【無根據預測】利物浦－你海鮮夠了嗎？ 精選

尋晚小妹發夢有隻馬騮講，利物浦呢，對上半版嘅球隊都會和或者贏，相反對住下半版嘅球隊就會失分。所以佢將利物浦剩低嘅比賽做左個分析：

上半版球隊
下半版球隊
跟住落黎嘅比賽：

13/3 般尼 下半
20/3 曼城 上半
1/4 愛華頓 上半6/4 般尼茅夫 下半
8/4 史篤城 上半
16/4 西布朗 上半
23/4 水晶宮 下半
2/5 屈福特 下半
6/5 修咸頓 上半
13/5 韋斯咸 下半
21/5 米杜士堡 下半

結論：五隊上半、六隊下半，我地假設對上半嘅有3分，對下半有0分。
即係11場入面會有15分，加埋而家嘅52分，
最後就會以67分完成賽季，要爭頭四，唔多夠。

（以上只代表夢中馬騮意見，並不代表小妹立場。）

要爭頭四，唯有改變下踢法、打破宿命。
高普係訪問入面承認利物浦嘅「海鮮」原因係水準問題，建議利物浦應該學識點樣踢得直接啲，正所謂less is more，對下游球隊應該要踢得唔好咁花巧，簡單就是美。簡單…後場一腳釣上去搏下大霧/second chance，同分邊由得隻翼去爆，岩晒對901球隊（好似係）。

球隊總有時間係經歷低潮，又會突然踢得好好。
高普：「黎緊呢個星期應該點樣過呢？係輸左俾李斯特城之後，大家都憤怨了：下一場我地贏左阿仙奴，受到大家嘅讚賞，但之後呢？我地會問自己，下場對般尼，我地應該點做？諗到呢度，大家突然都變得好沉重。而我，身為領隊嘅責任就係要令到球員返去一個正確嘅心態去面對。」

「老實講，我都幾星期無睇般尼啲比賽啦，但係最近我都留意多左佢地，佢地防守做得好緊密，而且反擊做得唔錯；相反，我地嘅弱點就係太想做短傳組織，但交甩波變左俾人打反擊。」

（小妹：係利物浦中場，拉蘭拿叫做全面啲同韋拿度姆算係較好嘅兩個，計傳控安尼簡都接受到不過意識奇差，軒達臣長傳唔錯，但間唔中橫傳同向後傳都係力水唔岩；而後防嘅路夫蘭猜兩腳就要大腳清，係危險啲嘅。）
針對於之前高普話係季尾有可能買最多六位球員嘅講法，佢被問到會唔會因為睇到球員對阿仙奴果場突然踢得好嘅表現令到佢係夏季轉會市場上做決定更難呢？佢就咁答：「呢個係一個好問題。因為係輸左俾李斯特城後，我真係好嬲、好唔開心，但而家我又無事啦。我唔會只用一場波、或者只係用佢地踢得最好果場去評價一個球員。」所以大家可以放心，高普買人嘅計劃應該會繼續落去。

「而家我地會做嘅野就係點樣將你將接收到嘅訊息去過濾再睇下點實行 。因為係輸波、低潮果陣，你聽到嘅消息永遠係難聽，忠言逆耳呀嘛。但人生就係咁，受壞消息影響總係大於好消息。」

球隊而家上下一心，大家都好好。老闆好，球員好，佢都好。場場都贏，球迷更好～