【球迷猜測】極少睇利物浦嘅大老闆去咗睇巴塞波！ 精選

利申：以下係綜合球迷們係嘅猜測同FF，未有官方消息證實。

話說利物浦美藉大老闆John W Henry 尋日去左魯營睇巴塞對雷加利斯嘅比賽，仲要坐左係貴賓廂，呢場波最後係巴塞2：1贏左雷加利斯，美斯梅開二度！咁呀大老闆老婆仲要高調地係twitter表示興奮喎。

一眾fans立即眼紅，大老闆連自己利物浦嘅比賽都唔多睇，竟然去睇人地波？因為咁，傳聞就出黎啦…今次大老闆係去傾生意…

傳聞1：「大老闆想蘇亞雷斯返利物浦。」
傳聞2：「大老闆想賣古天奴去巴塞。」
傳聞3：「巴塞想邀請高普做領隊。」


話說巴塞歐聯大敗PSG之後，歐聯出局。俾著係利物浦，大家都應該被訓練到接受到呢個賽果，但係呢隊係巴塞，16強出局盛傳令到球迷同埋管理層極度不滿，更有傳球員認為佢嘅戰術根本唔岩巴塞踢。講到咁，咁岩領隊安歷基又得返半年約…問責制唔係香港先有嘅（好似係），估計安歷基都凍過水。再者，美斯係巴塞都16年，人生有幾多個十年？美斯同巴塞將會係2018年約滿，但到左而家都仲未續約有消息，期間仲傳出佢想去英超、法甲度踢，如果真係留唔到美斯，早啲賣左佢再拎筆錢去買過個球員好過啦。
綜合以上嘅巴塞現況，傳聞2同傳聞3都唔係傳得無道理。

之不過，高普係多蒙特同利物浦都踢高壓迫搶同玩熱情，以前嘅巴塞或者岩踢，但而家打4－3－3，中場一腳波上前俾MSN（美斯，蘇亞雷斯，尼馬）搞掂，完。
https://www.youtube.com/watch?v=pzNVVH9JVdo高普完傳唔係果隻feel囉。而如果古天奴踢巴塞，又可以同國家隊隊友尼馬拍住上， 又可以慳返啲時間去培養默契。
咁傳聞1呢？ 有網民聯想到會唔會大老闆想蘇亞雷斯返利物浦，其實都係一個好消息黎嘅，佢把握力有幾好大家唔洗質疑，對於利物浦前場變陣有好大幫助，但唯一嘅問題係，佢岩唔岩高普呢？利物浦會唔會返返去以前，前場三子用阿蘇、史杜列治再加個古天奴呢 !? 另外，蘇亞雷斯係英超咬人嘅事都令到佢曾經好唔受歡迎，不過都過左咁耐，人係善忘嘅，如果再返去利物浦，應該係會受掌聲歡迎多於噓聲！
但最多人傳嘅係傳聞1+傳聞2。又有球迷聯想到會唔會想用古天奴去換蘇亞雷斯（加錢）…如果利物浦下年踢唔到歐聯，相信古天奴雖然簽左新約，但都係有一定機會走；相反，利物浦如果踢到歐聯，留低一個比較年輕嘅古天奴，比起已經30歲嘅蘇亞雷斯，好似長遠黎講會抵啲。

唔知阿蘇同古仔同場同隊上陣嘅畫面係未來會唔會再見到呢？


reference：metro，dailystar