫富濟貧之外，傷患問題同後備陣容/板櫈深度不足都係另一個問題。有消息指出利物浦今季會有多達2億英鎊嘅預算去買人，當中有1億英鎊係淨收入，而另外1億就係來自賣人，當中沙高﹑摩蘭奴同馬高域都被放上轉會名單之中，仲未計其他小將同邊緣球員，所以今季大清洗應該在所難免。

小妹就覺得馬高域其實唔應該賣，呢位翼鋒球員既速度同個人技術都幾高，聽講FIFA都幾好用，雖然真實同遊戲肯定會有出入，但係之前見過佢踢侯城嘅比賽，都踢得唔錯呀，加上佢只係得23歲，小妹覺得佢應該得到一個機會再係利物浦試下。點都好啦，當你真係有2億英鎊既預算去買人，究竟又買到幾多個人呢？上年曼聯呀普巴一野都用左8900萬英鎊，買個普通球員閒閒地都三千幾萬鎊。不過呢，假如利物浦今季入到前四，下季有歐聯踢又唔同講法，咁樣就可以吸引到球員來投，唔洗用一大筆錢去買個人，球員轉會嘅意願對於轉會都有一定既影響。 至於買咩人呢，小妹，其實唔只小妹架啦，大家就認為左閘同翼鋒方面要買人。首先左閘今季大多數都係用占士米拿黎頂踢，呢位英人其實之前係踢翼鋒，之後又變左踢中場中，今季踢左閘雖然應該唔係佢鐘意既位置，但佢都盡力踢好每一場比賽，係幾扺讚既。

左閘人選方面，近期有消息指出高普有意買侯城嘅羅拔臣，呢位羅拔臣只有23歲，佢之前係蘇格蘭聯賽踢過波，2014年加盟侯城踢到宜家， 小妹認為係英超搵左閘球員其實係個幾好既諗法，因為呢啲英超球員唔需要額外既時間去熟悉英超嘅比賽節奏，有時候從其他聯賽買人唔係唔好，只係一但適應唔到，只會淪為另一個水貨。
至於點解話買翼鋒而唔係前鋒呢？

史杜列治係季尾離唔離隊呢個時候真係無人知，而丹尼京斯下季相信應該有機會踢下波（乜都好返啦），而費明奴轉打前鋒之後表現幾好，所以為左加強板櫈深度，小妹認為應該買多個翼鋒以確保文尼或古天奴有乜差池既時候可以擔到大旗。最近有傳就話高普想買阿仙奴嘅張伯倫，現時張伯倫同阿仙奴只係得返1年合約，而係足總杯見到張伯倫既好表現之後，相信雲爺爺都開始急著想續約。假如我地今季入到前四，相信張伯倫都唔會抗拒加盟利物浦。唔知大家又對呢位英格蘭國腳點睇呢？當然利物浦而家都要集中踢好之後幾場比賽先，始終曼聯、曼城同阿仙奴都對著前四位置虎視眈眈。