【仲有八場】韋拿度姆：我都有壓力！ 精選

利物浦雖然有主力受傷，但係岩岩星期六主場贏左愛華頓3：1，愛華頓獲得強隊認證。即係大家都會預計利物浦將會係黎緊今晚0300（即星期四凌晨0300）對般尼茅夫嘅比賽有優勢。

韋拿度姆認為，利物浦應該用對愛華頓嘅心態同打法去對待般尼茅夫：「我估計如果係一開始就有態，成場波會輕鬆好多。」
「就算你係場內發生一啲唔如意嘅時，好似輸左球波咁啦，最重要係對自己有信心，唔好俾件負面事件影響球場上嘅自己，做返自己嘅工作，保持水準。」

「我地係對愛華頓場波表現係唔錯嘅，亦令到我地好過啲因為我地終於做好一樣我地應該做得好嘅事。就算我地輸緊，我地仍然維持到一個隊形，相信自己可以做得更好。所以係對般尼茅夫嘅比賽，我地要集中去做到呢幾點。」

利物浦而家係英超積分榜排名第3，仲有8場波未踢，比起踢少場嘅曼聯同曼城各多一分同五分，老老竇竇，小妹並非樂觀派，對爭頭四仍然有擔憂。
「我地承受唔起再有低潮，」但心水清嘅韋拿度姆亦補充：「但我地係一月果陣都跌過落去，所以有時啲野真係話唔埋，咩野都有可能發生。」

「有時候，就算你出盡100％嘅力氣、有晒信心而又集中去踢一場波，都唔代表贏硬。」咁係變化萬千嘅英超，佢又講得岩。「但輸波又點，同自己講，今場波雖然輸左，但係我地已經做足應該做嘅野去贏波。心態問題，如果我地一早咁樣諗，應該贏左好多場波。」

「我地睇返英超排名，有好多隊波都有機會去爭頭四。對我黎講，係一件好事。睇返世界各地唔同聯賽，你見到嘅係只有一、兩隊球隊去爭冠，或者頭四早已有劇本；相反係英超，成件事唔同左，去到呢個時刻仲有六、七隊去爭踢歐聯，對於球迷、或者係球員我，都會覺得有趣 （interesting）。」利物浦係最近四場波拎到三勝一和，今晚對般尼茅夫，如果拎到三分，對於穩固排名有一定嘅幫助。之不過留意返，利物浦係上回合4－3輸左俾般尼茅夫，
「失敗係成功阿媽，我地要從中學習。當時我地好早入左兩球波，但上半場最後果10分鐘真係好難打，我地完全無晒隊形。係半場果陣，高普同我地講，如果我地再咁打，真係會失波甚至輸波。下半場果陣，我地仍然做唔到應該做嘅野，直到對方入左波我地先醒，醒左之後，我地再次集中亦有入波，但係3比1之後，我地太被動同太輕敵令到對手有機可乘。」
利物浦劫富濟貧就出晒名，贏埋愛華頓之後，成功地創下未輸過俾排名頭七隊嘅球隊。韋拿度姆就否認利物浦係唔識踢弱隊：「公平啲講，季初我地贏到強隊同弱隊架，只係一、二月係我地低潮時間失分比較多，令到球迷有錯覺我地只會對強隊先有勝算。」

「最後呢八場比賽將係一個機會俾我地推翻呢個「劫富濟貧」嘅錯覺，我地會做到架！」

韋拿度姆其實講野幾叻，聽完佢講都有啲安全感嘅…但言談間，都感受到佢有壓力。雖然小妹都㩒慣平安鐘，希望今晚唔洗點用啦…


reference：liverpoolfc